YOOSOMA 09
Ovekela Onoolipiha Waataana Winyu ni Muluku
Niire mootaka otthuna ovahiwa miruku mweekumuni mwinyu? Niire mookhalana makoho a mweekumini mwaatthuna nnyu odhuwela waakhuliwa-wa? Niire mwaanitthuna omaalihiwa aahiidho okhaliheriwa? Niire mwaanitthuna otepa omwaattamela Yehova? Ovekela etthu yuulupale en’ya wookhaliherani makhalelo nnyu ootheene. Masi tiivi eri enamuna yooreerela ovekela? Niire Muluku onniwiriyana mavekelo ootheene? Eseeni mureerela nnyu opaka wiira Muluku awiiriyane mavekelo nnyu? Nirowe noone.
1. Taani ninreerela nhu onvekela ni nivekeleni?
Yesu ohudhinhe wiira ninvekele pahi Tiithi nhu ori wiirimu. Elo ti etthu Yesu apaka iye. Owo alontte dho: “Nto nvekeleke so: ‘Tiithi ihu muri wiirimu . . .’” (Matheyo 6:9) Vaavo nininvekela nhu Yehova waataana wihu ni yeene onnitepa olipa.
Hiyo pooti onvekela khuta etthu. Masi Muluku onawaakhula mavekelo nhu akhala wiira annivarihana ni yootthuna-ye. “Muluku onooniwiriyana wa khula etthu eninvekela ahu, enivarihana ni ele oniphavela awe.” (1 Yohani 5:14) Yesu oonivaha ntakihero na itthu ninreerela nhu ovekela. (Munsome Matheyo 6:9-13.) Vaavo nininvekela nhu Muluku itthu dhinnixankiha, nihiliyale onxukhurela mwaha wa itthu onnipakela iye ni waavekelela atthu akina.
2. Nikavekela dhai?
Mavekelo nhu ahaana okhuma vanrimani. Tivondho, Biibiliya onnitumererya iye ‘onleela [Muluku] ovelavela wihu wootheene’ (Esalimo 62:9) Hiyo pooti onvekela Yehova khuta okathi ni khuta opuro ni ndhu nawiiweya aahiidho noohiiweya. Nitho khiwaavo opuro aahiidho enamuna ninreerela nhu okhala naavekelaka. Hiyo pooti ovekela nikilanthi, nikokhonre aahiidho neemenle. Etthu yootepa otthuneya omoonihera onttittimiha Yehova naavekelaka.
3. Muluku onaakhula dhai mavekelo nhu?
Owo onnaakhula mavekelo nhu mwa inamuna dhawaatta. Mwa ntakihero, mBiibiliyani ninniphwanya waakhuliwa wa makoho nhu awaatta. Ndho osoma Nuulumo na Muluku onnaavaha “miruku atthu òwiyeviha” aahiidho ahaana akhili. (Esalimo 19:8; munsome Yakobo 1:5.) Nitho Yehova pooti onimaaliha okathi ninkumananhuna mixankiho. Yeene pooti waarumeela arumeyi-ye wiira enikhalihere okathi nintthuna nhu okhaliheriwa.
NHUDHE ITTHU DHIKINA
Moone etthu munreerela nnyu opaka wiira Muluku awiriyane mavekelo nnyu. Nitho moone moopora mavekelo an’ya awa wookhaliherani.
4. Nipakeni wiira Muluku awiriyane mavekelo nhu?
Itthu seeni dhootepa otthuneya ninreerela nhu opaka wiira Muluku awiriyane mavekelo nhu? Moone EVIIDIYU.
Yehova ontthuna wiira hiyo ninvekele yeene. Nsome Esalimo 65:3, nuuvinya mwaakhule makoho anttharelana:
Nyuwo nnoona wiira “Namaiwa mavekelo” onnitthuna wiira nyuwo mmuvekele? Eseeni enwiirihani wuupuwela dhiidho?
Wiira Muluku awiriyane mavekelo nhu ti vootthuneya okhala moovarihana ni malamulo ni malakihero-ye. Munsome Mikeya 3:4 ni 1 Pedru 3:12, nuuvinya mwaakhule nikoho ninttharelana:
Mun’ya odhuwela dhai wiira Yehova onniwiriyana mavekelo nhu?
Anakhotto anvekelaka wiira yaawerye awananiya ni awananiya ekavekela etthu emodharu. Nnoona wiira Muluku onnaakhula mavekelo nkhama awo?
5. Mavekelo nhu ahaana okhuma vanrimani
Atthu akinaku ahudhihiwe wiira yaanvekelaka Muluku, ahaana oromola madhu mamodharu ivaara dhootheene anvekela awa. Masi niire ti yeelo Muluku ontthuna iye? Munsome Matheyo 6:7, nuuvinya mwaakhule nikoho ninttharelana:
Eseeni munreerela nnyu opaka wiira ‘nhikatthikela oromola moolumo mamodharu’ okathi munvekela nnyu?
Nnoonela dhai wuupuwelela khuta nihiku itthu Yehova onoovahaiyeni ni oxukhurela dheidho munvekelaka? Mwapaka elo esumana ntero, nyuwo nnoowerya ovekela itthu 7 dhoovirikana nhitthikelaka moolumo mamodharu.
Paapa onnihakalala vaavo mwane oninleela iye itthu dhiri vanrimani-ve. Emodha-modharu ni Yehova, owo onnihakalala vaavo nininleela nhu itthu dhiri vanrimani vihu
6. Ovekela yoovaha ya Muluku
Ovekela on’ya onivaha dhai ikuru okathi wooxankiha? Moone EVIIDIYU.
Biibiliya onlotta wiira ovekela onoonikhalihera ophwanya nrettele mmuupuweloni. Munsome aFilipi 4:6, 7, nuuvinya mwaakhule makoho anttharelana:
Ekhweeli wiira ovekela khommala-maliha mixankiho dhinyu, masi hata eri dhiidho ovekela on’ya wookhaliherani dhai?
Ndho itthu seeni mwaatthuna nnyu ovekela?
Niire mwaanidhuwela?
Nuulumo nawiira “amen” nintaphulela “yiireye dhiidho” ahiidho “ekhweeli.” Ovinya khalai, nuulumo nawiira “amen” ninnirumeeliwa woomalani wa nivekelo.—1 Wahala 16:36.
7. Mwiivahe okathi wiira nvekele
Ivaara dhikina ninnaattana miteko nikaliyala ovekela. Niire Yesu aanivaha efaita ovekela? Munsome Matheyo 14:23 ni Marko 1:35, nuuvinya mwaakhule makoho anttharelana:
Eseeni Yesu aapaka iye wiira akhalena okathi woovekela?
Etthu seeni munreerela nnyu opaka wiira nkhalena okathi wa ovekela?
ATTHU AKINAKU ANLOTTA WIIRA: “Ovekela ntthu ommaliha etempu mahala ene, Muluku khanwiriyana mavekelo.”
Ndho nyuwo nnoonela dhai?
WUULUULA
Mavekelo ankhuma vanrimani pooti onikhalihera otepa omwaattamela Muluku, onivaha nrettele wa mmuupuweloni, ni onivaha ikuru wiira niwerye ondhiveliha Yehova.
Ipontu dhuulupale
Taani ninreerela nhu onvekela?
Nivekele mooporani?
Ovekela on’ya onikhalihera dhai?
NTHOKODHE ITTHU DHIKINA
Mphwanye waakhuliwa wa makoho ahireere wuulana voohima dha ovekela.
“Itthu 7 Muntthuneya Nnyu Odhuwela Voohima dha Mavekelo” (A Sentinela, 1 de outubro de 2010)
Moone moopora ovekela oraawa wootthuneya ni moopora woopaka mavekelo ookhalela.
Taani ninreerela nhu onvekela? Moone ele Biibiliya onhudhiha iye voohima dha mwaha owo.
“Niire Onnireerela Waavekela Masantu?” (Mwaha ori va jw.org)
Eviidiyu enttharelana ya ncipo, moone akhala wiira okathi ni opuro wookhalana efaita vaavo ninvekela nhu.