YOOSOMA 30
Atthu Mwaapheta Nnyu Akhwiye Anootthikela Okhala Akumi!
Okhwa onnikhumihera woona owooreya ni oriipiwa nrima. Tivondho Biibiliya oniitthana iye okhwa okhala nwanani. (1 aKorinto 15:26) Yoosoma 27, nyuwo moohudha wiira Yehova onoommaliha nwanani owo. Masi eseeni en’ya waakhumelela atthu ale akhwiye? Yoosoma ela, nyuwo mun’ya ohudha yoolaihera ekina yoohakalaliha ya Yehova. Owo onawaahihimusa atthu ibiliyawu dhawaatta akhwiye wiira ephwanye ekumi yoohimala. Niire atthu akhwiye tthiri onoohihimusiwa? Niire awo an’ya ohihimusiwa wiira ekhale wiirimu aahiidho valaponi vaava?
1. Eseeni Yehova ontthuna iye waapakela amudhi nhu ni axirikha nhu akhwiye?
Yehova onnitthuna vawaatta waatthikihera ekumi atthu akhwiye. Nlopwana mmodha ororomeleya aitthaniwa Yobi anikhupali wiira Muluku khakhala-khala anliyalaka noomala okhwa. Owo ahinleela Muluku airaka: “Nyuwo mwamukìhana, miyo kiwakhuleni [nkhapuri].”—Munsome Yobi 14:13-15.
2. Nindhuwela dhai wiira atthu akhwiye anoowerya ohihimusiwa?
Okathi Yesu aaraiye valaponi, Muluku aahivaha owerya wa waahihimusa atthu yaakhwiye. Mwa ntakihero Yesu aahinhihimusa mwaamwali arina iyaakha 12 ni mwaana anaankhweli atthikela okhala nkumi. (Marko 5:41, 42; Luka 7:12-15) Nitho, Yesu aahinhihimusa nxirikha iye Lazaaro. Nnaamwi Lazaaro akhwiye ni avirihe mahiku maseese ari mmahiye aahiidho nkhapuri, Yesu aahihimusa atthikela okhala nkumi. Noomala Yesu onvekela Muluku, aahilotta airaka: “Laazaro, mukhumele ota!” ndho “mulopwana ole aakhwiiye aahikhumela ota”. Ndho Lazaaro aahitthikela okhala nkumi! (Yohani 11:43, 44) Nkuupuwelani moopora yaahakalanla awa axirikha ni amudhi-ye Lazaaro!
3. Eseeni anlipelela awa amudhi nnyu ni axirikha nnyu akhwiye?
Biibiliya onlaihera wiira: ‘Onookhala ohihimusiwa.’ (Miteko 24:15) Atthu yaahihimusiwe khalai ni Yesu khiyaaronwe wiirimu. (Yohani 3:13) Awo yaahihakalala otthikela okhala elapo ya vathi. Emodha-modharu, moohilekela Yesu onawaahihimusa atthu ibiliyawu dhawaatta akhwiye wiira ekhale mahiku ootheene mparayiisu valaponi vaava. Owo olontte wiira “atthu otheene ari mmahiye” anoohihimusiwa. Elo entaphulela wiira atthu ootheene ari mmuupuweloni wa Muluku anootthikela okhala akumi, hata atthu ale hiyo nihinwuupuwela nhu.—Yohani 5:28, 29.
NHUDHE ITTHU DHIKINA
Moone mBiibiliyani itthu dhinoonihera wiira atthu akhwiye anoohihimusiwa ni etthu enoonihera wiira elo enawiireya. Nitho moone moopora ohihimusiwa on’ya awa woovahani nimaaliho ni nlipelelo.
4. Yesu ohoonihera wiira onoowerya waahihimusa atthu akhwiye
Nhudhe itthu dhikina voohima dha itthu Yesu ampakenle iye nxirikha-ye Lazaaro. Munsome Yohani 11:14, 38-44, nuuvinya mwaakhule makoho anttharelana:
Nindhuwela dhai wiira tthiri Lazaaro aahookhwa? —Munsome eversu 39.
Yesu aahinhihimusa Lazaaro atthikela okhala valaponi vaava. Waakhanle wiira Lazaaro aakele wiirimu, nnoona wiira Yesu ammuhihimusa?
5. Atthu awaatta akhwiye anoohihimusiwa!
Nsome Esalimo 37:29, nuuvinya mwaakhule nikoho ninttharelana:
Imilyawu dha atthu awaatta akhwiye anoohihimusiwa. Ndho atthu awo en’ya ekakhala owi?
Ohiya pahi waahihimusa arumeyi a Yehova, Yesu onawaahihimusa-tho atthu awaatta akhwiye. Nsome Miteko 24:15, nuuvinya mwaakhule nikoho ninttharelana:
Taani muntthuna nnyu omoona ahihimusiwe?
Nkhama dhiidhaale paapa oninkhweela awa ovenyiha mwane onrupa. Emodha-modharu, Yesu onoonkhweela onhihimusa ntthu okhwiye
6. Ohihimusiwa onoowerya woovahani nimaaliho ni nlipelelo
Osoma mBiibiliyani yaawiiraneya ya mwaana a Jairo ennaamaaliha ni ennaalipiha atthu awaatta anripiwa nrima ni woona owooreya mwaha wa okhweliwa. Nsome yaawiiraneya elo eri Luka 8:40-42, 49-56.
Ahinatthi Yesu onhihimusa mwaana a Jairo, owo aahileela Jairo wiira: “Muhoove etthu, mwaamini paahi.” (Moone eveersu 50.) Nlipelelo na ohihimusiwa nin’ya wookhaliherani dhai akhala wiira . . .
ohookhwa ntthu mwampheta nnyu?
ekumi nnyu eri mmaxakhani?
Moone EVIIDIYU, nuuvinya mwaakhule nikoho ninttharelana.
Nlipelelo na ohihimusiwa naamaalinhe dhai ni waalipiha anan’yari-ye Phelicity?
ATTHU AKINAKU ANLOTTA WIIRA: “Nlipelelo na ohihimusiwa atthu akhwiye ti nootepa oreera masi kahiyo neekhweeli.”
Nyuwo nnoonela dhai?
Yawaatikhiwa seeni mun’ya nnyu orumeela enoonihera wiira ohihimusiwa onawiireya?
WUULUULA
Biibiliya onlaihera wiira atthu ibiliyawu dhawaatta akhwiye anoohihimusiwa. Yehova ontthuna wiira awo etthikele okhala akumi ni onvaha Yesu owerya wa waahihimusa atthu akhwiye.
Ipontu dhuulupale
Eseeni Yehova ni Yesu antthuna awa waapakela atthu akhwiye?
Niire atthu ibiliyawu dhawaatta an’ya ohihimusiwa an’ya okhala wiirimu aahiidho valaponi vaava? Eseeni enwiirihani olotta dhiidho?
Niire munnikhupali wiira atthu mwaapheta nnyu akhwiye anootthikela okhala akumi? Mwaha wa seeni?
NTHOKODHE ITTHU DHIKINA
Moone malakihero aninkhalihera ntthu onoona owereya mwaha wa okhweliwa.
“Itthu Dhinaakhalihera Ale Akhweliwe” (Despertai!, N.º 3 de 2018)
Niire malakihero a mBiibiliyani anoowerya onkhalihera ntthu onoona owereya mwaha wa okhweliwa?
Mun’ya onkhalihera dhai mwaana ovilela woona owereya mwaha wa okhweliwa?
Niire aakhala an’ya ohihimusiwa wiira yakhale wiirimu? Taani ahin’ya ohihimusiwa?
“Ohihimusiwa Eseeni?” (Mwaha ori nsaaitini jw.org)