Opattusiwa wa Nlopwana ni Nthiyana Oopacera

Yehova ahipattusa Exardim yooreera yeelo yaithaniwa wEedeni. Exardim elo dhahikhalamo mittaikho dhawaatta, ifoloore, ni inama. Mottharelana Yehova ahivahula etthaya vakhani, ampatusa nlopwana oopacera, noomala-vo ahimundheelela mphulammwe. Nuumala munnidhuwela etthu yakhumelenle? Owo ahikhala nkumi! Ni Yehova ahintthuva ndhina na Adamu, ni ahinvaha eparakha ya otthuva inama dhootheene.

Nitho Yehova aahinleela Adamu wiira: ‘Nyuwo pooti oca mittaikho dhootheene iri Nxardim mmu, masi nttaikho ola wavameekhaya nhikhala-khale ncaaka. Mwacaru nnookhwa.’

Nuuvira okathi, Yehova aahupuwela ompattusa nthiyana wiira akankhalihera Adamu. Yehova aapanke dhai elo? Woopacerani Yehova aahimwiiriha Adamu orupa moomalela, moottharelana aahimeya niparari na Adamu ampakela mwaariye, yoowo aitthaniwa Eeva. Adamu ni Eeva ti yaari emudhi yoopacera. Niire Adamu aahihakalala nuumala omoona mwaariye? Owo ahihakalala vawaatta ni akalotta wiira: ‘Moone Yehova opaka etthu yooreera arumeelaka niparari naka! Mweekhweeli ola onlikana ni miyo.’

Yehova aahinleela Adamu ni Eva wiira yaayare anamwane ni edhale valaponi. Owo aatthuna wiira ekavara nteko vamodha moohakalala wiira yiirihe Elapo yootheene okhala eparayiisu, eparayiisu opuro wootepa ooreera nkhama yaara awa exardim ya wEedeni. Masi mpakha-va Elapo kahi eparayiisu. Mwaha awa eseeni? Nirowe noone.