Okathi yaaharupa awa epula wIsarayeeli, Yehova aahinruma Eliya wiira arowe oZareepa okhala wiira ahikhalawo naankhweli aya onvaha eyooca. Ahalaka vakhaani ophiya esidadi ele, Eliya ahimoona naankhweli oohaawa athayaka ikhuni. Ole, ari naankhweli yoole Yehova aanlenle iye Eliya wiira aammuvaha eyooca. Ndho Eliya ahinvekela wiira: ‘Safatali, nkivahe ephaawu ni maadhi kiwurye.’ Masi naankhweli ole ahaakhula wiira: ‘Miyo nkaana ephaawu yawoovahani, kirina esima vakhaani ni makhura vakhaani emphiyera woosa ephaawu wiira kikhuure miyo ni mwanaka pahi.’ Eliya aahimwaakhula wiira: ‘Yehova oolaihenre wiira akhala wiira nnookivaha eyooca, esima nnyu ni makhura nnyu, khammala mpakha orupa epula.’

Ndho naaankhweli ole ahirowa owani, oosa ephaawu aanvaha Eliya. Nkhama dhiidhaale Yehova anlaihenre iye naankhweli ole, veene ni mwaane ahikhalana eyooca miyaakha dhootheene yahaarupa awa epula. Esima-ye khiyaamanle ni makhura-ye mmurinkini khiyaavukunwe.

Masi moooripiha nrima mwaana a nankhweli ole ahipacera owereiwa ni ahuukhwa. Ndho naankhweli ole ahinvekela Eliya wiira ankhalihere. Eliya ahinkusa mwaana ole anroiha empa ya odhulu amwatalela, akanvekela Yehova airaka: ‘Yehova, safatali mmukhalihere mwaana ola wiira atthikele okhala nkumi.’ Etthu avekela Eliya yaakhala nkhama khiyaweryaneya. Moodhuwela nthowa-na? Okhala wiira okathi ole khaavo aatanke okhwa ahihimusiwa, ni naankhweli ole ni mwane khiyaari a nloko na aIsarayeeli.

Masi mwaana ole ahitthikela okhala nkumi, ni Eliya aahinleela nankhweli ole wiira: ‘Moone! Mwaninyu otthikela okhala nkumi.’ Nankhweli ole aahitteliwa nrima vawaatta ni ahinleela Eliya wiira: ‘Nenna-va kookhupali wiira nyuwo nrummwe ni Muluku. Ni itthu dhootheene munlootta nnyu ti dheekhweeli ni dhinkhuma wa Yehova.’

Ari owannye vaxanelani wIsareyeeli, mwene Akaabi aniwerya woona ematta ya nlopwana mmodha aaitthaniwa Nabooti. Akaabi yaahindhivela ematta ele ni aahinvekela Nabooti wiira anthumihere. Masi okhala wiira nlamulo na Yehova nanikhoottiha othumiha imatta dhoorithiwa, Nabooti ahinkhoottiha. Etthu apanke Nabooti yaari yooreera, masi Akaabi oonenle dhai? Owo ahinanariwa vawaatta, ahiriipiwa nrima, khaakhuma okatthi-we ni anikhootta oca.

Yesabeeli mwaara Akaabi yoowo ari ootakhala, aahinleela Akaabi wiira: ‘Akaabi nyuwo mwamwene a wIsarayeeli, nnowerya okhalana itthu dhootheene muntthuna nnyu. Miyo kinoowerya woovahani ematta ele.’ Yesabeeli ahimpaka palano a omwiipha Nabooti wiira akuse ematta ele, ndho ahaaruma alopwana a esidadi ele yaarina owerya wiira emootherye Nabooti wiira aahinrukunuwela Muluku. Ndho Nabooti aahivonyiwa ni maluku mpakha okhwa. Ndho Yesabeeli aahinleela Akaabi wiira: ‘Nabooti ohukhwa’. Nenna-va nyuwo pooti okusa ematta-ye.’

Ohiya Nabooti pahi, yaahikhala atthu akina ooreera nrima ni yaampheta Yehova Yesabeeli aawiimphe iye, owo anaakokhorela amuluku a eetheeru ni aanipaka itthu dhootakhala. Masi Yehova anoona itthu dhootheene apaka iye. Ndho eseeni aaya iye omwiiriha?

Noovira okathi vakhaaani Akaabi aahukhwa, ndho mwaana Akaabi yoowo aitthaniwa Yoraami aahikhala mwene. Okathi ole Yehova aahinruma nlopwana mmodha aitthaniwa Yeehu wiira amwiiphe Yesabeeli vamodha ni amudhi-ye.

Yeehu aheettiha mwawaakuveya ekaro-ye ya ekhootto, arowaka oYesireyeeli. Ni Yoraami ahettiha ekaaro-ye ayaaka okumana ni Yeehu noomala okumana, Yoraami ahinkoha Yeehu wiira: ‘Nrenle nrettele?’ Yeehu ahaakhula wiira: ‘Naari, nkirenle nrettele, khaninkhala-khala nikhalaka ni nrettele amaama nnyu ehihin’ye opaka itthu dhootakhala.’ Ndho Yoraami ahirukunsa ekaaro-ye ya ekhotto ni atthyawa. Masi Yeehu ahivonya nivaka-ne anhoma Yoraami ni akhwa.

Moottharelana Yeehu aahirowa empa akhala iye Yesabeeli. Okathi Yesabeeli adhuwenle iye wiira Yeehu aanra, aahiimakeyari ni aahikocihera maihi-ye, nuuvenya aheemela vaxanelani akanlipelela. Noomala Yeehu ophiya, Yesabeeli aahipacera onlodhowela. Moottharelana Yeehu ahaaleela arumei a Yesabeeli wiira: “Akhumiheriwe vaate-va!” Awo yahintthepa enviriha vaxanelani enrihela vaathi mpakha okhwa.

Moottharelana, Yeehu ahiwiipha anamwane 70 a Akaabi. Ndho mwaha wa elo, okokhoreliwa Bayaali wIsarayeeli waahimala. Eseeni ninhudha nhu ni yawiiraneya ela? Ninhudha wiira Yehova onniwerya woona itthu dhootheene dhimpakiwa dhootakhala, ni waaphiya okathi wooreerela onawaamalamaliha atthu ootheene ampaka itthu idho dhootakhala.