Kayiini Aahinnanariwela Nhima-ye

Nuumala Adamu ni Eeva wiikariwa oxardim ya wEedeni, awo yaahaayara anamwane awaatta. Mwana oopacera aitthaniwa Kayiini ni anaaili aitthaniwa Abeeli; Kayiini aari nlimi ni Abeeli aasukiha inama.

Nihiku nimodha awo yaahilakela onvaha etthu Yehova. Nyuwo munnidhuwela moopora atthu yaitthana awa dhoovaha idho? Mikuttho. Yehova aahihakalala vawaatta ni nkuttho wa Abeeli, masi kaahakalanle ni nkuttho wa Kayiini. Ndho elo yaahimwiriha Kayiini onanariwa vawaatta. Yehova aahoona elo ni aahinleela Kayiini wiira: Mwakhanyerera okhala dhiidho elo enoowiirihani opaka etthu yootakhala. Masi Kayiini khaaiwelenle nlopolo nne.

Ohiya-vo, Kayiini aahimwiirela Abeeli wiira: ‘Nkarowa nkiveleele omatta.’ Okathi yaara awa-dha meekhaya, Kayiini aahimwiipha nhima-ye. Mwaha awa elo Yehova aahiriipiwa nrima ni Kayiini. Tivondho Yehova aahimwiikarela ottaiwene wa emudhi-ye. Kayiini khaawenrye-tho otthikela owannye.

Etthu seeni ninhudhera nhu ni yawiiraneya ela? Ivaara dhikina itthu pooti ohiraneya nkhama naalipelela nhu, ndho elo pooti oniiriha onanariwa vawaatta. Akhala wiira nihoona wiira noopacera onanariwa aahiidho ntthu nkina anilopola voohima dha mwaha owo, nihaana ovaha ephoole miyuupuwelo dhihu. Akhala wiira khaninpaka elo, miyuupuwelo dhootakhala pooti winnuwa vanrimani vihu ni oniiriha opaka itthu dhootakhala.

Niire wiira Yehova oonliyala Abeeli? hata vakhaani. Abeeli aari ntthu ooreera nrima ni aanimpheta Yehova, tivondho Owo khankhala-khala anliyalaka. Moohakanyera okathi Elapo en’ya awa okhala eparayiisu Muluku onoonhihumusa Abeeli wiira atthikele okhala nkumi.