Muluku Alottaka ni Moise

Moise aahikhala nttetthe wa oMidiyaani miyaakha 40. Owo aahithela ni aahaayara anamwane. Nihiku nimodha asukihaka iputthiputthi dha anweya-ye waattamela Omwaako Sinaayi, Moise ahoona etthu yantikininhe. Owo ahoona mataakhuru a nttaikho evarelaka masi ehidhyaaka. Okathi Moise aattamenle iye nttaikho ole wiira oone ele yairaneya, aahiwa ndhu nilottaka wiira: ‘Moise! Nhaattamele opuro ola. Nrule isandaalya dhinyu okhala wiira opuro ola ti wawaarya.’ Moise ahoova vawaatta, akhuneela omaithoni-we okhala wiira Yehova taanlottiha arumeelaka nlaikha.

Ni Yehova aahilotta tho wiira: ‘Miyo kihoona wiira Anaisarayeeli annihaawa vawaatta. Kinawaakusa kaarooihe opuro wooreera wiira ehiye okhalihiwa ipottha Weexiitu. Ndho nyuwo kihoothanlani wiira mwaakhumihe atthu awo Weexiitu.’ Okathi Moise aaiwale iye elo aahoova vawaatta.

Moise aahinkoha Yehova wiira: “Akhala wiira anookikoha wiira ‘taani oorummeni onikhumiha’, kiwaakhule dhai?” Muluku aahimwaakhula airaka: ‘Mwaire Yehova Muluku Abrahaamu, a Isaaki ni a Yaakobe tokirumme wooreelani.’ Moise aahitthikela-tho okoha airaka: ‘Khindho akhala wiira khanne ekikhupali?’ Yehova aahilakela omoonihera etthu Moise yaaya onkhupaliha wiira veene ammukhalihera. Owo aahinvekela Moise wiira ammorosele ttootto-ye vathi. Ndho ttootto ole aahithatuwa enowa! Moise aahiphara waamwiila wa enowa ele ni etthikela-tho okhala ttootto. Ndho aahilotta evaara yanaaili airaka: ‘Okathi aIsarayeeli an’ya awa owoonani mpakaka itthu idha, awo anawookhupalini.’

Moise aahaakhula airaka: ‘Masi miyo onnikixankiha olotta ohoolo wa atthu awaatta okhala wiira miyo ka ntthu ookukuma.’ Yehova aahinlaihera wiira: ‘Miyo kinawoohudhihani etthu yoolotta ni muulupale nnyu Arooni onoorowa ni nyuwo.’ Okathi-ya yoole Moise aahikhupali wiira Yehova aammukhalihera. Ndho aahivenya veene, amwaariye ni aana-ye ekarowa Weexiitu.