Ahudheri Yaahaakhela Nnepa Wawaarya

Nuumala ovira mahiku 10 Yeesu atthikenle wiirimu, arummwa-ye yaahaakhela nnepa wawaarya. Elo yaairanen’ye nihiku na Pentekooste 33 Nuumala Kiriistu Ora ni yaahirowa atthu awaatta oYerusaleemu wuupuwelela efeesta ya paasikha. Nihiku-na nenne na pentekooste yaahikhala-vo ahudheri a Yeesu 120, yaawo yathukumanne esaala ya odhulu. Naanaanoru yahikhumelela etthu yootikiniha, onyakula waalikana nkhama ettheku waahidhala esaala ele. Moottharelana yaahikhumelela etthu nkhama malumi a mooro, yaparanri vamuru wa khuta nrummwa ari esaala ele. Ndho arummwa ootheene yaahipacera olootta ilottelo dhoovirikana.

Atthu yakhumme ilapo dhikina eyaaka osekurya oYerusaleemu, yaahiiwa onyakula iwe. Ndho atthu ale yaahitthimakela mpaani mmwe wiira yoone etthu yaairaneya. Atthu ale yahitikinihiwa vawaatta okhala wiira arummwa ale yaanilotta ilottelo dha atthu ootheene. Ndho yaanikohana yiiraka: ‘Masi atthu ala ta oKalileeya, ndho onweryaneya dhai atthu olotta elottelo nhu?’

Okathi-ya yoole, Peedru ni arummwa akina yaaheemela ohoolo wa atthu ale ekaaleela moopora Yeesu okhwiye iye ni moopora Yehova onhihimunse iye. Nitho Peedru ahaacerera airaka: Nenna-va Yeesu ori moono weelopwana wa Muluku ni oonivaha nnepa wawaarya aanilaihenre iye. Ti yeelo atthu enwiiriha woona ni wiiwa miiriirya idha.

Okathi atthu ale yaaiwala awa moolumo a Peedru, yahitikinihiwa vawaatta ni yahinkoha wiira: ‘Etthu seeni ninrerela nhu opaka?’ Peedru ahiwaakhula wiira: ‘Ntharuwe opaka itthu dhootakhala ni mpatisiwe mwa ndhina na Yeesu. Nyuwo mwaira dhidho nnawaakhela nnepa wawaarya.’ Nihiku-na nenne, atthu yaaphiyera 3.000 yaahipatisiwa. Okhuma vaavale ahudheri a Yeesu yaahaacerereya mwawaakuveya oYerusaleemu. Ekhaliheriwaka ni nnepa wawaarya, arummwa yaahipaka miloko dhawaatta ni yaanaahudhiha atthu itthu dhootheene Yeesu aleenle iye.