Mun’ya Owerya Dhai Okhalana Ettheko Yoohakalala?—Epaarti 2

Anaahima yoovaha enkhuma wa Yehova. Ndho owo, ontthuna wiira anaan’yari ekhapelele saana yoovaha elo. Yehova onnaavaha anaan’yari miruku dhooreera dhin’ya waakhalihera opaka elo. Miruku dha mBiibiliyani dhinnaakhalihera anaahima opaka mphantta-ya wiira ettheko ekhale yoohakalala.

1. Miruku seeni Yehova onaavaha iye anaan’yari?

Yehova onlipelela wiira anaan’yari yaaphete ana, vaaweryaneyaka ekaviriha okathi wawaatta eri naawo. Nitho owo ontthuna wiira anaan’yari yaakhapelele ana erumeelaka malakihero a mBiibiliyani wiira yaahudhihe. (Miruku 1:8) Owo onnaaleela anaan’yari wiira: ‘Mwaahuwe ni mwaahudhihe [aninnyu] nttharaka malakihero a Yehova.’ (Munsome aEefeso 6:4.) Yehova onnihakalala vawaatta vaavo anaan’yari aniiwelela awa malakihero ala. Nitho owo onnihakalala vaavo anaan’yari aniilipihera awa waakhwanihera nritti wa waahuwa ana ehinvahaka ntthu nkina.

2. Miruku seeni Yehova onaavaha iye anaahima?

Yehova onnaaleela anaahima wiira: ‘Nwiiwelele apapannyu ni amaamannyu mwa itthu dhootheene.’ (Munsome aKolosi 3:20.) Vaavo anamwane aniwiiwelela awa ni waattittimiha anaan’yari-ya anninhakalaliha Yehova ni waahakalaliha anaan’yari-ya. (Miruku 23:22-25) Yesu oovaha ntakihero nooreera okathi aariiye mwaana. Yeene aari oomalela. Masi hata eri dhiidho, owo khaahin’ye owiiwelela anaan’yari-ye yaawo yaari oohimalela.—Luka 2:51, 52.

3. Ettheko yootheene en’ya omwaattamela dhai Muluku?

Akhala wiira mwa paapa aahiidho maama, moohakanyera munnitthuna wiira aninnyu ekampheta Yehova nkhama nyuwo nnimpheta nnyu. Eseeni munreerela nnyu opaka wiira elo eweryaneye? Nyuwo nhaana opaka ele Biibiliya onootumereryaiyeni opaka ariki: “Mwalakiheryeke an’inyu [nuulumo na Yehova]. Nwixuttihe mukilathiki owannyu walá mwettaka mukwaha.” (Otumererya 6:7) Nuulumo nawi ‘waalakihera’ nintaphulela otthikela waahudhiha ivaara dhawaatta. Woonawene nyuwo moodhuwela wiira aninnyu ewerye wuupuwelela etthu nnaahudhiha nnyu nhaana otthikela olotta ivaara dhawaatta. Tivondho, yaawaatikhiwa ela ennileela awa wiira nihaana waadhya okathi wiira nilotte ni aniihu voohima dha Yehova. Wiira niwerye opaka elo nihaana wiivaha okathi khuta esumana wiira ninkokhorele Muluku vatthekoni. Akhala wiira khimwaana anamwane tivootthuneya wiivaha okathi khuta esumana wiira mpake yoosoma nnyu ya Biibiliya.

NHUDHE ITTHU DHIKINA

4. Mwaahudhihe aninnyu moopheta

Waahudhiha anaahima etthu yooxankiha. Masi hata eri dhiidho, Biibiliya on’ya wookhaliherani dhai? Munsome Yakobo 1:19, 20, Nuuvinya mwaakhule makoho anttharelana:

• Anaan’yari anoonihera dhai wiira annaapheta ana vaavo anlotta awa naawo?

• Seeni paapa aahiidho maama ohinreerela iye onhudhiha mwaana ananariwe?a —Moone enoota.

5. Mwaakhapelele aninnyu

Wiira mwaakhapelele aninnyu, tivootthuneya ovaanela naawo voohima dha orupihana, hata ohoodhivelakani olotta mwaha owo ohoolo-wa. Moone EVIIDIYU, nuuvinya mwaakhule makoho anttharelana.

EVIIDIYU: Mwaakhapelele Aninnyu Itthu Dhoothakhala (2:58)

• Eseeni enaaxankiha anaan’yari akinaku olotta ni anaya voohima dha orupihana?

• Anaan’yari akina awenrye dhai olotta ni anaya voohima dha orupihana?

Nkhama Biibiliya onlotta iye olumwinku ola wa Satana onootepa otakhala. Munsome 2 Timootheyo 3:1, 13, nuuvinya mwaakhule nikoho ninttharelana:

• Eveersu 13 ennaalotta atthu ootakhala ni ninnidhuwela wiira atthu akina annaarupiha anaahima. Ndho okhala wiira elo enniireya, seeni oraawa vootthuneya anaan’yari olotta ni anaya voohima dha orupihana ni waahudhiha moopora wa wiikhapelele akhala wiira ookhala ontthuna waarupiha?

Niire mwaanidhuwela?

Anamoona a Yehova aakhalana iliivuru dhawaatta dhin’ya waakhalihera anaan’yari olotta ni anaya voohima dha orupihana ni waahudhiha moopora wawiikhapelela akhala wiira ookhala ontthuna waatuphela. Moone matakihero vakhaani:

• Mwaakhapelele Aninnyu (Eviidiyu)

• Aprenda do Grande Instrutor, ekapiitulu 10 ni 32

• “Moopora wa Olotta ni Aninnyu Voohima dha Orupihana” (Despertai! N.° 5 2016)

6. Mwaattittimihe anaan’yari nnyu

EVIIDIYU: Kaalottihe Dhai Anaan’yari Aka? (2:19)

• Seeni eraawa etthu yooreera marapasi wiilipihera olotta ni anaan’yari-ya?

• Rapasi on’ya owerya dhai olotta mwa nttittimiho ni anaan’yari-ye?

Munsome Miruku 1:8, nuuvinya mwaakhule nikoho ninttharelana:

• Marapasi yoonele dhai okathi anaan’yari-ya anaaleela awa etthu anreerela awa opaka?

7. Mmukokhorele Yehova vamodha ni ettheko nnyu

Anamoona a Yehova annilipihera isumana dhootheene wiira ensome Biibiliya vatthekoni. Yoosoma elo ya vatthekoni empakiwa dhai? Moone EVIIDIYU, nuuvinya mwaakhule makoho anttharelana.

EVIIDIYU: Onkokhorela Muluku Vatthekoni—Mixankiho ni Mareeliho (8:04)

• Emudhi en’ya owerya dhai okhalana eprokaraama ya onkokhorela Muluku vatthekoni?

• Eseeni anaan’yari anreerela awa opaka wiira onkokhorela-wa Muluku vatthekoni waakhalihere ni waadhivele anaahima?—Moone efootu eri woopacerani wa yoosoma.

• Mphantta nnyu, nxankiho seeni oniwoocelihani onkokhorela Muluku vatthekoni?

Khalai, Yehova aahaaruma aisarayeeli wiira ekathokorerya vatthekoni dhawaatikhiwa dha Nuulumo na Muluku khuta nihiku. Munsome Otumererya 6:6, 7, nuuvinya mwaakhule nikoho ninttharelana:

• Mun’ya weettela dhai malakihero ala?

Miruku dha moopora woonkokhorela Muluku vatthekoni:

• Opereparari mithukumano dha mmulokoni.

• Osoma ni othokorerya yawiiraneya ya mBiibiliyani.

• Akhala wiira mookhalana anaahima akhaani mbaxari ni mwimpirimiri eprokaraama ya anaahima eri nsaaitini jw.org.

• Mwaarina aninnyu marapasi pooti ohela mpuwa mwaha wa amiravo ori nsaaitini jw.org.

• Opaka yawoonihera ntakihaka yawiiraneya ya ntthu onromoliwa mBiibiliyani vamodha ni aninnyu.

• Woona eviidiyu eri nsaaitini jw.org ni ovaanela ele khuta ntthu ohundhe iye.

WUULUULA

Yehova ontthuna wiira (1) anaan’yari yaaphete, yaahudhihe ni yaakhapelele ana (2) anaahima ewiiwelele ni waattittimiha anaan’yari-ya ni (3) ettheko yootheene enkokhorele.

Ipontu dhuulupale

• Anaan’yari an’ya waahudhiha dhai ni waakhapelela anaahima?

• Anaahima an’ya woonihera dhai wiira annaattittimiha anaan’yari-ya?

• Seeni eraawa etthu yooreera onkokhorela Muluku vatthekoni isumana dhootheene?

NTHOKODHE ITTHU DHIKINA

Itthu seeni munreerela nnyu waahudhiha aninnyu wiira dhaakhalihere yaannuwa?

“Itthu 6 Munreerela Nnyu Waahudhiha Aninnyu” (Despertai!, N.º 2 de 2019)

Moone miruku Biibiliya onaavaha iye ale anaakhapelela anaan’yari-ya awuuluvala.

“Eseeni Biibiliya Onlotta iye Voohima dha Waakhapelela Anaan’yari Awuuluvala?” (Mwaha ori nsaaitini jw.org)

Moone etthu enkhalihenre paapa aahadhuwela moopora wa waahuwa ane, okhala paapa ooloka.

Yehova Oonihudhiha Waahuwa Aniihu 5:58

Moone etthu en’ya onkhalihera tiithi okhalana oxirikha woolipa ni ane.

“Eseeni En’ya Onkhalihera Tiithi Waataana ni Ane?” (A Sentinela, 1 de Novembro de 2011)