Nrummwa Paaulu Aahiroihiwa oRooma

Nkwaha wa neeraru wa olaleerya wa Paaulu waamalenle oYerusaleemu. Nuumala ophiya, aahiphariwa atthukeliwa nkateya. Ohiyu moolohani, Paaulu ahimoona Yeesu anleelaka wiira: ‘Nrowe oRooma mwaalaleerye atthu a weeiwo.’ Paaulu aahikusiwa aroihiwaka oYerusaleemu wa oKesareya, weiwo aavirinhe iyewo miyaakha miili aari nkateya. Okathi aaphukeliwa iye ni Kuvernatoore Feestu, Paaulu aahinleela wiira: ‘Kintthuna ophukeliwa ni Seesari mwene a oRooma.’ Feestu aahinleela Paaulu wiira: ‘Okhala wiira muntthuna ophukeliwa ni Seesari a oRooma nnooroihiwa.’ Paaulu aahiwelihiwa ekalawa yaaya oRooma, nitho axirikha-ye ale aili Luuka ni Aristaarku yaahintthara.

Yeettaka dhiidhaale ni ekalawa, yaahipacera woopa ettheku yuulupale yeelo yaavirinhe mahiku awaatta. Atthu ootheene yaari nkalawani mmwe yuupuwela wiira yaankwa. Masi Paaulu aahaalela alopwana ale wiira: Miyo nookikhumelela nlaikha moolohani nikakileela wiira: ‘Nyuwo Paaulu nhoove, khamunkhwa, nlipe nrima! Nnoophiya oRooma ni atthu ootheene nrinnyuna nkalawani anawoopowa.ʼ

Ettheku ele yaahiviriha mahiku 14 yoopaka. Nuumala-vo vakhani-vakhani atthu ale yaahipacera woona elika ya oMaalta. Ehalaka vakhaani ophiya ota, ekalawa ele yaahipwina ni yaahiphweeya, masi atthu ootheene 276 yaari nkalawani mmwe yaahoopowa. Atthu akina yanrapelela masi akina yaaphareenle ipetaaso dha ekalawa wiira yoopowe. Atthu a oMaalta yaahaakhapelela ni yaahipattiha mooro wiira atthu ale yoore.

Nuuvira miyeeri miraru, anakhotto ale yaahinkusa Paaulu enroiha oRooma ni ekalawa ekina. Vaavo Paaulu aphin’ye iye, anna yaahura okumana ni veene. Okathi Paaulu awoonne iye anna eraaka, aahinxukhurela Yehova ni aahiphwanya ikuru. Hata Paaulu aari nantthukiwa, anaakhulelihiwa okhala empa ya waalukariwa meekhe, masi alipeleliwaka ni toropa mmodha. Owo aahikhala esidadi ele mpakha miyaakha miili. Okathi atthu yaara awa onsekurya, aanaalaleerya voohima dha Omwene wa Muluku ni aanaahudhiha voohima dha Yeesu. Nitho Paaulu aahaatikhela iwarakha miloko dha ekiristawu dha wAasiya ni oYudeya. Mweekhweeli Yehova ahinrumeela Paaulu wiira alaleye ihapari dhooreera ilapo dhawaatta.