YOOSOMA 48
Mwaathanle Saana Axirikha Nnyu
Etthu yooreera okhalana axirikha wiira nivirihena okathi woohakalaliha vamodha na awo ni enikhalihere okathi wooxankiha. Masi Biibiliya onninilopola wiira kahi atthu ootheene ninnireerela nhu waapaka oxirikha. Ndho mun’ya owerya dhai waapaka axirikha ooreerela? Nthokorerye makoho anttharelana.
1. Eseeni axirikha munaathanla nnyu akhanla awa okhumihera mweekumini mwinyu?
Vaavo ninviriha nhu okathi wawaatta nilottaka ni ntthu nreetini sosiyaaxi aahiidho okhalana opuro mmodha ninnipacera wuupuwela ni opaka itthu nkhama ntthu owo. Nitho vakhaani-vakhaani pooti opacera ontakiha nipakaka itthu dhooreera aahiidho dhoonanara ompaka iye. Tivondho, Biibiliya onlotta iye wiira: “Onetta n’asuweli onokhala musuweli: onetta n’alolo [atthu ahinimpheta Yehova] onophwanya otakhaliwa.” (Miruku 13:20) Axirikha animpheta ni aninrumeela Yehova pooti wookhaliherani opaka dhoothanla dhooreera. Masi weetta ni atthu ahinimpheta Yehova pooti woottaiviherani ni yeene. Tivondho, Biibiliya onnitumererya iye waathanla saana axirikha nhu! Akhala wiira ninawaathanla axirikha animpheta Yehova elo pooti onikhalihera ni ninoonhakalaliha Yehova. Elo enookhumihera ‘olipihana ni okhaliherana nkina ni nkhwe.’—1 aTesaloonika 5:11.
2. Yehova onwoonela dhai axirikha nnaathanla nnyu?
Yehova onnaathanla saana axirikha-ye. Tivondho, owo ‘onaataana iye ni atthu ooloka.’ (Miruku 3:32) Yehova on’ya woonela dhai akhala wiira ninawaathanla okhala axirikha nhu atthu ahinimpheta? Owo onooripiwa nrima vawaatta! (Munsome Yakobo 4:4.) Masi akhala wiira ninoohiya weetta ni atthu arina mweettelo woohiloka ni nikeetta ni atthu animpheta Yehova owo onoohakalala ni onoonithanla okhala axirikha-ye.—Esalimo 15:1-4.
NHUDHE ITTHU DHIKINA
Moone seeni oraawa vootthuneya waathanla saana axirikha nnyu. Nitho moone moopora mun’ya nnyu owerya okhalana axirikha an’ya wookhaliherani mweekumini mwinyu.
3. Nkhalena ephoole ni axirikha oohiloka
Atthu ahinimpheta Yehova ni ahiniiwelela malamulo-ye axirikha oohiloka. Moone EVIIDIYU, nuuvinya mwaakhule nikoho ninttharelana.
Nin’ya opacera dhai weetta ni atthu arina mweettelo woohiloka nihidhuwelaka?
Munsome 1 aKorinto 15:33, nuuvinya mwaakhule makoho anttharelana:
Ntthu a nkhalelo seeni aaya okhala nxirikha oohiloka wa nyuwo? Mwaha wa seeni?
Nsome Esalimo 119:63, nuuvinya mwaakhule nikoho ninttharelana:
Mikhalelo seeni munreerela nnyu waadhya wa ntthu muntthuna nnyu ompaka oxirikha?
Nsa nimodha nawuntta pooti wuntthiha masa makina. Nkhama nsa nawuntta, nxirikha oohiloka on’ya ohonona dhai mweettelo nnyu?
4. Axirikha nhu khantthuneya okhalana iyaakha dhimodharu
Biibiliya onnaalotta alopwana aili a nloko na Isarayeli a khalai, mmodha oniitthaniwa Yonataani ni nkina Davidi. Yonataani ari mwaana a mwene ni ahikhalana iyaakha dhawaatta onxira Davidi. Masi hata eri dhiidho, awo yaahikhalana waataana woolipa. Munsome 1 Samuweli 18:1, nuuvinya mwaakhule nikoho ninttharelana:
Seeni axirikha nhu ahintthuneya awa okhalana iyaakha aahiidho makhalelo mamodharu nkhama hiyo?
Munsome aRoma 1:11, 12, nuuvinya mwaakhule nikoho ninttharelana:
Axirikha animpheta Yehova anlipihana dhai nkina ni nkhwe?
Eviidiyu enttharelana, moone moopora rapasi mmodha aamphwannye iye nxirikha opuro ahaalipelela iye. Moone EVIIDIYU, nuuvinya mwaakhule makoho anttharelana.
Nkhama moonne nnyu eviidiyu, seeni anaan’yari-ye Andre yaaxankala awa mwaha wa axirikha aapanke iye oskola?
Eseeni yaamwiirinhe Andre opacera waataana ni marapasi ale?
Owo awenrye dhai ovilela nxankiho wa omeekha?
5. Moopora wa waapaka axirikha ooloka
Moone moopora wookhalana axirikha eekhweeli. Nitho moone moopora wookhala nxirikha eekhweeli. Moone EVIIDIYU.
Munsome Miruku 18:24 ni 27:17, nuuvinya mwaakhule makoho anttharelana:
Axirikha a ekhweeli ankhaliherana dhai?
Niire mookhalana axirikha dhiidha? Akhala wiira khimwaana, eseeni munreerela nnyu opaka wiira nkhalena axirikha eekhweeli?
Munsome aFilipi 2:4, nuuvinya mwaakhule nikoho ninttharelana:
Wiira nkhalena axirikha eekhweeli muntthuneya okhala nxirikha ooloka. Mun’ya owerya dhai opaka elo?
Wiira nkhalena axirikha ooloka, nhaana okhala nxirikha ooloka
ATTHU AKINAKU ANLOTTA WIIRA: “Etthu yootthuneya okhalana axirikha moohixikha mikhalelo-dha.”
Nyuwo nnoonela dhai?
WUULUULA
Ovaha ephoole okathi ninaathanla nhu axirikha nhu onoonikhakihera vawaatta ni onoonhakalaliha Yehova.
Ipontu dhuulupale
Seeni moopora ninaathanla nhu axirikha oraawa wootepa otthuneya?
Enamuna seeni ya axirikha ninreerela nhu oxaka?
Mun’ya waaphwanya dhai axirikha ooreerela?
NTHOKODHE ITTHU DHIKINA
Moone moopora axirikha ooreerela an’ya awa wookhaliherani okathi wooxankiha.
“Nlipihe Oxirikha Nnyu Nihinatthi Ophiya Wookhidherani” (A Sentinela, Novembro de 2019)
Moone itthu dhin’ya wookhaliherani waapaka axirikha eekhweeli.
“Mun’ya Owerya Dhai Waapaka Axirikha Ooloka?” (Os Jovens Perguntam—Respostas Práticas, Volume 1, capítulo 8)
Eseeni munreerela nnyu odhuwela voohima dha opaka oxirikha munterneetini?
Nkhalena Ephoole Vaavo Nnaarumeela Nnyu Areeti Sosiyaaxi 4:12
Wiira ndhuwele etthu yaankhalihenre nlopwana mmodha waathanla axirikha ooloka nsome mwaha oni “Miyo Kaanitthuna Okhalana Paapa Ooloka”.
“Biibiliya Onnirukunusa Ikumi dha Atthu” (A Sentinela, 1 de Abril de 2012