YOOSOMA YA MWAHA 36
NCIPO 103 Axitokweene: Yoovaha ya Yehova
‘Nwiitthane Asitokweene’
“Owiitthane axitokweene a mmulokoni.”—YAK. 5:14.
ETTHU NIN’YA NHU OHUDHA
Nin’ya woona seeni eri awa etthu yootthuneya waavekela nikhalihero asitokweene vaavo ninoona nhu wiira ninnitthuneya okhaliheriwa.
1. Eseeni ennikhupaliha wiira Yehova onnivaha efaita yuulupale ipwittipwitthi-dhe?
YEHOVA onnivaha efaita yuulupale ipwittipwitthi-dhe. Owo oothuma idho ni ephome ya Yeesu ni ohaathanla asitokweene a mmulokoni wiira ekhapelele. (Mit. 20:28) Yehova ontthuna wiira asitokweene ekhapelele ipwittipwitthi-dhe moopheta. Ndho ehooleliwaka ni Yeesu, asitokweene annaalipiha anna ni waakhapelela itthu dhikhanle ohonona nkhalelo-ya wa omunepani.—Yes. 32:1, 2.
2. Taani Yehova onaakhapelela iye mwa enamuna yavameekhaaya? (Ezekiyeli 34:15, 16)
2 Yehova onnaathokorerya arumeyi-ye ootheene, masi onnaakhapelela mwa enamuna yavameekhaaya ale anviriha mixankiho nkhalelo wa omunepani. Atthu akina anniriipiwa nrima mwaha wa itampi apanke awa khalai, ndho Yehova onnaarumeela asitokweene wiira yaakhalihere. (Munsome Ezekiyeli 34:15, 16.) Tivondho Yehova ontthuna wiira nikhale ootaphuwa waavekela nikhalihero asitokweene vaavo ninramela nhu. Ndho okathi ninoona nhu wiira ninnitthuneya okhaliheriwa, ohiya pahi onvekela nikhalihero Yehova, nihaana waaveka nikhalihero ‘amakampusi ni alipa-anhudhiha’ mmulokoni.—aEefe. 4:11, 12.
3. Yoosoma ela en’ya onikhalihera dhai ootheene nhu?
3 Yoosoma ela, nin’ya woona moopora Yehova onaarumeela iye asitokweene wiira yaakhalihere ale yoocen’ye nkhalelo wa omunepani. Nitho ninawoona waakhuliwa wa makoho anttharelana: Okathi seeni ninreerela nhu waavekela nikhalihero asitokweene? Seeni nintthuneya nhu opaka elo? Ndho awo annikhalihera dhai? Masi hata nenna-va nirina waataana woolipa ni Yehova, waakhuliwa wa makoho ala anawaacerera oxukhurela wihu marehereryo a Yehova ni woona moopora awo akhanla awa woopola ikumi dhihu vanihikuni.
OKATHI SEENI NINREERELA NHU ‘OWIITTHANA ASITOKWEENE’?
4. Eseeni ennikhupaliha wiira Yakobo 5:14-16, 19, 20 onlotta eretta ya omunepani? (Moone-tho ifootu.)
4 Nrummwa Yakobo onnilotta moopora Yehova onaarumeela iye asitokweene wiira enikhalihere airaka: ‘Niire ookhala ntthu onwereiwa? Awiitthane asitokweene a mmulokoni.’ (Munsome Yakobo 5:14-16, 19, 20.) Yawaatikhiwa ela, ennoonihera wiira Yakobo onlotta eretta ya omunepani. Mwa ntakihero, onnintumererya ntthu owereiwa owiitthana asitokweene, onhiya meetiku. Ohiya-vo, etthu ekina ennikhupaliha wiira enihimmwa eretta ya omunepani okhala wiira Yakobo olotta wiira ntthu onwereiwa onipenuwa aahiidho okhala saana nuumala oleveleliwa itampi. Ivaara dhikina itthu onreerela iya opaka ntthu owereiwa eretta ya veerutthuni wiira apenuwe dhinoolikana ni itthu onreerela iye opaka ntthu onwereiwa nkhalelo wa omunepani. Okhalawene vaavo ninwereiwa nhu eretta ya veerutthuni, ninnirowa okumana ni meetiku, ninnileela eretta enniwereya ni ninnitthara malakihero ootheene onnivaha iye meetiku owo. Mwa enamuna emodharu, vaavo ninwereiwa nhu mwa omunepani, nihaana owaattamela asitokweene waaleela mixankiho dhihu ni otthara malakihero ootheene a mbiibiliyani annivaha awa.
Okathi ninwereiwa nhu eretta ya veerutthuni ninnirowa okumana ni meetiku. Mwa enamuna emodharu, okathi ninwereiwa nhu mwa omunepani, nihaana waavekela nikhalihero asitokweene (Moone ettima 4)
5. Nin’ya owerya dhai odhuwela akhala wiira waataana wihu ni Yehova woopacera ovukuwa?
5 Yawaatikhiwa ya Yakobo ekapiitulu 5, enninitumererya waavekela nikhalihero asitokweene vaavo ninoona nhu wiira waataana wihu ni Yehova woopacera ovukuwa. Masi onootepa okhala vamiruku oveka nikhalihero nno nihinaatthi ohonona waataana wihu ni Yehova! Nihaana okhala oororomeleya naakaneene. Biibiliya onninitumererya oxaka wiidhoototha nuupuwelaka wiira nookhalana waataana woolipa ni Yehova, masi variki nihikhanlena. (Yak. 1:22) Elo yaahiiraneya ni makiristau a eseekulu yoopacera a muloko wa oSaardi. Tivondho Yeesu aahaalopola wiira nkhalelo-ya wa omunepani khiwaakhanle saana. (Wiis. 3:1, 2) Enamuna emodha en’ya onikhalihera ovarerya nkhalelo nhu wa omunepani, ori olikanyiha moopora naaluttuweliwa nhu onrumeela Yehova khalai ni moopora ninluttuweliwa nhu nenna-va. (Wiis. 2:4, 5) Ninoowerya opaka elo niikohaka wiira: ‘Niire koohiya odhiveliwa onsoma Biibiliya ni wuupuwelela ele kinsoma aka nkhama kaaira aka khalai? Niire nenna onnikiliperya okocihera ni wiirela mphantta mithukumano dha mmulokoni? Niire oluttuweliwa waka ovara nteko woolaleerya woovukuwa? Niire kinniviriha okathi wawaatta kipakaka aahiidho kuupuwelaka itthu dha veerutthuni?’ Akhala wiira nookhala nikoho nimodha ninaakhula nhu wiira aayo, elo enoonihera wiira noopacera otteettheya. Ndho naahipake etthu woonawene nxakiho pooti wunnuwa. Masi akhala wiira ninoona wiira khaninwerya olipiha waataana wihu ni Yehova meekhinhu aahiidho noopaka etthu eninanara Yehova, nihaana oveka nikhalihero na asitokweene.
6. Eseeni onreerela iye opaka ntthu opanke etampi yuulupale?
6 Ekhweeli wiira ale apanke etampi yuulupale ekhanle owiiriha okhumihiwa mmulokoni, ahaana onleela ntokweene mmodha. (1 aKor. 5:11-13) Ntthu opanke etampi yuulupale, ohaana oveka nikhalihero wiira akocihere waataana-we ni Yehova. Ndho wiira Yehova anilevelele arumeelaka yawoopola, nihaana ‘ovara miteko dhinoonihera wiira noorukunusa mirima.’ (Mit. 26:20) Miteko idho dhinhela mpuwa waaleela asitokweene akhala wiira noopaka etampi yuulupale.
7. Ohiya pahi ale apanke etampi yuulupale, taani anreerela oveka nikhalihero na asitokweene?
7 Asitokweene khanaakhalihera pahi ale apanke etampi yuulupale, masi-tho annaakhalihera ale yoocen’ye nkhalelo wa omunepani. (Mit. 20:35) Mwa ntakihero, nyuwo pooti wooliperyani okhootta muupuwelo wa otthuna opaka itthu dhoonanara. Elo pooti wiiraneya saasaasa akhala wiira khalai nhinatthi ohudha ekhweeli mwaahikhalana yoolema ya oca mirette dhoohapala, woona epornokrafiiya aahiidho opaka orupihana woohiloka. Ndho nhoovelele oveka nikhalihero wiira nwerye oxira nxankiho owo. Nyuwo pooti othanla onleela nxankiho nnyu ntokweene mmodha munkhala nnyu otaphuwa, owo onawoowiriyanani ni ephoole, woovahani miruku dhoovareleya nteko ni wookhaliherani woona wiira Yehova onihakalala vaavo nniilipihera nnyu okhootta muupuwelo wa otthuna opaka itthu dhoonanara. (Mus. 4:12) Akhala wiira mookhulumuwa mwaha wa wiilipihera okhootta muupuwelo wa otthuna opaka itthu dhoonanara, asitokweene pooti owuupuserani wiira elo enoonihera wiira munnitthuna olipiha waataana winyu ni Yehova ni khanniiroromela mootepana.—1 aKor. 10:12.
8. Niire nihaana waaleela asitokweene khuta yoovonya nimpaka nhu? Ntthokihere.
8 Hiyo khanintthuneya waaleela asitokweene khuta etthu ennixankiha nkhalelo wa omunepani. Mwa ntakihero, nkahaya muupuwele wiira nyuwo moolotta etthu eweren’ye munna aahiidho nrokora mmodha, aahiidho moonananariwa nuuwo. Mwaha nkhama owo, ohiya otukumelela ovekela nikhalihero na ntokweene, nhaana opacera toko otthara miruku dha Yeesu ni opaka nrettele ni munna aahiidho nrokora owo. (Math. 5:23, 24) Nyuwo pooti othokodha nrumeelaka iliivuru dhihu ni osoma miyaha dhinlotta voohima dha okhala oomaala, oopisa nrima ni awiihiiha, wiira nhoolo waakhumelela nxankiho nkhama owo nwerye woonihera mikhalelo idho. Masi akhala wiira khamunwerya ophuka nxankiho owo, pooti waavekela nikhalihero asitokweene. Ewarakha awaatikhenle iye aFilipi, nrummwa Paaulu aahinvekela munna mmodha a muloko ole wiira ankhalihere Evoodiya ni Sintikhi ophuka ohiwanana. Mwa enamuna emodharu, ntokweene mmodha a muloko nnyu onoowerya wookhaliherani.—aFil. 4:2, 3.
SEENI NINTTHUNEYA NHU ‘OWIITTHANA ASITOKWEENE’?
9. Seeni nintthuneya nhu waavekela nikhalihero asitokweene, hata nuuliwaka muru mwaha wa etampi nipanke nhu? (Miruku 28:13)
9 Tivootthuneya okhalana waamini ni olipa nrima wiira niveke nikhalihero okathi ninoona nhu wiira noopaka etampi yuulupale aahiidho khaninwerya okhootta muupuwelo wa otthuna opaka itthu dhoonanara. Nihikhala-khale nihiyaka wuuliwa muru onooceelihaka oveka nikhalihero na asitokweene. Mwaha wa seeni? Okhala wiira Yehova ohaathanla asitokweene wiira ekanikhalihera olipiha waataana wihu nuuwo. Ndho vaavo ninaaveka nhu nikhalihero asitokweene, ninnoonihera ororomela mareheryo a Yehova ni omwiiwelela. Nitho ninnoonihera wiira ninnitthuna okhaliheriwa nuuwo wiira nihimore ni ohihiya opaka itthu dhooreera. (Esal. 94:18) Ndho akhala wiira noopaka etampi, nikhupali ni nrima wootheene wiira naaleela asitokweene ni nattharuwa, Yehova onoonilevelela.—Nsome Miruku 28:13.
10. Eseeni ekhanle onikhumelela akhala wiira ninaweehererya waavitha asitokweene itampi dhihu?
10 Okathi ninaaleela nhu asitokweene itampi nipanke nhu, Yehova pooti onilevelela ni otthikela waataana nuuwo. Masi akhala wiira khanimpaka elo, pooti otepiha nxankiho owo. Mwa ntakihero, okathi mwene Davidi eeherenrye iye ovitha itampi-dhe, elo yaahinkhumihera mixankiho nkhalelo wa omunepani, mmuupuweloni ni veerutthuni. (Esal. 32:3-5) Nkhama dhiidhaale ntthu onwereiwa aahiidho orina nikhwatta, nxankiho wa omunepani pooti wunnuwa akhala wiira khannilipihera ophuka mwaha owo. Masi Yehova khantthuna wiira elo enikhumelele, tivondho owo onninilaleya ‘ovaanela nuuwo’ nirumeelaka mareheryo opanke iye wiira nitthikele okhala axirikha-ye.—Yes. 1:5, 6, 18.
11. Akhala wiira ninoovitha etampi yuulupale nipanke nhu, seeni ekhanle waakhumelela atthu akina?
11 Akhala wiira ninoovitha etampi yuulupale nipanke nhu, elo pooti waakhumihera mixankiho atthu akina. Nitho elo pooti wiiriha munepa wa Muluku ohiya okhalihera muloko ni ohonona nrettele wa anna ni arokora. (aEefe. 4:30) Mwa enamuna emodharu, nadhuwela wiira ntthu mmodha mmulokoni oopaka etampi yuulupale, nihaana ontumererya waaleele asitokweene mwaha owo.a Masi akhala wiira ninoovitha etampi opanke iye ninookhalana nlattu ohoolo wa Yehova. (Onam. 5:1) Tivondho ompheta wihu Yehova ohaana onitumererya waaleela asitokweene etampi opanke iye. Vaavo nimpaka nhu elo, ninnikhalihera muloko okhala opuro wawaarya ni ninnikhalihera ntthu opanke etampi otthikela okhalana waataana wooreera ni Yehova.
ASITOKWEENE ANNIKHALIHERA DHAI?
12. Asitokweene anaakhalihera dhai ale ahilipe mwa omunepani?
12 Biibiliya onlotta wiira asitokweene ahaana waakhalihera ale ahilipe mwa omunepani. (1 aTes. 5:14) Akhala wiira moopaka etampi yuulupale, awo pooti woopakelani makoho wiira ‘ekumihere ota’ muupuwelo nnyu ni moopora nnoonela nnyu mwaha owo. (Mir. 20:5) Nyuwo nnoowerya waakhalihera asitokweene nlottaka mootaphuwa voohima dha etthu ekhumelenle, hata ohikwehaka opaka elo mwaha wa yoolema ya elapo nnyu, nkhalelo nnyu aahiidho owuulihakani muru. Nhoovelele opaka elo muupuwelaka wiira nnoolotta moolumo ‘oololo.’ (Yobi 6:3) Ohiya waakuvela woophukelani, asitokweene anawiilipihera woowiriyanani ni ephoole wiira edhuwele itthu dhootheene voohima dha mwaha owo ehinaatthi woovaha miruku dha mbiibiliyani. (Mir. 18:13) Asitokweene annidhuwela wiira onnivira okathi wawaatta wiira enkhalihere ntthu opanke etampi yuulupale. Tivondho woonawene awo pooti othukumana ni nuuwo ivaara dhawaatta wiira yoovaheni nikhalihero munramela nnyu.
13. Mavekelo asitokweene ampaka awa ni malakihero a mbiibiliyani annivaha awa, annikhalihera dhai? (Moone-tho ifootu.)
13 Mwawiitthana asitokweene, awo anawookhaliherani ohitepa wiivaha nthowa mwaha wa etthu mpanke nnyu. Ohiya-vo, awo anoovekela vamodha ni nyuwo. Woonawene nnootikiniheya nuumala woona ‘owerya wuulupale’ wa mavekelo awo. Nitho nikhalihero na asitokweene, ninhela mpuwa ‘woottikitthelani makhura mwa ndhina na Yehova.’ (Yak. 5:14-16) “Makhura” awo antaphulela ekhweeli eri Nuulumo na Muluku. Okathi owo, asitokweene anawoolipihani ni woomaalihani erumeelaka dhawaatikhiwa dha mbiibiliyani dheidho dhin’ya wookhaliherani otthikela okhalana waataana ni Yehova. (Yes. 57:18) Malakihero a mbiibiliyani anna awo anoovahawani, anoowerya olipiha yoolakela nnyu ya ohihiya opaka itthu dhooreera. Asitokweene anoowerya wookhaliherani omwiiwa Yehova airaka: ‘Ephuro yooreera ti ela. Ntthare yeela.’—Yes. 30:21.
Asitokweene anninrumeela Biibiliya wiira yaamaalihe ni waalipihe ale anwereiwa nkhalelo wa omunepani (Moone ettima 13-14)
14. Moovarihana ni aGalasia 6:1, asitokweene aninkhalihera dhai ntthu opacenre ‘weetta ephuro yootakhala’? (Moone-tho ifootu.)
14 Munsome aGalasia 6:1. Okathi nkiristau ompacera iye ‘weetta ephuro yootakhala,’ elo enoonihera wiira ohiya otthara malamulo axariya a Yehova. Opacera weetta ephuro yootakhala, pooti otaphulela opaka yoothanla yoohiloka aahiidho etampi yuulupale. Tivondho opheta onniwiiriha asitokweene makiristau ‘ontthikihera ntthu owo ephuro yooreera, mooreera nrima.’ Nuulumo na ekereku nirumeeliwe nva nawi ‘otthikihera’ pooti olika ni nteko meetiku onvara wiira atthikihera nikhuva ninten’ye opuro naari awa wiira ntthu owo ahirakale. Nkhama dhiidhaale meetiku oniilipihera iye otthikihera nikuva opuro naari awa ahaacerenre owereya ntthu owo onoona iye, asitokweene anniilipihera onkhalihera ntthu openuwa nkhalelo wa omunepani ehaacerenre owereya onoona iye. Nitho Biibiliya olotta wiira asitokweene ahaana ‘wiikasoopa’. Vaavo asitokweene annikhalihera awa ntthu otthikela weetta ephuro yooreera, annidhuwela wiira veena toohimalela ni annivonya. Ndho elo ennaakhalihera oxaka woonihera wiira tooloka onxira ntthu aninkhalihera awa, ekhalaka awiiyeviha ni oothunku.—1 Ped. 3:8.
15. Eseeni ninreerela nhu opaka okathi nintthuna nhu okhaliheriwa?
15 Hiyo nihaana waaroromela asitokweene a muloko nhu. Awo aahudhihiwa ovitha ixiiri, ovaha miruku dha mbiibiliyani ohiya miyoonelo-dha, ni onikhalihera vaavo dhinniphwanya awa mixankiho. (Mir. 11:13; aGal. 6:2) Nnaamwi asitokweene erina makhalelo ni edhuwelaka itthu dhoovirikana, nihaana okhala ootaphuwa olotta ni khuta ntokweene okathi nintthuna nhu okhaliheriwa. Ekhweeli wiira khaninrowa waavekela miruku asitokweene oovirikana nilipelelaka mmodha onivaha miruku dhikhanle onidhivela owiriyana. Napaka elo, nirowa olikana ni ale antthuna ‘oleeliwa itthu antthuna awa wiiwa’ ohiya otthuna odhuwela ‘dhoohudhiha dhooreera’ dha nuulumo na Muluku. (2 Tim. 4:3) Okathi nininleela nhu ntokweene mmodha nxankiho nhu, woonawene owo pooti onikoha akhala wiira noolotta ni asitokweene akina voohima dha mwaha owo ni miruku seeni anivanhe awa. Ohiya-vo, mwa wiiyeviha, owo pooti onvekela miruku ntokweene nkina.—Mir. 13:10.
NRITTI WA KHUTA MMODHA A HIYO
16. Nritti seeni khuta mmodha a hiyo oriiyena?
16 Nnaamwi asitokweene enikhapeleka nkhama ipwittipwitthi dha Muluku, awo khannipakela dhoothanla. Khuta mmodha a hiyo ookhalana nritti wa woonihera wiira onnikhala moovarihana ni wiivahererya-we. Nitho ninawaakhula ohoolo wa Muluku voohima dha itthu ninlotta nhu ni nimpaka nhu. (aRoma 14:12) Nikhaliheriwaka nuuwo, ninoowerya opaka dhoothanla dha miruku ni ohihiya okhala oororomeleya. Ndho ohiya asitokweene onipakela yoothanla, awo anninikhalihera wiiwasasa moopora Yehova onoonela iye mwaha owo wiira nipake yoothanla nhu. Vaavo ninuupuwela nhu ni ovarihela nteko miruku dha mbiibiliyani asitokweene annivaha awa, ninnihudha onroromela Yehova ni opaka dhoothanla dha miruku.—aHeb. 5:14.
17. Yoolakela seeni ninreerela nhu okhalana?
17 Eparakha yuulupale okhala ipwittipwitthi dha Yehova! Yehova oonruma ‘makampusi ooreera nrima’, Yeesu, wiira alive yawoopola yeelo ennivaha eparakha ya ophwanya ekumi yoohimala. (Yohani 10:11) Nitho Yehova oonivaha asitokweene a mmulokoni yaawo annikhapelela nkhama aalaihenre iye airaka: ‘Kinawaathanla amakampusi nnyu kinaadhuwela aka ookiwelela: yaawo antthuna oweettihani mwaakhili.’ (Yer. 3:15) Vaavo ninoona nhu wiira noottettheya aahiidho nanretta nkhalelo wa omunepani, nihoovelele owiitthana asitokweene wiira enikhalihere. Ootheene nhu nikhalena yoolakela ya ohihiye ottottela nreerelo mareheryo a Yehova, nenno nri nikhalihero na asitokweene a mmulokoni.
NCIPO 31 Neetteke ni Muluku!
a Akhala wiira moonvaha okathi ntthu owo wiira aaleele asitokweene etampi opanke iye, masi ahipaka elo, nhaana woonihera ororomeleya wa Yehova mwaaleelaka asitokweene itthu dhootheene mundhuwela voohima dha mwaha owo.