1925​​—Iyaakha 100 Dhivinre Ottuli

KHIYAAIRANEN’YE ETTHU YAALIPELELA AWA

Mwaakha wa 1925 Anamansoma Biibiliya awaatta yaalipelela wiira elapo yaaya okhala Eparayiisu. Eseeni yaawiiriha wuupuwela dhiidho? Munna Albert Schroeder yoowo orumeenle nkhama munna a Nikhuru Noolamulela, otthokihenre wiira: “Hiyo nuupuwela wiira mwaakha wa 1925 makiristau awoottihiwa yaahanle valaponi yaankusiwa para wiirimu wiira yiirele mphantta Omwene, ni wiira arumeyi oororomeleya a khalai nkhama Abrahaamu, Davidi ni akina yaanhihimusiwa wiira ekhale makhulupale wiira yeettihe elapo yii relaka mphantta Omwene wa Muluku.” Masi nuumala elo ohiiraneya, anna akina yaahinyoonyiheya.—Mir. 13:12.

Hata eri dhiidho, Anamansoma Biibiliya awaatta khiyaahin’ye oluttuweliwa ovara nteko woolaleerya. Awo yaanoonihera okathi wootheene wiira yaahikhalana nritti wa olaleya voohima dha Yehova. Mwa ntakihero, nirowe noone moopora awo yaanrumeenle awa raadiyu wiira yaalaleerye ekhweeli atthu awaatta.

WAACEREREYA WA MAPURO YAARUMIHIWA ARAADIYU

Mwaha wa okhumela saana raadiyu efrekwensiya WBBR mwaakha wa 1924, Anamansoma Biibiliya yaahipaka opuro nkina aaya akarumihiwavo raadiyu muulupale ekwaha ela waattamela oChicago, oIllinois. Esiikala ya efrekwensiya ela epheya yaari WORD. Ralph Leffler, yoowo aari nxinyeeru a raadiyu ni aakhalihenre otekiwa opuro ole mpheya, olontte wiira: “Khuta ohiyu wa okathi wooriirya, raadiyu WORD aaniruma mpakha ophiya mapuro oottaivela. Mwa ntakihero, emudhi emodha yaakhala oPilot Station, wAlasca opuro yoowo waattaivenle 5.000 kiloometru, yaahiwerya omwiiwa raadiyu ola okathi aapacenre iye orumihiwa. Nuumala, emudhi ele yaahaatikha ewarakha exukhurelaka eprokaraama ele ya omunepani yoophara nrima.

Elottaka voohima dha mwaattelo wa atthu yaamwiiwa raadiyu ole, ereviista ya Torre de Vigia ya 1.º a Dezembro a 1925 enlotta wiira: “WORD oniirela mphantta ekhurupu ya araadiyu uulupale a wEstados Unidos okhala wiira ookhalana 5.000 watts. Onniweryaneya omwiiwa raadiyu ola ilaatu dhootheene dha wEstados Unidos, osuuli oCuba ni laatu a onoorti wAlasca. Atthu awaatta yahaatanke wiiwa ekhweeli yaahoonihera odhiveliwa nuumala wiiwa itthu dhawaatta irumihiwaka nraadiyuni.”

Okathi omodharu, Anamansoma Biibiliya a oCanadá yaaira yiilipiheraka wiira enkhumihere raadiyu nkina yaaya awa onrumeela yalaleeryaka. Mwaakha wa 1924, waahitekiwa opuro nkina wa raadiyu aaitthaniwa CHUC oSaskatoon, oSaskatchewa. Ola aari raadiyu oopacera okhumiheriwa oCanadá ni yoolakela ya olaleya miyaha dha etiini. Mwaakha wa 1925, waanitthuneya okoca opuro nkina muulupale para raadiyu ola. Tivondho, ntthenkeso waahithuma opuro wooniwavo esileema oSaskatoon, ndho nuumala okociheriwa estudiyu ya CHUC yaahithamiheriwa opuro owo.

Raadiyu ola aahaakhalihera atthu yaakhala mittetthe dhihaakhaliwa ni atthu awatta wiiwa ihapari dhooreera ekwaha yoopacera. Mwa ntakihero, nthiyana mmodha aaitthaniwa Graham aakhala esitati ekhaani, aahiwiriyana eprokaraama emodha yaarumihiwe ni aahaatikha ewarakha avekaka iliivuru dhinintthokihera Biibiliya. Munna George Naish onlotta wiira: “Naahoona wiira nthiyana ola aanitthuna okhaliheriwa, tivondho naahimwinviyarela ivulume dhootheene dha eliivuru Estudos das Escrituras.” Nuuvira okathi vakhaani, Graham aahipacera olaleya ihapari dha Omwene mapuro makina oottaivela.

WIIWASASA WA NAANAANO

Ereviista ya Torre de Vigia ya 1.º a Março a 1925 yaahilaleya mwaha mmodha waarina muru onlotta wiira “Okhumelela wa Nloko Nipheya.” Seeni mwaha ola waari awa wootepa otthuneya? Mwa okathi vakhaani, Anamansoma Biibiliya yaahidhuwela wiira Satana aahikhalana ntthenkeso-ye wiirimu, yoowo oniirela mphantta malaikha ootakhala, ni nkinaku valaponi, yoowo oniirela mphantta itiini dhawootha, ntthenkeso wa nakoso ni wa epoliitika. Masi ni mwaha ola waakhumiheriwe, ‘nrumeyi oororomeleya ni aakhili’ aahaakhalihera anna wiiwasasa wiira Yehova ookhalana-tho ntthenkeso-ye, ni wiira ntthenkeso owo onniittana ni ntthenkeso wa Satana ni wiira mitthenkeso idho miili ti dhoovirikana vawaatta. (Math. 24:45) Ohiya-vo, nrumeyi oororomeleya aahitthokihera wiira Omwene wa Muluku waahipacera olamulela mwaakha wa 1914. Ndho “yaahikhumelela ekhotto wiirimu”, Satana vamodha ni minepa dhootakhala, aahiriheliwa valaponi ni khaatthikenle-tho wiirimu.—Wiis. 12:7-9.

Atthu akina wanaavila okhupali wiiwasasa nno wa naanaano. Ndho okhala wiira nrumeyi oororomeleya aahidhuwela wiira elo yaamwiiraneya, ephantte emodha ya mwaha owo waakhumiheriwe yaalontte wiira: “Akhala wiira ntthu mmodha onsoma ereviista ya Torre de Vigia khankhupali moolumo atthokiheriwe ni mwaha ola, ninnintumererya wiira aalipelele Apwiya moomaaleleya ni ororomela, avikanihaka okhalana nrima wooloka.”

Tom Eyre, yoowo aari koloporotoore (olelo ondhuweliwa okhala piyoneeru) a oGrã-Bretanha oolotta moopora Anamansoma Biibiliya awaatta yoonenla awa nuumala osoma mwaha ole: “Anna yaahihakalala vawaatta ni moopora yaatthokiheriwa awa eliivuru ya Wiisupulula 12. Okathi naiwasanse nhu wiira Omwene waahipacera olamulela wiirimu, hiyo naahitteeliwa nrima ni naahipacera waalaleerya atthu akina ihapari idho dhooreera. Elo yaahinivaha ikuru wiira naacerere nteko nhu woolaleerya ni yaahinikhalihera woona wiira Yehova mweekhweeli aaneettiha nloko-ne wiira niiwasase dhawiiraneya dhikina dha nhoolo.”

NRITTI WA OVAHA ONAMOONA VOOHIMA DHA YEHOVA

Olelo-va Anamoona a Yehova annidhuwela saana moolumo a Yesaya 43:10, yaawo anlotta wiira: “Vano Anamon’ aka ti nyuwo, anihimya t’Apwiya [Yehova], Miyo kihothanlani nyuwo arumeyi aka.” Masi, ohinaakuve ophiya mwaakha wa 1925, yawaatikhiwa ela khiyaaromoliwa ni iliivuru dhihu. Masi nuuvira okathi vakhaani, yaankhumelela marukunuso. Mwaakha wa 1925, yawaatikhiwa ya Yesaya 43:10 ni 12 yaahithokoreriwa ni ireviista 11 dha Torre de Vigia!

Wookhiderani wa mwaakha wa 1925, Anamansoma Biibiliya a wEstados Unidos yaahithukumana wiira emwiire konkereesu wIndianápolis, wIndiana. Mpuwa wa eprokaraama ya konkereesu, yaahikhalamo moolumo a munna Rutherford yawaakhela atthu ootheene, yaawo yaalotta wiira: “Hiyo nihuura konkereesu ola wiira . . . nilipihiwe ni Apwiya ni wiira nitthikele olaleerya ni ikuru dhawaatta, oolikana ene wiira nikhale anamoona-ye.” Mpuwa wa mahiku 8 a konkereesu ole, atthu yaaruule yaahitumereriwa ottottela nreerelo iparakha dhootheene wiira evahe onamoona voohima dha Yehova.

Saabadu, 29 a Agosto, munnna Rutherford aahilotta mwaha waarina muru oni: “Wiitthaneliwa Ovara Nteko.” Nitho mwaha ola, owo aahittittimihera otthuneya-wa nteko woolaleerya, alottaka wiira: “Yehova ohaaleela atthu-ye wiira. . . : ‘Anamon’ aka ti nyuwo. . . ni miyo pahi ti Muluku.’ Ni owo onnoovahani malakihero ooluluwanya ni ndhu nawiiweya airaka: ‘Koowemesera ethoonyero atthu a nlaponi.’ Ni khiyaavo ekhurupu ekina valaponi keemesenraaka ethoonyero ya waalopola atthu ehikhanle [atthu-ye], yaawo arina munepa wa Apwiya, ni ari anamoona-ye.”—Yes. 43:12; 62:10.

Nuumala mwaha ole, Munna Rutherford aahisoma ewarakha ekhaani yaarina muru oni: “Nhupi Onvaha Nlipelelo.” Atthu ootheene yawiiriyana yaahaakhulela mwawiiraana moolumo yaalotta wiira Omwene wa Muluku pahi tonvaha nlipelelo na waakhela “mareeliho a nrettele, opuha, ekumi, otaphuwa ni ohakalala woohimala.” Nhoolo-mwa moolumo a ewarakha ela yaahikhumiheriwa nkhama efolyetu ni yaahitaphuleliwa para ilottelo dhawaatta. Dhaahikaiwa ikoopiya idho imilyawu dhaaphiyera 40.

Waahivira okathi wawaatta Anamansoma Biibiliya ehikhunse ndhina nawi “Anamoona a Yehova.” Masi awo yaanidhuwela wiira yaahikhalana nritti wa ovaha onamoona voohima dha Yehova.

OTTHIKELA OSEKURIWA ATTHU YOONIHENRE ODHIVELIWA

Vaavo nummeru na Anamansoma Biibiliya naacerereya awa moolumwinkuni mootheene, yaanitepa-tho otumereriwa awo otthikela waasekurya atthu yaale yoonihera odhiveliwa ni ihapari dhooreera. Nuumala ekampanya ya okaiwa efolyetu Nhupi Onvaha Nlipelelo, aahikhumiheriwa Boletima aalotta wiira: “Atthu etthikele waasekurya atthu yaale yaakhenle efolyetu Nhupi Onvaha Nlipelelo.”

Boletim a Janeiro a mwaakha wa 1925 aahiruuha yawiiraneya ya Namansoma Biibiliya mmodha a esitati ya oPlano, oTexas yaalotta wiira: “Ninnihakalala woona wiira mittetthe dheidhe ilaleeriwe ivaara dhawaatta dhinnikhumihera mireerelo dhawaatta oxira idhe inimpaceriwaru olaleeriwa. Esitati nhu yoolaleeriwa ikwaha 5 mwa miyaakha idha 10 dhinvira. . . . Mahiku vakhaani ottuli, nrokora Hendrix ni amma aatthikela osekurya esitati ela ni aakawa iliivuru dhawaatta oxira khalai.”

Koloporotoore mmodha a oPanamá aatinkhe wiira: “Atthu akina yaakiikanre vankhora-va ekwaha yoopacera waasekurya, yaahimutari moonelo-ya ekwaha kaatthikenle aka waasekurya. Okathi wawaatta wa nteko aka woolaleerya mwaakha ola, kivirinhe kaasekuryaka atthu yaale kaatanka aka waasekurya, ndho elo ennikhumihera mareeliho oohakalaliha.”

ITTHU DHAALIPELELIWA NHOOLO

Ekaarta yavamwaakhani yaaroiheliwa makoloporotoore, munna Rutherford aahilotta vakhaani nteko wootheene waavariwe mwaakha yoole ni ole waaya ovariwa nhoolo-mwa. Owo aalontte wiira: “Khalai anna yaahikhalana eparakha ya waamaaliha atthu yaariipiwe nrima. Wiirela mphantta nteko ola waahiwiirihani ophwanya ohakalala wuulupale vanrimani . . . Mwaakha owo, atthu anookhalana eparakha ya ovaha onamoona voohima dha Muluku ni Omwene-ye, ni woonihera wiira mweekhweeli mwa arumeyi-ye. . . . Ootheene nhu ninoovikaniha onvuwiha Muluku nilaleeryaka ni onttottopela Mwene nhu.”

Wookhidherani wa mwaakha wa 1925, anna yaanipaka mareheryo wiira yaacereriwe eBeteeli ya oBrooklyn. Ndho mwaakha wa 1926, yaampacera eproxeetu yuulupale ya nteko wooteka ohinatake wiiriwa mmutthenkesoni miyaakha dhaavinre.