YOOSOMA 29
Eseeni Eniireya Noomala Ntthu Okhwa?
Niire nyuwo mookhweliwa ntthu mwampheta nnyu? Vaavo enkhumelela awa etthu yooxankiha nkhama elo, woonawene munnikoha wiira: ‘Eseeni eniireya noomala ntthu okhwa? Niire ole kampheta aka okhwiye onootthikela okhala nkumi?’ Yoosoma ela ni enttharela, nin’ya woona waakhula woomaaliha wa Biibiliya.
1. Eseeni eniireya noomala ntthu okhwa?
Yesu ahiphwana-phwaniha okhwa ni ikhove dhuulupale. Ntthu onrupa ikhove dhuulupale khandhuwela etthu eniireya opuro oriiye. Mwa enamuna seeni okhwa onlikana awa ni ikhove? Noomala ntthu okhwa, khanoona owooreya. Owo khanoona wiira ori meekhe ni khanuupuwela akhala wiira anaapheta axirikha-ye ni amudhi-ye. Biibiliya onlotta wiira: ‘Alipa-ookhwa khandhuwela hata etthu’.—Munsome Musuweli 9:5.
2. Odhuwela ekhweeli voohima dha alipa-ookhwa onnikhalihera dhai?
Atthu awaatta annoova okhwa ni anniwoova alipa-ookhwa! Masi odhuwela ele Biibiliya onhudhiha iye voohima dha okhwa onninimaaliha. Yesu olontte wiira: ‘Ekhweeli elo enawootaphulani.’ (Yohani 8:32) Itiini dhikina dhinlotta wiira atthu ootheene akhalana erooho enhala eri ekumi noomala ntthu okhwa. Masi Biibiliya khanhudhiha dhiidho. Biibiliya onhudhiha wiira noomala ntthu okhwa khanoona ekoyi. Ohiya-vo, atthu akhwiye khanwerya onikhumihera mixankiho, okhala wiira khandhuwela hata etthu. Tivondho, khahiyo etthu yootthuneya waavaha atthu akhwiye mikuttho, waapakela isatakha, waapatthihera iveela wiira naadhivelihe aahiidho waakokhorela ni waavekelela.
Atthu akina anlotta wiira onniweraneya olotta ni atthu akhwiye. Masi elo khenweryaneya. Nkhama nimanle nhu woona ‘alipa-ookhwa khandhuwela hata etthu.’ Elo enoonihera wiira atthu ale anuupuwela wiira anlotta ni amudhi-ya akhwiye, anlotta ni minepa dhootakhala dheidho dhinootthererya okhala atthu ale akhwiye. Tivondho, odhuwele ekhweeli voohima dha alipa-ookhwa onninikhapelela wiira nihihaapusiwe ni minepa dhootakhala. Yehova onninilopola wiira nihikhala-khale neeheryeryaka olotta ni alipa-ookhwa okhala wiira yeene odhuwela wiira olotta ni minepa dhootakhala okhumihera mixankiho.—Munsome Otumererya 18:10-12.
NHUDHE ITTHU DHIKINA
Nhudhe itthu dhikina voohima dha ele eniireya noomala ntthu okhwa. Nitho nnoohudha wiira Yehova Muluku oopheta ni khawoonihaka atthu ekoyi noomala okhwa. Ndho elo enoolipiha onroromela winyu Muluku nhu oopheta, Yehova.
3. Nhudhe ekhweeli voohima dha alipa-ookhwa
Olumwinku wootheene, atthu annikhupali itthu dhoovirikana voohima dha ele eniireya noomala ntthu okhwa. Masi elo khentaphulela wiira itthu dhootheene atthu ankhupala awa ti dheekhweeli.
Opuro munkhala nnyu atthu annikhupalini voohima dha ele eniireya noomala ntthu okhwa?
Wiira moone ele Biibiliya onhudhiha iye, moone EVIIDIYU.
Munsome Musuweli 3:20, nuuvinya mwaakhule makoho anttharelana:
Moovarihana ni eveersu ela, eseeni eniireya noomala ntthu okhwa?
Niire noomala ntthu okhwa yookhala etthu ya erutthu-yo enhala eri ekumi?
Biibiliya onnilotta okhwa wa Laazaro, nxirikha muulupale a Yesu. Munsome Yohani 11:11-14, moone etthu Yesu alontte iye yeelo yaankhumelele Laazaro. Nuuvinya mwaakhule makoho anttharelana:
Eseeni Yesu aaphwana-phwaninhe iye okhwa?
Ophwana-phwana iwo onnihudhihani voohima dha ele eniireya noomala ntthu okhwa?
Niire munnikhupali ele Biibiliya onlotta iye?
4. Odhuwela ekhweeli voohima dha okhwa onninikhalihera vawaatta
Odhuwela ekhweeli voohima dha okhwa onninikhalihera ohiwoova alipa-ookhwa. Munsome Musuweli 9:10, nuuvinya mwaakhule nikoho ninttharelana:
Niire alipa-ookhwa anoowerya onihaasa?
Vaavo nindhuwela nhu ekhweeli ya mBiibiliyani, khaninkhupali muupuwelo wawootha wawi tivootthuneya waavaha mikuttho, waapakela isatakha ni waapattihera iveela wiira naadhivelihe alipa-ookhwa aahiidho waakokhorela. Munsome Yesaya 8:19 ni Wiisuupulula 4:11, nuuvinya mwaakhule nikoho ninttharelana:
Nyuwo nnoona wiira Yehova onoonela dhai vaavo ntthu onaakokhorela iye atthu akhwiye aahiidho onaavekela iye nikhalihero?
Ekhweeli voohima dha okhwa enninitaphula dhoolema dhininnanara Yehova
5. Odhuwela ekhweeli voohima dha okhwa onninimaaliha
Atthu awaatta ahudhihiwe wiira noomala okhwa an’ya woonihiwa ekoyi mwaha wa itthu dhoohiloka apanka awa khalai. Masi tivoomaaliha odhuwela wiira khanirowa woonihiwa ekoyi noomala okhwa hata naatanke opaka itthu dhoohiloka. Munsome aRoma 6:7, nuuvinya mwaakhule makoho anttharelana:
Biibiliya onlotta wiira ntthu noomala okhwa ooleveleliwa itampi-dhe, niire dho, Muluku ottipiha itampi-dhe. Ndho, nnoona wiira atthu akhwiye annoonihiwa ekoyi mwaha wa itampi opanka awa khalai ehinakhwe?
Vaavo nintepa nhu ondhuwela Yehova, ninniwerya woona wiira owo khanwooniha ekoyi aahiidho waahukhuma atthu akhwiye. Munsome Otumererya 32:4 ni 1 Yohani 4:8, nuuvinya mwaakhule makoho anttharelana:
Niire Muluku orina mikhalelo noonne nhu iveersu idha awooniha ekoyi aahiidho waahukhuma atthu akhwiye?
Niire odhuwela ekhweeli voohima dha ele eniireya noomala ntthu okhwa onnoomaalihani? Mwaha wa seeni?
ATTHU AKINAKU ANLOTTA WIIRA: “Miyo kinnoova etthu en’ya okikhumelela noomala okhwa.”
Yawaatikhiwa seeni ya mBiibiliyani nyuwo mun’ya nnyu orumeela wiira munkhalihere ntthu owo?
WUULUULA
Noomala ntthu okhwa, ekumi-ye enoomala-mala. Ndho alipa-ookhwa khanoona ekoyi ni khanwerya wahaasa aahiidho waakhumihera mixankiho atthu akumi.
Ipontu dhuulupale
Eseeni eniireya noomala ntthu okhwa?
Odhuwela ekhweeli voohima dha okhwa onnikhalihera dhai?
Seeni oraawa voomaaliha odhuwela ekhweeli voohima dha okhwa?
NTHOKODHE ITTHU DHIKINA
Moone ele entaphulela awa nuulumo naawi “erooho” mBiibiliyani.
“Erooho Eseeni?” (Mwaha ori nsaaitini jw.org)
Moone akhala wiira Muluku onaahukhuma atthu ootakhala aahiidho oweeyela omooroni.
Niire ninnireerea owoova atthu akhwiye?
Minepa dha Alipa-Ookhwa —Dhinoowerya Wookhaliherani Aahiidho Woohaasani? Niire Dhookhala Tthiri? (ebroxuura)
Moone moopora nlopwana mmodha ophwanye iye nimaaliho noomala odhuwela ele eniireya noomala ntthu okhwa.
“Waakhula wa Biibiliya Wahikiphara Nrima” (A Sentinela, 1 de Fevereiro de 2015)