Atthu awIsarayeeli yaahihiya-tho onkokhorela Yehova, ekaakokhorela amuluku eetheru. Masi amuluku awo, khiyawaakinhe okathi atthu a wAamoni yaarule awa owana ni awo. aIsarayeeli yahiviriha miyaakha dhawaatta ehaawaka. Masi nihiku nimodha yaahinvekela Yehova yiiraka: ‘Nihootthekelani, Safatali Yehova nnikhalihere.’ Noomala-vo awo yaahimalamaliha ilatarato dhootheene yakokhorela awa ni etthikela onkokhorela Yehova. Ndho Yehova ahaakhalihera.

Wiira aIsarayeeli ewerye waapwetesa awanani-ya, yaahinthanla nakhotto mmodha aitthaniwa Yefite wiira akhale nhooleli-ya. Masi Yefite ahinaakuve orowa okhottoni aahinlaihera Yehova wiira: ‘Mwanikhalihera waapwetesa awanani nhu okhottoni, kinnolaiherani wiira noomala otthikela owaani, ntthu yoole on’ya opacera okhuma mpaani akitthapelaka, kinawovahereryani wiira akorumeelani oTabernaakulu ekumi-ye yootheene.’ Tivondho ekhaliheriwaka ni Yehova aIsarayeeli yaahapwetesa awanani-ya.

Noomala Yefite otthikela owaani, ntthu oopacera okhuma mpaani ari mwaane. Owo aakhumme ainaka ni oopaka malapa. Mwawaakuveya Yefite ahuupuwela etthu aanlaihenre iye Yehova ni aahiripiwa nrima, okhala wiira aarina mwaana mmodha. Ndho etthu seeni Yefite aareerela iye opaka? Moolipa nrima Yefite aahinleela mwaane wiira: ‘Oo mwaanaka, yookhala etthu kinlaihenre aka Yehova! Ndho mwaha wa elo kihaana wooroihani oSilo wiira mwakanrumeela oTabernaakulu.’ Owo ahaakhula wiira: ‘Paapa, akhala wiira tiyeelo munlaihenre nnyu Yehova, nyuwo nhaana waakhwanihera. Masi kihinaakuve oroowa nkihiye tooko kavirihe miyeeri miili omwaako ni axirikha aka.’ Mwaana a Yefite aahirowa orumeela oTabernaakulu ekumi-ye yootheene. Ndho khuta mwaakha, axirikha-ye yaanirowa onsekurya.

Nankuttho muulupale Eli aahikhalana anamwane aili yaarumeela oTabernaakulu. Madhina-ya yaari Hofini ni Pineha. Awo khiyaamwiwelela Yehova ni yaanahadhula atthu. Okathi aIsarayeeli yaaruha awa dhoovaha-dha oTabernaakulu, Hofini ni Pineha yaanikusa iphantte dhootepa ooreera dha dhoovaha idho. Eli aahidhuwela itthu ane yaapaka awa, masi owo khaapanke hata etthu. Yehova onenle dhai?

Samuweeli aari rapasi nkhani onxira Hofini ni Pineha, ata anaahima waadhivelaka waatakiha atthu uulupale, Samuweeli khantakinhe Hofini ni Pineha. Okathi Yehova onne iye elo, owo ahihakalala vawaatta ni Samuweeli. Nihiku nimodha ohiyu arupaka, Samuweeli aahiwa ndhu nimwiitthanaka. Ndho owo ahivenya, atthimakela opuro aariwo Eli, ni alootta wiira: ‘Miyo va!’ Masi Eli aalontte wiira: ‘Miyo nkiwiitthanneni. Nrowe mwarupe.’ Elo yaahiraneya ivaara tthaaru, ndho evaara ya neeraru yaairanen’ya-wa, Eli aahoona wiira ari Yehova aatthuna olootta ni Samuweeli. Ndho Eli aahinleela Samuweeli wiira: Mwatthikela wiiwa mwitthaniwaka, mwakhule wiira: ‘Yehova pooti olootta, kinniiwa.’

Okathi Samuweeli atthikenle iye wumpathi, ahiwa-tho ndhu nne niiraka: ‘Samuweeli! Samuweeli!’ Owo ahaakhula wiira: ‘Pooti olootta, nrume-yi nnyu onniwiiwani.’ Ndho Yehova aahinleela Samuweeli wiira: ‘Mmuleele Eli wiira kinoonhukhumu vamodha ni atthu a ettheko-ye. Okhala wiira veene odhuwela itthu dhootakhala Hofini ni Pineha ampaka-wa, masi veene khampaka etthu.’ Mmelommwa ohihiyu, Samuweeli ahivenya wiira arowe ahule mikhora dha oTabernaakulu, nkhama alamalenle iye. Samuweeli aanoova onleela Eli itthu aleeliwe iye ni Yehova. Masi Eli ahinvekela wiira aanleele, ndho Samuweeli aahinleela Eli itthu dhootheene aleeliwe iye ni Yehova.

Okathi Samuweeli atepa iye wuunnuwa, Yehova anivikaniha okhala nxirikha-ye. Atthu ootheene a wIsarayeeli yaahidhuwela wiira Yehova aahinthanla Samuweeli wiira akhale profeeta ni namaphuka.