Noovira okathi vakhaani Yehova aahinleela Samuweeli wiira: ‘Nrowe owannye Yeese mwanthanle mwane mmodha wiira akhale mwene a wIsarayeeli.’ Noomala Samuweli ophiya aahimoona mwaana oopacera oyariwa a Yeese ni akuupuwela wiira ari yoowo aathanliwe. Masi Yehova aahinleela wiira: ‘Kahi yoowo kinthanlalaka, miyo nkintthara oreera wa ntthu masi kintthara nrima.’

Noomala-vo Yeese aahinruuhela Samuweeli ane akina 6. Masi Yehova khaanthanlale hata mmodha a yawo. Ndho Samuweeli aahinkoha Yeese akhala wiira okhalana anamwane akina. Yeese aahakhula wiira: ‘Kookhalana mmodha ookhidhera oyariwa, onciha iputthiputthi. Ndho Yeese ahiruma wiira arowe aitthaniwe Davidi.’ Noomala Davidi ophiya, Yehova aahinleela Samuweli wiira: ‘Ti yoowo kinthanlalaka!’ Samuweli aahiitthela makhura vamuru wa Davidi, yooniheraka wiira Yehova ahintthanla wiira akhale mwene nhoolo a wIsarayeeli.

Noovira okathi vakhani, aFiliisti yaahuura wiira ewane ni Anaisarayeeli, awo yahikhalana nakhotto mmodha oottaiva yoowo aaitthaniwa Goliyathi. Mahiku ootheene, owo anaruwana Aisarayeeli airaka: ‘Nkinkhupali wiira onookhumelela ntthu on’ya owana ni miyo. Akhala wiira onookhumelela ni akiwerya, hiyo ninookhala atthu ipottha-dha. Masi akhala wiira miyo kinoonwerya, atthu anookhala ipottha dhihu.’

Nihiku nimodha Davidi aahikusa eyooca wiira aavahe adhuulupale-ye yawo yaari okhottoni. Noomala Davidi ophiya, aahimwiiwa Goliyathi aaruwanaka aIsarayeeli. Ndho, Davidi aahilotta wiira: ‘Miyo kinoowanana.’ Masi Sawuli aahinleela wiira khareerela opaka elo okhala wiira ari mwana nkhaani. Davidi aahakhula wiira: ‘Yehova onookikhalihera.’

Noomala-vo Sawuli aahinwariha Davidi ikuwo dha ekhotto, masi Davidi aahirula atthikiha okhala wiira dhaaninlemela. Ndho Davidi aahinkusa fiska-ye ni arowa onratthini attottela maluku 5 oovilikeya, apweha mpastam-mwe. Moottharelana, owo aaheetta amwattamelaka Goliyathi. Ndho Goliyathi aahinleela wiira: ‘Rapasi nkhani weyo, haaya oxovele nno. Miyo kinoowiipha ni erutthu-yo enookhuriwa ni aneenama.’ Masi Davidi khoonve ata etthu, ni aahimwaakhula wiira: ‘Nyuwo munra owana ni miyo nroromelaka ekatana ni mavaka nnyu, masi miyo kin’ya owana ni nyuwo kinroromelaka Yehova. Nyuwo nnupuwela wiira munwana ni hiyo masi Yehova tonwana ni nyuwo. Atthu ootheene ariva oleelo anawoona wiira Yehova toovatta oxira iyuuma dhootheene dha ekhotto. Owo onoonivahererya ootheene nnyu nyuwo mmatatani mwihu.’

Davidi aahipweha nluku nimodha vafiskan-ve ni aahivonya ni ikuru-dhe dhootheene. Yehova ahinkhalihera Davidi, ni owo aahimmana Goliyathi vayuuci. Ndho Goliyathi aahimora ni aahuukhwa. Mwaha wa ele, aFiliisti yaahova vawaatta ni yahinthya-wa Davidi. Nyuwo moowerya woona moopora Davidi oonihenre iye onroromela Yehova? Niire nyuwo munninroromela Yehova nkhama Davidi aanroromenle iye?

Noomala Davidi omwipha Goliyathi, owo ahikhala nhooleli aatooropa a mwene Sawuli. Davidi ahapwetesa awanani-ye awaatta ni ahikhala ntthu oovuwa. Athiyana yaanipa yiiraka: Davidi owipha atooropa awaatta onxira Sawuli. Ndho mwaha awa elo Sawuli aninkhalela nrima Davidi ni akatthuna omwipha.

Nihiku nimodha Davidi amwipelaka tthakare Sawuli, owo ahivonya nivakane wiira anhome Davidi masi khawenrye onhoma. Noomala-vo Sawuli ahilakela omwipha Davidi masi Davidi ahithyawela moothakoni.

Sawuli ahakusa atooropa-ye 3.000 wiira yankoce Davidi. Mohidhuwela Sawuli ahivolowa ncukuni mwemwo aipinthemo Davidi vamodha ni atthu-ye. Alopwana awo yaari ni Davidi yaahinleela wiira: ‘Davidi, nyuwo olelo mokhalana eparakha ya omwipha Sawuli.’ Ndho Davidi ahirowa ni ephole opuro ampanthiyevo Sawuli ni ahithikila nlayane, masi owo khamonne Davidi. Noomala Davidi othikila nlaya na Sawuli ahiivaha nthowa. Mwaha awa veene opaka elo, ahona wiira khantthitthiminhe mwene athanliwe ni Yehova. Ni ahakhothihera alopwana ariyena omwipha Sawuli. Okathi Sawuli akhume iye ncukuni, Davidi aahinleela wiira: ‘Oleelo kahikhalana eparakha ya owiphani masi nkipanke elo.’ Nire yoolakela ya Sawuli ya otthuna omwipha Davidi yahimmalela? Naari!

Sawuli khahin’ye onkoca Davidi. Nihiku nimodha ohiyu, Davidi vamodha ni ndhule aitthaniwa Abisai ahivolowa nhemani wa Sawuli mohidhuweliwa, okhala wiira Sawuli anruupa. Hata Abineri, yoowo ankhapelela mwene Sawuli ahiruupa. Okathi Abisayi onna iye elo, ahitthuna omwipha Sawuli. Masi Davidi aahinleela wiira: ‘Abisayi, Yehova onomphukela Sawuli! Nkuse nrinkine na maadhi ni nivakane nirowe.’

Davidi ni Abisayi yahikhumamo nhemani mmwe ni yaahiwela vadhulu wa mwaako. Moottharelana Davidi ahikhuwela airaka: ‘Abineri, seeni nhimmukhapelela nnyu mwene nnyu? Nrinki ni nivaka na Sawuli niri vaai?’ Hiyo nookusa itthu idha nyuwo nhinoonaka. Sawuli ahidhuwela wiira ari Davidi alootta, ndho ahakhula wiira: ‘Nyuwo mwanwerya okiipha miyo, masi nyuwo khimpake elo. Ndho nenna-va, kodhuwela saana wiira nyuwo nnokhala mwene a wIsarayeeli nhoolo.’ Noomala-vo Sawuli ahitthikela owannye. Masi niire wiira amudhi ootheene a Sawuli yaninnyokha Davidi? Nirowe noone.