Omwene wa Muluku Onawiiriha Elapo Yootheene Okhala Eparayiisu

Yehova onnilaihera omaliha mixankiho dhootheene dhinaaphwanya apinaatamu olelo nkhama ireetta, oriipiwa nrima ni okhwa. Nitho oolaihera wuukuttha maithori a atthu ootheene, ndho nhoolo itthu dhootakhala khaikuupuweleliwa-tho.

Yehova aahimpatusa Adamu ni Eeva aaphweha oXardim ya Weedeni. Owo aatthuna wiira ekakhala moohakalala mahiku ootheene. Yehova aahaareeliha ni aahaavaha eparakha ya waayara anamwane ni odhala nlaponi wiira ekankokhorela Veene. Mooriipiha nrima, Adamu ni Eeva khiyaamwiiwelenle Yehova. Masi hata eri dhiidho, Yehova nanlelo ontthuna wiira elapo ekhale eparayiisu. Eliivuru ela noohudhera wiira Muluku onnaakhwanihera itthu dhootheene onlaihera iye. Tivondho Omwene-ye onooriha itthu dhootheene dhooreera aanlaihenre iye Abrahaamu.

Moohilekela Satana, malaikha ootakhala ni atthu ootheene ootakhala anoopwetesiwa. Okathi owo, atthu ootheene wiirimu ni valaponi an’ya ekankokhorela Yehova pahi. Khaavo on’ya akawereiwa aahindho okhwa. Mahiku ootheene nin’ya nikavenya ni ekumi yooloka ni okhala moohakalala. Atthu ootheene ekaankhalana eyooca yawaatta ni yooloka, mampa ooreera ni oolipa yaawo an’ya awa ekakhalamo ehoovaka etthu. Atthu ootheene valaponi an’ya okhala ooreera nrima ni khaavo on’ya akapaka itthu dhootakhala. Hiyo khanikoova-tho inama dhawoopiha dha ntakhwani ni idho khadhin’ya ikanoova. Elapo yootheene en’ya okhala eparayiisu.

Nitho en’ya okhala etthu yoohakalaliha okathi nin’ya nhu owoona atthu akhwiye ehihimusiwaka ni Yehova. Okathi owo hiyo ninookhalana eparakha ya waadhuwela arumeyi a Yehova a Khalai nkhama Abeeli, Nowee, Abrahaamu, Saara, Moise, Ruuti Esteeri ni Davidi. Hiyo nin’ya nikavara miteko vamodha ni awo wiira niirihe elapo yootheene okhala eparayiisu. Okathi owo hiyo ninookhalana miteko dhawaatta ni dhoohakalaliha.

Yehova ontthuna wiira mwakhale mparayiisu. Okathi owo nyuwo nnoondhuwela Yehova mwa enamuna mwahuupuwela nnyu. Ndho nenna-va nihihiye olipiha waatana winyu ni Yehova. Mwapaka elo nnookhala nxirikha-ye mahiku ootheene!