Adamu ni Eeva Khiyaamwiiwelenle Muluku

Nihiku nimodha Eeva aari iye meekhe, yaahura enowa ekankoha wiira: ‘Ekhweeli wiira Muluku, atthu ohaakhottihera oca ifuruta dha mittaikho dhootheene dha nxardim?’ Eeva aahakhula wiira: ‘Ifuruta dha mittaikho dhootheene hiyo pooti oca, masi nikhottihiwe ifuruta dha nttaikho mmodha pahi. Yiiriwe naaca, ninookhwa.’ Satana aahimwaakhula wiira: ‘Naari, atthu kankhwa. Mweekheeli, Muluku orudhuwela wiira atthu yacaaru, an’ya ekalikana ni Veene.’ Niire Satana aalotta ekhweeli? Naari. Masi hata ori dhiidho Eeva aahikhupali wootha iwe. Vaavo Eeva aatepa iye olipela efuruta ele, antepa okhalana yoolakela ya otthuna oca. Ndho aahipacera oca ni aahinvaha Adamu ni owo ahuuca. Adamu ni Eeva yaahidhuwela wiira yaahimwiiwelele Muluku yankhwa. Masi ata ori dhiidho awo yahuuca efuruta ele.

Nihikuna neenne, Yehova ahinkoha Adamu ni Eeva nthowa nawiirinhe oca efuruta ya nttaikho ole. Eva ahakhula wiira: Enowa tekiirinhe oca. Ni Adamu ahilootta wiira: Eva tokiirinhe oca. Okhala wiira Adamu ni Eeva khiyaamwiwelenle Yehova, owo aahiwiikara-mo nxardim. Ndho, wiira Adamu ni Eeva ehitthikele nxardim, Yehova aahiphweha malaikha vankhora ni ekatana yaapatta mooro wiira atthu awo ehikhala-khale etthikelaka nxardim.

Yehova aahilotta wiira yoole omotonthe Eeva onoohukhummwa. Mweekhweeli khiyari enowa yaalontte ni Eeva, okhala wiira Yehova khapattunse enowa enwerya olotta. Masi nari nlaikha nootakhala nairinhe enowa ele olotta wiira emootothe Eeva. Nlaikha-na ninitthaniwa Satana, Diyaabu. Ni Yehova aahilotta wiira nhoolo-mwa onoompwetesa Satana wiira ahitthikele-tho owoototha atthu.