Mwa miyakha dhawaatta Yooxuuwa ahakhapelela atthu a Yehova, ni okhwiiye arina miyakha 110. Okathi Yooxuuwa ari iye nkumi, aIsarayeeli yaaninkokhorela Yehova. Masi noomala veene okhwa, aIsarayeeli yaahipacera waatakiha atthu a oKanaani, yakokhorelaka amuluku eetheru. Mwaha awa elo, Yehova aahihiya owaakihera aIsarayeeli okathi yaapacenra awa ohadhuliwa ni mwene mmodha aaitthaniwa Yaabini. Okathi ole, aIsarayeeli yaahinvekela Yehova wiira aakhalihere. Ndho Yehova aahinthanla nlopwana mmodha aitthaniwa Baraakhi, wiira aakhapelele ni wakhalihera opaka itthu dhooreera wiira etthikele onkokhorela Yehova.

Baraakhi aanitthuneya odhuwela etthu yoopaka, tivondho Yehova aahinleela porofeta Deebora wiira anleele Baraakhi wiira: ‘Mwathanle alopwana 10.000, ni nrowe mwakumane ni anakhotto a Yaabini mwene a oKisooni. Nin’ya okhala nihiku nenna mun’ya nnyu omwiipha Siisera, xeefi a anakhotto aYaabini.’ Baraakhi aahinleela Deebora wiira: ‘Miyo kinoorowa akhala wiira nyuwo nnoorowa ni miyo.’ Deebora aahaakhula wiira: ‘Vaareera, miyo kinoorowa ni nyuwo. Masi Yehova olontte wiira kahi nyuwo mun’ya omwiipha Siisera. Ookhala nthiyana mmodha on’ya opaka elo.’

Ndho Deebora, Baraakhi ni alopwana ale 10.000, yahirowa wiikocihera Omwaako Taburi wiira ewane ekhotto. Ndho okathi Siisera aiwala iye elo, aahaakusa anakhotto-ye oolipa ni ikaaro-dhe dha ekhotto akarowa owaniha. Noomala-vo owo aahirowa okumana ni aIsarayeeli omwaako. Ndho noomala Deebora omoona, aahinleela Baraakhi wiira: ‘Olelo nihuku Yehova on’ya iye wovahereryani awanani nnyu.’ Baraakhi ni alopwana ale 10.000 yaahikhuruwa vamwaako etthimakaka wiira yaamoone Siisera vamodha ni anakhotto-ye.

Okathi-ya yoole, Yehova aahiiriha nratthi Kisoni odhaala. Ikaaro dhootheene dha Siisera dha ekhotto dhahipwapwa. Ndho Baraakhi ni anakhotto-ye yaahaawerya anakhotto a Siisera; masi Siisera aahitupha nkaaroni-mwe atthyawa! Noomala otthyawa aahirowa nheemani ya nthiyana mmodha aitthaniwa Yayeeli aipitha mommo. Ndho Yayeeli aahinvaha Siisera eleite wiira awurye; ndho okathi Siisera aampantha iye, Yayeeli aahinkhunela ni ekupurtore. Ndho okhala wiira owo ahikhumuwa vawaatta aahirupa. Yayeeli aahimwattamela aitaka moomaaleleya ankhomela nttoro vamuru-ve.

Baraakhi aahirowa onkoca Siisera. Ndho Yayeeli aahikhuma ntentam-mwe akanleela Baraakhi wiira: ‘Nlopwana nninkoca nnyu tuula oriva.’ Baraakhi aahivolowa ntentani ya Yayeeli amphwanya Siisera akhwiye. Ndho Baraakhi ni Deebora yaahipacera omwiipela macipo Yehova enxukhurelaka mwahaawa wakhalihera waphwetesa awanani-ya. Noomala-vo aIsarayeeli yaahikhala miyakha 40 mwa nrettele.

Okathi Wisarayeeli yaakhumelenla-wa awo etaala, Noweemi ni emudhi-ye yootheene yaahithamela oMowaabi. Noovira okathi amamune Noweemi yaahuukhwa. Ane Noweemi oowaili yaahathela athiyana oMowaabi; mmodha aitthaniwa Ruuti ni nkina Oorpa. Mooripiha nrima, noovira okathi anaamwane ale yaahuukhwa.

Noomala Noweemi wiiwa wiira etaala yaahivukuwa Wisarayeeli, aahilakela otthikela elapo-ye. Ruuti ni Orpa yaahintthara. Masi yeettaka dhiidhaale, Noweemi aahaaleela wiira: ‘Atthu veena akireerela nrima miyo vamodha ni anaaka. Ndho kintthuna wiira atthu etthikele elapo-ya ni atthu etthikele otheliwa.’ Masi Ruuti aahaakhula wiira: ‘Hiyo ninnoophetani vawaatta nyuwo! Hiyo khanintthuna woohiyani.’ Noweemi ahaakhanyereera wiira etthike. Ndho Oorpa aahitthika, masi Ruuti aahintthara Noweemi. Noweemi aahinleela Ruuti wiira: ‘Oorpa ootthikela owannye, owo ohaatthikela atthu-ye ni amuluku-ye. Nyuwo-tho ntthike vamodha nuuwo ni nrowe waanaan’yari nnyu.’ Masi Ruuti aahaakhula wiira: ‘Miyo nkinoohiyani, atthu nnyu an’ya okhala atthu aka, ni Muluku nnyu onookhala Muluku aka.’

Ruuti ni Noweemi yaahiphiya Wisarayeeli. Ndho nihiku nimodha, Ruuti aahirowa ottottela ihalahala dha tiriku mmatta wa Bowaazi mwana a Rahaabi. Bowaazi aahiiwa elottiwaka voohima dha Ruuti wiira aanimpheta vawaatta Noweemi. Tivondho owo aahaaleela ananteko-ye wiira enhiye Ruuti akattottela ihalahala dhaahala ottuli.

Okathi Ruuti aaphin’ya iye owani ohiyu, Noweemi aahinkoha wiira: ‘Oleelo mwaavara ematta yawani?’ Ruuti aahaakhula wiira: ‘Kaavara mmatta wa nlopwana mmodha oniitthaniwa Bowaazi.’ Noweemi aahakhula wiira: ‘Bowaazi mmudhi aamamunaka, nhihiye ovara mmatta wa Bowaazi ni adhimwali akina. Wiira nyuwo nhitupheliwe.’

Ruuti aahivikaniha ovara nteko mmatta wa Bowaazi, mpakha atthu okapari ohepha. Bowaazi aahoona wiira Ruuti ari nthiyana oreera nrima ni oovara miteko. Ndho mwaha wa mikhalelo-dhe dhooreera Bowaazi aahinthela Ruuti, ni noovira okathi ahin’yarana mwana aaitthaniwa Obeedi, yoowo nhoolo-mwa ari pwaapu-ye Davidi. Axirikha-ye Noweemi yaahitteliwa nrima vawaatta. Ekalotta wiira: ‘Woopacerani Yehova ohoovahani Ruuti yoowo ookhapelenleni, ni nennava ohooyarelani ndhulinnyu. Ndho ninxukhurele Yehova mwaha wa itthu idha dhootheene.’