Noovira okathi vakhani, aIsarayeeli yaahitthikela wakokhorela amuluku eetheru. Mwaha awa elo, Yehova ahiwiriha atthu a oMadiyaani oviriha miyaakha 7 ewiiyeraka aIsarayeeli inama-dha ni itthu dhootheene dha mmatta. Wiira yaathyawe atthu a oMadiyaani, aIsarayeeli yaaniipitha ncukuni ni mmiyaakoni. Okathi ole, aIsarayeeli yahinvekela Yehova wiira awoopole. Ndho Yehova ahiruma Nlaikha orowa onleela rapasi mmodha aitthaniwa Gideyooni wiira: ‘Yehova ohoothanlani nyuwo wiira nwoopole aIsarayeeli.’ Gideyooni aahikoha nlaikha nne wiira: ‘Kin’ya owerya dhai opaka elo? Miyo kahi keetthwene.’

Gideyooni aaya owerya dhai odhuwela wiira mweekhweeli Yehova aahinthanla? Owo ahimeya marove ni apweha vatthayani yawuuma ni anvekela Yehova wiira: ‘Akhala wiira meelo ohihiyu marove ala anoovikaniha okhala makithi, kinookhupali wiira nyuwo mokithanla wiira kiwoopole aIsarayeeli.’ Mmeelom-mwa marove ale yaahivikaniha okhala makithi. Masi Gideyooni nanlelo aanitthuna yawoonihera ekina yaaya onkhupaliha wiira mweekhweeli Yehova aahinthanla. Tivondho, mmeelom-mwa aahinvekela-tho Yehova mwa enamuna yoovirikana, ekhwaha ela avekenle wiira etthaya yaarawa-vo marove ale edhale maadhi masi maroveya yuume! Ni tiyeelo yaairanen’ye. Ndho okathi Gideyooni onna iye ele, aahikhupali wiira mweekhweeli Yehova aahinthanla. Ndho aahathukumanya attoropa-ye wiira arowe awane ni atthu a oMadiyaani.

Yehova aahinleela Gideyooni wiira: ‘Miyo kinawaakhalihera aIsarayeeli okhumela saana. Masi nkintthuna wiira atthu yuupuwele wiira ahawerya awanani-ya ehikhaliheriwaka ni miyo. Tivondho, mwaaleele wiira ole onoova atthikele owani. Ndho alopwana amphiyera 22.000 yaahitthika.’ Alopwana yaahanle yaari 10.000 pahi. Yehova aahinleela-tho Gideyoni wiira: ‘Nanleelo moohalana anakhotto awaatta. Ndho, mwaakuse mwarweihe onratthini wiira yawurye maadhi. Ndho nhale ni ale an’ya owurya yiikocelaka.’ Alopwana 300 pahi tiyaapanke elo. Yehova aahilaihera wiira aanruumeela ekhurupu ele ekhaani wiira yaapwatese anakhotto amphiyera 135.000 a oMadiyaani.

Ohiyu-ya yoole, Yehova aahinleela Gideyooni wiira: ‘Woophiya okathi waawatuphela anakhotto a oMadiyaani!’ Gideyoni ahakawela anakhottoye malope ni mirinki dhuulupale dhaarina mitthuko dhapatta mooro ni aaleela wiira: ‘Atthu evahe ephoole etthu kin’yaka opaka, ni atthu veena epake etthu emodharu.’ Gideyooni ahoopa nlope ni ahipwesa nrinki, ahitthukhuleela nthuko odhulu, akalootta wiira: ‘Ekatana ya Yehova ni ya Gideyooni!’ Alopwana ootheene 300 yahipaka etthu emodharu. Atthu a oMadiyaani yaahoova vawaatta ni khuta ntthu ahipacera othyawela otthu onaiyewo. Okathi yathyawa-wa, yahipacera otuphelana yaworu. Yehova ahitthikela-tho wakhalihera aIsarayeeli waawerya awanani-ya.

Nlopwana mmodha a wIsarayeeli aitthaniwa Elikaana ahaathela athiyana aili, mmodha aitthaniwa Aana nkina aitthaniwa Peniina, masi ampheta iye vawaatta ari Aana. Peniina ahikhalana anaamwane awaatta, masi Aana khaayara. Ndho mwaha wa elo, okathi wootheene Peniina aanintheya Aana mwaha wa ohiyara. Khuta mwaakha, Elikaana aanikusa emudhi-ye yootheene erowaka oSilo, weiwo yari awawo eTabernaakulu wiira yaankokhorele Yehova. Okathi omodha yaari awa oSilo, Elikaana ahimoona Aana ariipiwe nrima anlaka, ndho owo aahixanka ni aahirowa ommaaliha ni anleela wiira: ‘Miyo kinnoophetani.’

Aana anlaka dhiidhaale, noovira okathi vakhaani ahivenya arowa oTabernaakulu. Hata ahaawerya omaala mwaha wa nxankiho-ye, owo ahiilipihera onvekela Yehova wiira ankhalihere, Aana aahivekela airaka: ‘Yehova, akhala wiira nnookivaha mwaana, kinnoolaiherani wiira kinawoovahani mwaana owo wiira akoorumeelani oTabernaakulu ekumi-ye yootheene.’

Nkhuluupale aanankutho Eli khaadhuwenle wiira Aana aanvekela, owo uupuwela wiira aaruhapaliwa. Ndho Aana aahinleela Eli wiira: ‘Naari pwiyaka nkihapaliwe, miyo kinviriha nxankiho muulupale, tivondho kireenle onvekela Yehova.’ Eli ahoona wiira ahittheka, ndho aahinleela Aana wiira: Yehova ovaheni ele munvekenle nnyu.’ Mwaha wa moolumo ale a Eli, Aana ahirowa owaani ahakalanle. Noovira okathi vakhani, Aana aahinʼyara mwaana yoowo aitthaniwa Samuweeli. Moohaakanyera, Aana ahitteeliwa nrima vawaatta, Khannaamini?

Aana khaaliyanle etthu aanlaihenre iye Yehova. Noomala Samuweeli ohiya waamwa, Aana aahinroiha oTabernaakulu amunnya Eli ni ankoha wiira: ‘Munnuupuwela wiira kaataka onvekela etthu Yehova? Owo ohiiwa nivekelo naaka, ni okivaha mwaana ola, ndho kininhiya vaava wiira anrumeele Yehova ekumi-ye yootheene.’ Elikaana ni Aana khuta mwaakha yaanirowa oTabernaakulu onsekurya Samuweeli, yaarowaka yaanikusa malaya mapheya wiira yaanvahe. Nhoolo-mwa Yehova ahinvaha Aana anamwane 5, alopwana araaru ni athiyana aiili.