YOOSOMA 42
Eseeni Biibiliya Onlotta iye Voohima dha Othela ni Ohithela?
Dhoolema dha ilapo dhikina atthu anuupuwela wiira atthu anhakalala taale athenle ahiidho atheliwe. Masi kahiyo wiira atthu ootheene athenle ni atheliwe annihakalala nitho kahiyo wiira atthu ootheene oohithela ni oohitheliwa khanhakalala. Biibiliya onlotta wiira othela ni ohitheliwa dhoovaha dhinkhuma wa Yehova.
1. Mareeliho seeni amphwanya awa atthu ohithela ni ohitheliwa?
Biibiliya onlotta wiira: “Ole onithela onniira etthu yooreera, masi ole ohinithela, onniira etthu yootepa oreera.” (Munsome 1 aKorinto 7:32, 33, 38.) Mwa enamuna seeni ntthu oohithela ‘onniira iye etthu yootepa oreera’? Makiristau oohithela ni oohitheliwa khanxanka ni itthu dhikhanle onhakalaliha nlopwana aahiidho nthiyana. Tivondho, awo annikhalana otaphuwa ni okathi wawaatta woovara miteko dha Yehova. Mwa ntakihero, akina annithaamela mapuro oothowa anamalaleerya wiira yalaleerye ihapari dhooreera dha Omwene. Ohiya-vo, awo annikhalana okathi wawaatta wiira elipihe waataana-wa ni Yehova.
2. Mareeliho seeni amphwanya awa atthu athelanne mwa nlamulo?
Othela ni ohithela wookhalana mareeliho. Biibiliya onlotta wiira “halaali okhala atthu anli ovikana okhala mmosa paahi.” (Musuweli 4:9) Elo ekhweeli, saasaasa Makiristau antthara miruku dha mBiibiliyani voohima dha ekasamento. Vaavo nlopwana ni nthiyana anthelana awa mwa nlamulo awo animpaka natiri elaiheranaka ophetana, ottittimihana ni okhapelelana nkina ni nkhwe. Voohakanyera, elo ennaavaha atthu anthelana mwa nlamulo okhala oophareleleya moovirikana na atthu aili ankhala vamodha ehithelanne mwa nlamulo. Ndho elo enniiriha ekasamento, okhala yoophareleleya wiira anaahima yinnuwe saana.
3. Tuuvi ori moonelo wa Yehova voohima dha othelana?
Noomala Yehova okhumihera ekasamento yoopacera, owo alontte wiira: “Tivó mulopwana onahiyawe atithi awe ni n’ame awe anakhala vamosa ni mwar’awe.” (Maphattuwelo 2:24) Yehova ontthuna wiira anamathelana ehimwalane mpakha okhwa. Owo onnaakhuleliha omwalana akhala wiira nlopwana aahiidho nthiyana ooraruweliwa. Elo yakhumelela Yehova onninvaha ehaakhi ole oraruweliwe wiira athanle omwalana aahiidho onlevelela ole onraruwenle.a (Moone enoota.) (Matheyo 19:9) Yehova khaniwaakhuleliha Makiristau eekhweeli waatteya, aahiidho onthela nthiyana onxira mmodha ni otheliwa nlopwana onxira mmodha.—1 Timootheyo 3:2.
NHUDHE ITTHU DHIKINA
Moone moopora atthu oothela ni oohithela akhanla awa ohakalala ni onhakalaliha Yehova.
4. Atthu oohithela ni oohitheliwa an’ya orumeela dhai ekumi-ya?
Yesu anoona ohithela okhala etthu yooreera. (Matheyo 19:11, 12) Munsome Matheyo 4:23, nuuvinya mwaakhule nikoho nintharelana:
Yesu aarumenle dhai mootaphuwa ohithela wiira anrumeele Tiithi-ye ni aakhalihere atthu akina?
Makiristau oohithela anoowerya opaka etthu emodharu Yesu apanke iye. Moone EVIIDIYU, nuuvinya mwaakhule nikoho ninttharelana .
Mwa inamuna seeni Makiristau an’ya awa orumeela otaphuwa araawana mwaha wa ohithela ni ohitheliwa wiira yaacerere nteko aninvarela awa Yehova?
Niire mwaanidhuwela?
Biibiliya khanlotta miyaakha ntthu onreerela iye othela aahiidho otheliwa. Masi onnaatumererya atthu olipelela mpakha ‘ovira iyaakha dha omiravo,’ okhala wiira okathi owo ntthu onnitepa wuupuwelela orupihana, ndho elo pooti omwiiriha ntthu opaka yoothanla mookhummwa nrima.—1 aKorinto 7:36.
5. Munthanle mwa miruku ntthu mun’ya nnyu othelana
Othela aahiidho otheliwa, yoothanla yuulupale ntthu ompaka iye mweekumini mwe. Munsome Matheyo 19:4-6, 9, nuuvinya mwaakhule nikoho ninttharelana:
Seeni Nkiristau ohinreerela iye waakuvela othela aahiiidho otheliwa?
Biibiliya onawookhaliherani odhuwela mikhalelo dha nlopwana onreerela woothelani ni nthiyana munreerela nnyu onthela. Masi etthu yootepa otthuneya munthanle ntthu onimpheta Yehova.b (Moone enoota.) Munsome 1 aKorinto 7:39 ni 2 aKorinto 6:14. nuuvinya mwaakhule makoho anttharelana:
Seeni ninreerela nhu othelana ni ntthu oninrumeela Yehova?
Akhala wiira ninoothelana ni ntthu ohininrumeela Yehova, Yehova on’ya woonela dhai?
Akhala wiira inama piili dha makhalelo ni munnuwelo woovirikana dhinnitthukeleliwa nttaikho nsikoni wiira ivare nteko vamodha, dhinawoona ekoyi. Emodha-modharu, akhala wiira Nkiristau onnithelana ni ntthu ohinimpheta Yehova onookhalana mixankiho dhawaatta
6. Nkhalena moonelo mmodharu wa Yehova voohima dha othelana
Khalai alopwana akina yaanimwalana ni mwaariya woohikhalavo nthowa. Munsome Malakhiya 2:13, 14, 16, nuuvinya mwaakhule nikoho ninttharelana:
Seeni Yehova onnyokha iye omwalana nihikhanlevo nthowa ninaakhulelihiwa ni Biibiliya?
Oraruwa ni omwalana onnikhumihera mixankiho ntthu oraruweliwe ni anamwane
Moone EVIIDIYU, nuuvinya mwaakhule nikoho ninttharelana.
Akhala wiira nyuwo nthelanne ni ntthu ohininrumeela Yehova eseeni munreerela nnyu opaka wiira nkhalena ekasamento yoohakalala?
7. Nvarihele nteko malakihero a Yehova voohima dha othelana
Woonawene ntthu pooti wiilipihera vawaatta wiira avarihele nteko malakihero a Yehova voohima dha othelana.c (Moone enoota.) Masi Yehova onnaareeliha atthu ale aniiwelela malakihero-ye. Moone EVIIDIYU.
Munsome aHeeberi 13:4, nuuvinya mwaakhule makoho anttharelana:
Mwa moonelo nnyu niire onniweryaneya ovarihela nteko malakihero a Yehova voohima dha othelana? Mwaha wa seeni?
Ilapo dhawaatta, makhulupale a ilapo idho annaatumererya atthu wiira vaavo antthuna awa othelana yaatikhihe othelana-wa orexiistu aahiidho vaavo atthu anthanla awa omwalana, emwalana orexiistu. Ndho Yehova ontthuna wiira Makiristau ekhweeli yiiwelele nlamulo nno. Munsome Tito 3:1, nuuvinya mwaakhule nikoho ninttharena:
Akhala wiira moothela aahiidho mootheliwa, niire ekasamento nnyu yoodhuweliwa ni kuveernu?
ATTHU AKINAKU YOOKOHANI WIIRA: “Eseeni ewiirinheni waatikhiha othelana winyu orexiitu? Niire etampi okhala vamodha nhaatikhinhe othelana winyu orexiistu?”
Nyuwo mun’ya waakhula dhai?
WUULUULA
Othela ni ohithela dhoovaha dhinkhuma wa Yehova. Atthu athenle ni ahithenle anoowerya ophwanya ohakalala akhala wiira annikhala moovarihana ni otthuna wa Yehova.
Ipontu dhuulupale
Atthu oohithela ni oohitheliwa an’ya orumeela dhai ekumi-ya?
Seeni Biibiliya onlotta iye wiira nithelane pahi ni ntthu oninrumeela Yehova?
Nthowa seeni nuulupale Biibiliya onaakhuleliha iye omwalana?
NTHOKODHE ITTHU DHIKINA
Ontaphulelani ‘othelana mwa apwiya pahi’?
“Makoho Ankohiwa ni Atthu Ansoma iliivuru Dhihu” (A Sentinela, 1 de Julho de 2004)
Moone iviidiyu piili ikhaani dhin’ya wookhaliherani opaka yoothanla yooreera voohima dha othukelana ni othelana.
Malakihero Anvahiwa awa ale Anuupuwela Othela ni Otheliwa 11:53
Moone etthu emwiirinhe munna mmodha wuupuwela wiira Yehova onvaha etthu yootepa otthuneya oxiriha ele ohin’ye iye ottuli.
Akhala wiira ntthu onnuupuwela omwalana aahiidho ovalaana itthu seeni onreerela iye wuupuwelela?
“Nttittimihe ‘ele Muluku Okhalinhe iye Emodha’” (A Sentinela, Dezembro 2018)
a Enoota: Moone Enoota 4 wiira ndhuwele mathowa anaakhuleliha ovalaana hata ehikhumelenle mararuwo.
b Dhoolema dha ilapo dhikina, anaan’yari taninthanla ntthu on’ya athelana ni mwana. Masi anan’yari animpheta Yehova ohiya onthanla ntthu orina nsurukhu wawaatta, okhulupale, awo aninthanla ntthu onimpheta Yehova.
c Akhala wiira munkhala ni ntthu nhaatikhinhe othelana winyu orexiistu, onhiya aahiidho waatikhiha othelana winyu ni owo, yoothanla ti ya nnyu.