Yooseefe ari mwaana ookhidhera oyariwa ni Yaakoobe ni aanimphetta vawaatta. Ndho mwaha awa elo adhuulupale-ye yaaninkhalela nrima ni yaninnyokha. Nihiku nimodha Yooseefe aahiloha etthu yootikiniha ni aahaaleela adhuulupale-ye, masi awo khiyaahakalanle ni yooloha ele. Awo yuupuwela wiira aatthuna okhala mwene-ya, ndho elo yaanitepa owiriha onkhalela nrima Yooseefe!

Nihiku nimodha, adhuulupale-ye Yooseefe esukihaka inama nttetthe woottaivela, Yaakoobe aahinvekela Yooseefe wiira arowe awoone akhala wiira yaari akumi. Okathi awo yaamoonna awa araaka, yaahipacera olootta wiira: ‘Mmoone namaloha ole, nirowe nimwiiphe!’ Nuumala Yooseefe ophiya adhuulupale-ye yaahimphara enrahela weehimeni yawisa. Okathi-ya yoole, yaaira eviraka alopwana yaawo yarowa wEexiitu. Ndho Yuuda muulupale a Yooseefe, aahilotta wiira: ‘Khontthuneya omwiipha, masi ninthumihe wiira akhale epottha.’ Awo yaahathumihera alopwana ale ni nsurukhu 20 wa eparatha.

Moottharelana, awo yaahiruweya nlayane mphomeni mwa emompe, akakhala nkhama aiphiwe ni inama, awo yaahikusa nlayanne enroihela Yaakoobe ni ekankoha wiira: ‘Nna kahi nlaya na Yooseefe?’ Yaakoobe aahiriipiwa nrima vawaatta uupuwelaka wiira Yooseefe aahuukhwa. Ni khaavo aawerya ommaaliha.

Nuumala ophiya wEexiitu, Yooseefe aahithumiheriwa nlopwana mmodha oovuwa aitthaniwa Potifaari nkhama epottha. Masi ata eri dhiidho Yehova khaahin’ye onkhalihera Yooseefe. Ni Potifaari aahoona wiira Yooseefe anivara saana miteko-dhe ni anireerela onrooromela. Nuuvira okathi vakhaani, Potifaari aahinhiyera Yooseefe wiira akakhapelela mireerelo-dhe.

Mwaara a Potifaari ahoona wiira Yooseefe ari nlopwana oovatta ni oophwaneliwa. Ndho mahiku ootheene aaninvekela wiira arupe ni veena. Etthu seeni Yooseefe apaka iye? Veene okathi wootheene aakhula wiira: ‘Naari! Nkintthuna, elo etthu yootthekeya. Nyuwo ntheliwe ni Potifaari ni owo okiroromenle miyo. Ndho akhala wiira kinoorupa ni nyuwo Yehova onoonanariwa vawaatta ni miyo!’

Nihiku nimodha, mwaara a Potifaari aahinkhanyereera Yooseefe wiira arupe ni veena. Aahiphara nlaya-ne, masi Yooseefe aahitthyawa. Noomala Potifaari othikela owaani, amwaariye yahimotherya Yooseefe wiira atthuna orupa ni veena. Ndho Potifaari aahinanariwa vawaatta ni ahintthukela Yooseefe nkateya. Masi Yehova khaanliyanle Yooseefe.

Yooseefe ari nkateya, Farawo mwene a Weexiitu aahiloha, ni khavo ntthu aawerya otaphulela yooloha ele. Masi nlopwana mmodha aahinleela Farawo wiira Yooseefe aanwerya otaphulela yooloha ele. Mwawaakuveya Farawo aahiruma oroweliwa Yooseefe nkateya.

Farawo aahinkoha Yooseefe wiira: ‘Nyuwo nnowerya otaphulela itthu kilonhaka?’ Yooseefe aahimwaakhula Farawo wiira: ‘Mpuwa wa miyakha 7 enooruweryiwa eyooca yawaatta Weexiitu, masi miyakha 7 dhin’ya ikattharelana enookhalawo etala yawaatta Weexiitu. Tivondho mmuthanle nlopwana a miruku wiira akapweha eyooca, wiira atthu ehikhwe etala.’ Seeni Yooseefe awenrya iye otaphuelela dhooloha idhe? Okhala wiira Yehova aaninkhalihera! Farawo aahinthanla Yooseefe wiira akapweha eyooca ni aahimwiiriha okhala nlopwana anaaili oteepa otthuneya a Weexiitu.

Mphuwa wa miyaakha 7 dhooruwerya, Yooseefe aahithukumanya eyooca. Nuumala-vo, dhaahiphiya iyakha dha etala nkhama Yooseefe aalontte iye. Etala elo yaahittepa waatta ndho atthu a ilapo dhootheene yaanirowa Weexiitu wiira yaatthume eyooca. Apaapa-ye Yooseefe, yaahiiwa wiira Weexiitu yaahikhalawo eyooca yawaatta; ndho yahaaruma ana 10 wiira yaathume eyooca Weexiitu.

Nuumala ophiya Weexiitu, awo yaahirowa olotta ni Yoossefe; Ndho, okhala wiira khiyaawenrye ondhuwela, yaahikokhora ohoolo-we. Masi Yooseefe aahadhuwela naanaanoru ni aahuupuwela etthu aalonhe-iye aari rapasi. Wiira adhuwele akhala wiira nanlelo adhuulupa-ye yaari otakhala nrima, Yooseefe ahaakoha wiira: ‘Atthu veena anamahottela? Muntthuna waattuphela atthu a Weexiitu.’ Awo yaahakhula wiira: ‘Naari! Hiyo ninkhala oKanaani. Ootheene nhu naari anamwane 12; mmodha ohuukwa, ni okhidhera oyaariwa ohanle owaani ni apaapa.’ Nuumala-vo Yooseefe aahaaleela wiira: ‘Atthu ekiruuhele nhima-ya yoowo ohale ni apaapa-ye wiira kikhupali wiira atthu veena kaahi anamahoottela.’ Ndho awo yaahitthikela owaani wiira yaaleele apaapa-ya.

Nuuvira okathi vaakhani, eyooca yahimala mwemudhini mwa Yaakoobe. Ndho, adhulupale-ye Yooseefe yaahitthikela Weexiitu wiira yaathume eyooca. Nkwaha ola yaahinkusa Benxamim, nhima-ya ookhidhera oyaariwa. Atthunaka odhuwela akhala wiira adhuulupa-ye yaahittharuwa, Yooseefe aahivitha ekoopho-ye ya eparatha mmurupani mwa Benxamim ni akawootherya wiira yaarawiiya. Okathi ananteko a Yooseefe yaaphwannya awa ekoopho ele nsaakhuni mwa Benxamim, adhuulupale-ye yaahoova vawaatta. Awo yaahinvekela Yooseefe yiiraka: ‘Safatali, nhinhukhumu Benxamim, masi nnihukhumu hiyo.’

Yooseefe ahoona wiira adhuulupale-ye yaahitharuwa. Ndho owo khawenrye ovilela. Ahipacera wunla vawaatta ni akaaleela wiira: ‘Miyo ka Yooseefe nhima nnyu. Apaapa nanlelo akumi?’ Adhuulupale-ye yaahixanka vawaatta. Wiira awoonihere wiira ahaalevelela aahaaleela wiira: ‘Atthu ehixanke, mwaha wa etthu yootakhala atthu yaakirenla awa. Muluku tokiruuhale opuro ola wiira atthu koopole ikumi-dha. Vano atthu erowe yaakuse apaapa ekiruuhele.’

Awo yaahitthikela owaani ni yaahaaleela ihapari idhe dhooreera apaapa-ya; motharelana emudhi yootheene yaahithaamela Weexiito. Ata dhaavinre miyaakha dhawaatta, Yooseefe ni apaapa-ye yaahitthikela okhala vamodha.