Yeremiiya Aahaalaleerya Atthu Moolipa Nrima

Yehova aahinthanla Yeremiiya wiira akhale profeeta a oYuda. Ni aahinruma wiira aalaleerye atthu ootheene wiira ehiye opaka itthu dhootakhala yaapaka awa. Masi Yeremiiya aalontte wiira: ‘Yehova, miyo karapasi nkhaani ni nkinwerya olotta ni atthu awaatta.’ Yehova aahinleela wiira: ‘Yeremiiya nhoove. Miyo kinaawokhaaliherani ni kinawohudhihani etthu muntthune nnyu olotta.’

Nihiku nimodha, Yehova aahinruma Yeremiiya wathukumanya makulupale a oYuda, ni ophwesa exaaru ya oloko ohoolo-wa. Nuuvenya Yeremiiya aahathokihera makhulupale ale wiira etthu yaairanen’ye ni exaaru ele, etthu emodharu en’ya wiiraneya ni epoma ya oYerusaleemu. Okathi apanka iye elo, makhulupale ale yaahinanariwa vawaatta. Nankuttho mmodha aaitthaniwa Pasuri aahimmana Yeremiiya ni antthuka metto ni miyoono antthukelela vanttaikhoni. Yeremiiya aahiviriha ohiyu ntero ahiweryaka wiitannya. Nuseliwa mmeelommwa aahitaphuliwa. Veene aahirimpwa nrima vawaatta ni alotta wiira khaakhakhala atthikelaka olaleerya. Masi nire wiira Yeremiiya khatthikenle-tho olaleerya? Naari. Yeremiiya ahuupuwela saana ni ahilotta wiira: ‘Nhupi wa Yehova onlikana nkhama Mooro ompatta mmirimammwaka. Nkinwerya ohiya olaleerya.’

Noovira miyakha dhawaatta, oYuda waahipacera olamuleliwawo ni mwene nkina. Anankutthu ni maporofeeta awootha yaaninyokha itthu Yeremiiya alotta iye. Ndho mwaha wa elo yaahaleela makhulupale a oYuda wiira aiphiwe Yeremiiya. Masi Yeremiiya alontte wiira: ‘Akhala wiira nnokipha, mun’ya omwiipha nlopwana ohitthenke etthu. Itthu miyo kinlottaka kahi wiira kinkhumiha mmupuwelommwaka, masi dhinkhuma wa Yehova.’ Noomala makhulupale a oYuda wiiwa elo yalontte wiira: ‘Nlopwana ola khamphwanelela wiiphiwa.’

Yeremiiya khaahin’ye olaleerya, mwaha wa elo novira okathi makhulupale ale yaahinanariwa. Ndho yaahinvekela mwene wiira amwiiphe Yeremiiya. Masi mwene aahaleela makhulupale ale opaka ele yaatthuna awa. Noomala-vo makhulupale ale yaahilakela omwiipha Yeremiiya. Yaahimphara enrahelela nlittini mwawiisa ni yariwo marove awaatta. Yeremiiya aahipacera ophina mmarovene.

Okathi nlopwana mmodha aaitthaniwa Ebedimeleekhi aadhuwenle iye elo, aahirowa olotta ni mwene airaka: ‘Makhulupale anrihela Yeremiiya nlittini! Akhala wiira khankhumihiwa-wo onookhwa.’ Mwene aahinruma Ebedimeleekhi ni alopwana akina 30, orowa onkhumiha Yeremiiya olittini. Hata aahanwe vawaatta, Yeremiiya ahoonihera olipa nrima ni khahin’ye olaleerya. Khi nyuwo munnitthuna ontakiha Yeremiiya?