Yehova Aahimwaakiha Yosafaati

Yosafaati ahimalamaliha okokhoreliwa Bayaali esidadi ya oYuda. Veene atthuna wiira atthu ootheene ekankokhorela Yehova. Tivondho ahaathanla alopwana yadhuwela saana malamulo a Yehova wiira ekaahudhiha atthu.

Atthu yaakhala nttethe ole, yanoova waatuphela atthu a oYuda okhala wiira awo yaahidhuwela wiira Yehova anaakhalihera. Ndho mwaha awa elo yaaniruha itthu ekanvaha mwene Yosafaati. Masi atthu yaakhala oMowaabi, wAamoni ni atthu yaakhala mittetthe dha oSiyeri, yaanitthuna orowa owana ni aYuuda. Yosafaati ahidhuwela wiira waanitthuneya okhaliheriwa ni Yehova. Ndho aaharuma alopwana, athiyana ni anamwane wiira erowe oYerusaleemu. Ari ohoolo wa atthu ootheene, Yosafaati ahivekela airaka: ‘Yehova, hiyo khaninwerya waapwetesa awanani nhu nihikhaliheriwaka ni nyuwo, safatali nnileele etthu ninreerela nhu opaka.’

Yehova ahaakhula nivekelo na Yosafaati anleelaka wiira: ‘Nhoove. Miyo kiri ni nyuwo. Atthu khantthuneya owana, atthu yemele pahi yoone ele kin’yaaka opaka.’ Etthu seeni Yehova apanke iye wiira awoopole atthu-ye?

Mmelommwa ohiihiyu, Yosafaati ahaathanla alipa awipa wiira erowe ohoolo wa atoropa, yaakamwipela Yehova macipo mohakalala. Awo yaheetta ekhumaka oYerusaleemu mpakha ophiya oTekowa, opuro yoowo waya owaniwa ekhotto.

Okathi atthu ale yathanliwe yaapacenra awa wiipa, mootikiniha Yehova ahiwiiriha atthu a wAamoni ni atthu a oMowabi owana yaaworo mpakha wiiphana. Masi Yehova ahakhapelela atthu-ye nkhama dhidhaale alaihenre iye. Mittetthe dhootheene dhaari wattamela oYuuda, atthu yaahiwa itthu dhootheene Yehova apanke iye. Ndho awo yaahona wiira nanlelo Yehova anaakhapelela atthu-ye. Yehova onnirumeela inamuna dhoovirikana wiira awoopole atthu-ye ni wiira veene apake elo khantthuneya okhaliheriwa ni ntthu nkina.