Atthu 8 Yaahoopowa ni Yaahikhala Elapo Yooreera

Nowe, emudhi-ye ni inama yahivolowa nkalawani. Mottharelana Yehova aahiwala nkhora, ni epula yaahipacera orupa. Yaahirupa mpakha Elapo yootheene opwina ni ekalawa epacera otteelema. Ndho atthu ootheene ootakhala yahaavolonwe nkalawani yahukhwa. Masi Nowe ni emudhi-ye yaari ookhapeleleya nkalawani. Munniwerya wuupuwela moopora awo yaahakalanla awa mwaha wa omwiiwelela Yehova?

Yaahirupa epula mahiku 40 othana ni ohiyu, ni nuuvenya yaahimwarya. Ndho vakhani-vakhani maadhi ale yaahipacera oweleela. Tivondho ekalawa yahipata vadhulu va mwaako. Masi maadhi yaira ehinaweleele valaponi, ndho mwaha awa elo Nowe ni emudhi-ye yaanitthuneya olipelela vakhani eri nkalawani.

Vakhani-vakhani, maadhi yaahuma. Nowe ni emudhi-ye yaahiviriha mwaakha ntero eri nkalawani. Nuumala-vo Yehova aahaaleela wiira ekhume nkalawani. Ndho okathiya yoole waakhala nkhama yavolonwe elapo epheya, okhala wiira ottakhala wootheene wahimala valaponi. Nowe ni emudhi-ye yaahihakalala vawaatta mwaha awa woopoliwa ni Yehova, tivondho awo yanvanha awa nkuttho Yehova.

Yehova aahihakalala vawaatta ni nkuttho ole. Mwaha awa elo, Owo aahilaihera wiira khakhala-khala arumeelaka-tho epula ya mutaaseke wiira amalihe itthu valaponi. Yehova ahiiriha wiirimu okhumeleela ekhweyi yeelo yankhalihenre Nowe ni emudhi-ye ohiliyala yoolaiyera ele. Nyuwo mootaka woona ekhweyi? Okathi wootheene nnoona nnyu ekhumeleelaka elo, muupuwelele yoolaihera ya Yehova.

Noomala Yehova olootta yolaihera ela, aahinleela-tho Nowe ni emudhi-ye wiira: Yaayare anamwane edhaale valaponi.