Itthu Oonihiwe Yoohaani

Okathi nrummwa Yoohaani aatthukeliwe iye elika ya oPaatmo, Yeesu aahimooniha itthu 16 dhaaya wiireya nhoolo. Dhawoonihiwa idho dhaanoonihera moopora ndhina na Muluku naaya awa otteelihiwa, moopora Omwene wa Muluku waaya awa ora ni moopora yoolakela ya Muluku yaaya awa wiireya wiirimu ni valaponi.

Yawoonihiwa emodha, Yoohaani aahimoona Yehova akilaanthi veehiceni yawaarya wiirimu. Ehice elo yaahirukuryeriwa ni Asitokweene 24 yaawo yaawanre ikuwo dhootteela ni ekhara ya ewooru mmuruni. Veehiceni-vo waanikhuma-vo odherima ni itari. Asitokweene awo 24 yaanuurama ohoolo wa Yehova ni yaaninkokhorela. Yawoonihiwa ekina, Yoohaani aahoona nttitthi muulupale wa atthu yaakhuma maloko ootheene, mahimo ootheene ni ilottelo dhootheene enkokhorelaka Yehova. Mwaapwittipwitthi yoowo ori Yeesu, aanaavelela atthu awo onratthini wa maadhi a ekumi. Yawoonihiwa yoottharelana, Yoohaani aahimoona Yeesu apacenre olamulela nkhama Mwene vamodha ni Asitokweene 24. Nuumala-vo Yoohaani aahimoona Yeesu awanaka ni enowa yuulupale, niire dho, Satana ni malaikha-ye ootakhala. Yeesu aahimwiikara Satana vamodha ni malaikha-ye ootakhala wiirimu anrahela valaponi.

Moottharelana Yoohaani aahoonihiwa etthu yootepa oreera. Owo aahimoona mwaapwittipwitthi vamodha ni atthu 144.000 yeemenle Omwaako Siyooni. Ni aahoona nlaikha nikhuruwelaka vathi ni naaleelaka atthu wiira: ‘Munkokhorele Muluku ni munvuwihe yoowo.’

Yawoonihiwa yoottharelana, Yoohaani aahoona ewaniwaka ekhotto ya Armagedooni. Ewaniwaka ekhotto elo, nrummwa Yoohaani aahimoona Yeesu ni anakhotto-ye ewenrye olumwinku ola wootakhala wa Satana. Yawoonihiwa yookhidhera Yoohaani aahoona nreettele ni wiiraana waakhanle eriyari ya Malaikha wiirimu ni apinaatamu valaponi. Satana vamodha ni atthu ale yaantthara yaahipwetesiwa. Ndho atthu ootheene valaponi ni wiirimu yaanittittimiha ndhina na Yehova ni yanninkokhorela yoowo meekhe.