Mwaana oopacera oyariwa a Sawuli yoowo aitthaniwa Yonataani, ari nakhotto oolipa nrima. Hata Davidi aahinttoottopela airaka ari awaakuveya nkhama saaka ni oovatta nkhama mwatto. Nihiku nimodha Yonataani aahiwoona aFiliisti 20 eri vadhulu va mwaako. Ndho aahinleela tooropa-ye wiira: ‘Akhala wiira aFiliisti anooniitthana wiira nawane ni veena, elo ethoonyero enoonihera wiira Yehova onoonivahererya wiira naawerye. Ndho elo yaahiiraneya, aFiliisti yaahimwiitthana Yonataani ni atooropa-ye wiira ewele vadhulu va mwaako wiira yawane ni awo.’ Yaahirowa ni yaahiwerya owiipha aFiliisti ootheene 20 yaari va mwaako vaavale.

Okhala wiira Yonataani ari mwaana oopacera oyariwa a Sawuli, ahikhalana ehaakhi ya okhala mwene nhoolo. Masi Yonataani aahidhuwela wiira Yehova aahinthanla Davidi wiira akhale mwene aya onranthela Sawuli. Masi hata eri dhiidho Yonataani khaankhalenle nrima Davidi ni yaahikhala axirikha uulupale. Nitho awo yaahilaiherana okhapelelana ni waakihana nkina ni nkhwe. Wiira Yonataani oonihere wiira anitthuna okhala nxirikha a Davidi, aahimunnya ekasako-ye, ekatana-ye, muura-ye ni esintu-ye ya ekhotto.

Okathi Davidi antthyawa iye Sawuli, Yonataani ahirowa okumana ni owo akanleela wiira: ‘Davidi, mwiilipihe ni nlipe nrima. Yehova ohothanlani wiira nkhale mwene. Hata apaapa annidhuwela elo.’

Ivaara dhawaatta, Yonataani anileva ekumi-ye wiira ankhalihere nxirikha-ye. Okathi aadhuwenle iye wiira Sawuli aatthuna omwipha Davidi, Yonataani ahipaka itthu dhootheene aawerya iye wiira amwirihe Sawuli orukunsa mupuwelo-ye. Ndho mwaha awa elo Sawuli ahinaananriwa vawaatta ni Yonataani. Noovira okathi vakhaani Yonataani ni Sawuli yaahukhwa okhottoni.

Ndho noomala Yonataani okhwa, Davidi ahirowa onkoca Mefiboxeeti mwaana a Yonataani, akanleela wiira: ‘Apaapa nnyu ni miyo naari axirikha uulupale, ndho mwaha wa elo, miyo kinawookhapelelani ekumi nnyu yootheene. Mun’ya nkakhala ni miyo opalaasiyu waaka ni nkaca vameessa vaka.’ Davidi khaaliyanle oxirikha wuulupale aariyena ni Yonataani. Mwaanitthuna okhalana oxirikha wuulupale nkhama ole wa Yonataani ni Davidi?

Noomala Sawuli okhwa, Davidi aahikhala mwene. Owo aaira arina miyaakha 30. Nihiku nimodha odhoodhilo Davidi eettaka vadhulu wa epalasiyu-ye, owo aahimoona nthiyana mmodha oophwaneliwa. Davidi ahidhuwela wiira ari Bati-seeba yoowo aatheliwe ni nakhotto mmodha aaitthaniwa Uriya. Ndho Davidi ahaaruma atthu wiira yamwitthane. Noomala Bati-seeba ophiya, Davidi ahirupa nuuwo ni Bati-seeeba aahirupala. Davidi aahimananiha ovitha etampi-ye. Tivondho owo ahiirumiha wiira Uriya mamune Bati-seeba aiphiwe okhottoni. Noomala Uriya okhwa, Davidi aahinthela Bati-seeba.

Masi Yehova ahoona itthu dhootheene dhotakhala Davidi apanke iye. Tivondho aahinruma profeeta Nataani wiira alotte ni Davidi. Noomala profeeta Nataani ophiya, aahipaka nlikanyiho airaka: ‘Aahikhala nlopwana mmodha oothaaciri aarina iputthiputthi dhawaatta ni nkina oohaawa arina eputthiputthi emodha, masi yaandhivela vawaatta. Munnidhuwela etthu apanke iye nlopwana ole thaaciri? Nlopwana ole thaaciri ahimwiyera ole ohaawa eputthiputthi-ye yeele emodha.’ Okathi Davidi aaiwale iye elo, ahinanariwa vawaatta ni ahilootta wiira: ‘Nlopwana owo aanipwanela okhwa!’ Ndho profeeta Nataani aahimwaakhula wiira: ‘Thaaciri owo ti nyuwo!’ Davidi noomala wiiwa elo aahiripiwa nrima vawaatta ni ahilootta wiira: ‘Koottheka. Ndho mwaha awa itthu idhe dhootakhala Davidi aapanke iye Yehova ahihiya wiira dhinkhumelele mixankiho veene ni ettheko-ye.’ Masi Yehova aahinlevelela Davidi okhala wiira aahiiyeviha aloottaka itthu dhootheene apanke iye.

Nholomwa miyakha dhaattharela, Davidi ahilakela oteka etempulo para Yehova, masi Yehova anthanlale mwane Davidi yowo aitthaniwa Salomooni wiira ateke etempulo elo. Davidi aahipacera okocihera itthu dhaaya otekeliwa etempulo ni ahilootta wiira: ‘Okhala wiira Salomooni rapasi nkhaani, ni etempulo on’ya iye ontekela Yehova en’ya okhala yuulupale ni yooreera, kinoonkhalihera.’ Davidi aahivaha nsurukhu-ye, ahaakoca ananteko, ahithukumanya ewooru, eparatha ni ithaapwa wiira etekeliwe etempulu ele. Noovira okathi vakhaani Davidi ahinaakuve okhwa, aahinleela Salomooni wiira: ‘Yehova ookiruma wiira kiwonihereni moopora etempulu en’ya awa otekiwa. Nhoove mwanaka ni nlipe nrima Yehova onawokhaliherani, mwilipihe mpacere ovara nteko.’