Ekalawa ya Nowe

Nuuvira okathi, Elapo yaahidhala atthu. Masi mooripiha nrima, atthu awaatta yaapaka itthu dhootakhala. Ata malaikha makina yaahipacera opaka itthu dhootakhala. Awo yaahithaama wiirimu era Elapo ya vathi yiitatusa opinaatamu. Nyuwo munnidhuwela etthu yaawiirinhe opaka elo? Okhala wiira awo yaatthuna waathela athiyana.

Malaikha awo ni adhaariya yaahayara anamwane. Anaahima awo yaari oovatta ni aikuru. Awo yaananyoonyiha ni waahadhula atthu mootakhala, ndho Yehova aahilakela omalamaliha itthu idho dhootheene. Owo aahaapwetesa atthu ootheene otakhala arumeelaka epula ya mutaaseke. Munnidhuwela mutaaseke esseni? Yaari epula yawaatta yaairinhe elapo yootheene opwina.

Masi aahikhala nloopwana mmodha aavirikanne ni atthu akina. Owo animpheta Yehova. Ndhina-ne aitthaniwa Nowe. Veene aahithela ni aahikhalana anamwane araru: Semi, Kami ni Yafeti. Anamwane awo yaahikhalana adhaariya. Ndho Yehova aatthuna omoopola Nowe vamodha ni emudhi-ye. Tivondho Yehova aahinleela Nowe wiira ateke ekalawa. Ekalawa elo yaaya okhala yuuluupale, yaaya otekiwa ni ithaapwa ni ekanttelema vadhulu wa maadhi. Nuuvenya Yehova aahinleela-tho Nowe wiira akuse inama avoleihe nkalawani wiira ihikhwe ni epula ya mutaaseke.

Moohilokela Nowe ni emudhiye yaahipacera oteka ekalawa. Awo yaahiteka ekalawa ele ettharaka malakihero Yehova aaleenle iye, ni yaahiviriha miyaakha 50 etekaka. Nowe ni emudhi-ye etekaka ekalawa dhiidhale yaanaalopola atthu voohima dha epula ya mutaaseke. Masi mooriipiha nrima khaavo anwiriyanne.

Ndho, waahiphiya okathi woovolowa nkalawani. Nirowe noone etthu yakhumelenle moottharelana.