Ewaarakha ya Nikhuru Noolamulela

Anna Oophetiiwa:

Nkhama arumeyi a Yehova, ootheene nhu ninninttittimiha Biibiliya, okhala wiira dhawiiraneya nimphwanya nhu mBiibiliyani, ti dheekhweeli. Ni malakihero Biibiliya onnivaha iye toororomeleya ni anoonihera opheta wuuluupale Yehova Oriyena wa hiyo. (Esalimo 119:105; Luka 1:3; 1 Yohani 4:19) Hiyo nintthuna wiira atthu ootheene ehudhe ikhweeli dhoottuneya dha Mbiibiliyani. Tivondho, ninnihakalala okhumihera eliivuru ela eniira: “Nhudhe ni Dhawiiraneya Dha Mbiibiliyani.” Ni ninawolelani itthu vakhaani voohima dha eliivuru ela.

Eliivuru ela, yaatikhiiwe saasasa yuupuweliwaka anaahima. Masi ata eri dhiidho, pooti waakhalihera atthu uulupale antthuna ohudha itthu dhawaatta voohima dha Biibiliya. Ata hiyo nihundhe ekhweeli khalayi, enoonikhalihera wuupuwelela dhawiiraneya idha. Moohaakanyera, Biibiliya eliivuru anroiheliwa atthu ootheene ni itthu onhudhiha iye inoonikhalihera ophwanya ohakalala.

Niirumeelaka dhawiiraneya dha Mbiibiliyani, eliivuru ela enninileela dhawiiraneya dha apinaatamu okhuma khalayi. Eliivuru ela ennitthokihera dhawiiraneya dha Mbiibiliyani mwa enamuna yookhweya ni yawiweya, movarihana ni okathi dhaairaneya awa.

Eliivuru ela, ennilotta ohiya pahi dhawiiraneya dha Mbiibiliyani. Dhawatikhiwa ni ifootu, ikociheriwe mwa enaamuna yoophara nrima wiira yaakhalihere alipa oosoma woona nkhama atthu awo yoonela awa.

Eliivuru ela enninonihera wiira Biibiliya elivivuru enaalotta atthu yaamwiiwelenle Yehova ni atthu yahaamwiiwelenle. Eliivuru ela enoonoonihera etthu ninhudhera nhu ni atthu awo. (aRoma 15:4; 1 aKorinto 10:6) Eliivuru ela ekaawanyiwe iphante 14. Woopacerani wa khula ephantte ennuuluula miyaha nin’ya nhu ohudha ephante entharelana.

Akhala wiira mwa naan’yari, nsome ni mwaninyu khuta yaawiiraneya ni nvaanelena voohima dha ifootu. Numala-vo nsome dhaawatikhiwa dha mBiibiliyani dhiri wookhidherani wa yoosoma. Mmukhalihere mwaninyu wiiwasasa moopora dhawaatikhiwa idho dhinvarihana awa ni dhawiiraneya dhinlottiwa eliivuru ela. Ni pooti opaka etthu emodharu okathi nninkhalihera nnyu ntthu muulupale omwiwasasa Biibiliya.

Ninlipelela wiira eliivuru ela yaakhalihere atthu ootheene: Anaahima vamodha ni atthu uuluupale ohudha voohima dha noolumo na Muluku. Ole on’ya ovarihela nteko ele Biibiliya onhudhiha iye, onoowerya onrumeela Yehova vamodha ni atthu onaapheta-iye.