YOOSOMA 27
Okhwa wa Yesu Onnoopola Dhai?
Hiyo naanatampi ni ninnihaawa okhala wiira Adamu ni Eva, khiyamwiiwelenle Muluku.a (Moone enoota.) Masi elo khentaphulela wiira khinaana nlipelelo. Yehova aahinruma mwane, Yesu Kiristu, wiira anoopole mwa etampi ni okhwa. Biibiliya onhudhiha wiira okhwa wa Yesu, wooliverya yawoopola. Yawoopola esapo enlinvwa wiira ataphuliwe ntthu. Ndho Yesu aahiliva esapo ni ekumi iye yoohittheka. (Munsome Matheyo 20:28.) Yesu aahileva ehaakhi-ye ya okhala mahiku ootheene valaponi. Noomala opaka elo, oohula ephuro wiira nitthikele okhalana itthu dhootheene Adamu ni Eva ayelenla awa. Nitho okhwa wa Yesu ohoonihera wiira Yehova ni Yesu anninipheta. Yoosoma ela enawookhaliherani waacerera oxukhurela winyu nkuttho wa Yesu.
1. Okhwa wa Yesu onnikhalihera dhai olelo-va?
Mwaha wa hiyo okhala anatampi, ninnipaka itthu dhawaatta dhininnanara Yehova. Ndho, mwaha wa ele Yesu onipakenle iye onniweryaneya oleveleliwa itampi dhihu. Tivondho, wiira nileveleliwe itampi dhihu tivootthuneya ottharuwa ni nrima nhu wootheene, onvekela Yehova wiira anilevelele orwela mwa ndhina na Yesu ni wiilipihera opaka dhootheene ninwerya nhu wiira nihitthikele opaka itampi imodharu. Ndho napaka elo, ninookhalana wataana woolipa ni Yehova. (1 Yohani 2:1) Biibiliya onlotta wiira: ‘Kiristu, yoowo ori naxariya, ohookhwa evaara emodha pahi, mwaha wa itampi dha atthu ahikhanle anaxariya, wiira ooroiheni wa Muluku.’—1 Pedru 3:18.
2. Okhwa wa Yesu on’ya onikhalihera dhai nhoolo?
Yehova onruma Yesu wiira avahe ekumi-ye yoomalela wiira ‘ootheene ale anoonihera omwaamini Yesu, ehipwetesiwe, masi ekhalena ekumi yoohimala.’ (Yohani 3:16) Orwela wa nkuttho wa Yesu, Yehova onoomaliha itthu dhootheene dhinkhumelela mwaha wa ohiiwelela wa Adamu. Elo entaphulela wiira naamini nkuttho wa Yesu, ninookhalana eparakha yookhala mahiku ootheene mparayiisu valaponi vaava!—Yesaya 65:21-23.
NHUDHE ITTHU DHIKINA
Mwiiwasase saana etthu emwiirinhe Yesu onikhwela ni moopora elo enoophwanyihawani mireerelo.
3. Nkuttho wa Yesu onninoopola etampi ni okhwa
Moone EVIIDIYU, nuuvinya mwaakhule nikoho ninttharelana.
Eparakha seeni Adamu oyeelenle iye noomala ohimwiiwelela Muluku?
Munsome aRoma 5:12, nuuvinya mwaakhule nikoho ninttharelana:
Etampi ya Adamu ekhumihenreni mweekhumi mwihu?
Munsome Yohani 3:16, nuuvinya mwaakhule nikoho ninttharelana:
Eseeni yaamwiirinhe Muluku onruma Mwane ora valaponi?
Adamu ari ntthu omalela masi mwaha wa ohimwiiwelela Muluku, atthu ootheene arava etampi ni annookhwa
Yesu ari ntthu omalela masi mwaha wa omwiiwelela Muluku, apinaatamu anoowerya okhalana ekumi yomalela ya mahiku ootheene
4. Okhwa wa Yesu onnaaphwanyiha mireerelo atthu ootheene
Moone EVIIDIYU, nuuvinya mwaakhule nikoho ninttharelana.
Onweryaneya dhai okhwa wa ntthu mmodha owoopola atthu ootheene?
Munsome 1 Timootheyo 2:5, 6, nuuvinya mwaakhule nikoho ninttharelana:
Adamu ari ntthu omalela, masi mwaha wa etampi-ye, apinaatamu ootheene arava etampi ni okhwa. Nitho Yesu aari ntthu oomalela. Mwa enamuna seeni Yesu oraiye ‘yawoopola enaaphiyera’ atthu ootheene?
5. Yawoopola yoovaha Yehova ovanheiyeni
Axirikha a Yehova annoona yawoopola okhala yoovaha yuulupale. Mwa ntakihero, munsome aGalasia 2:20, nuuvinya mwaakhule nikoho ninttharelana:
Murummwa Paulo onihenre dhai wiira aanoona yawoopola nkhama yoovaha ya Muluku wa yeene?
Noomala Adamu ottheka, apinaatamu ootheene annikhwa. Masi Yehova onruma Mwane wiira akhwe, wiira nyuwo nkhalena eparakha yoophwanya ekumi yoohimala.
Vaavo munsoma nnyu iveersu dhinttharelana muupuwele moopora Yehova onenle iye noomala omoona Mwane ahaawaka. Munsome Yohani 19:1-7, 16-18, nuuvinya mwaakhule nikoho ninttharelana:
Nyuwo nnoonela dhai ele Yehova ni Yesu yoopakenlawani?
ATTHU AKINAKU ANLOTTA WIIRA: “Onweryaneya dhai okhwa wa ntthu mmodha owoopola atthu ootheene?”
Nyuwo mun’ya waakhula dhai?
WUULUULA
Mwaha wa okhwa wa Yesu, Yehova onoowerya onilevelela dhoottheka dhihu. Nitho okhwa wa Yesu onninivaha eparakha ya ophwanya ekumi yoohimala.
Ipontu dhuulupale
Eseeni yaamwiirinhe Yesu okhwa?
Ekumi yoomalela ya Yesu ewenrye dhai okhala yawoopola enaaphwiyera apinaatamu ootheene?
Mireerelo seeni okhwa wa Yesu onniphwanyiha awa?
NTHOKODHE ITTHU DHIKINA
Moone moopora ekumi yoomalela ya Yesu eniitthaniwa awa yawoopola.
“Onweryaneya Dhai Nkuttho wa Yesu ‘Owoopola Atthu Ootheene’?” (Mwaha ori nsaaitini jw.org)
Moone etthu ninreerela nhu opaka wiira noopowe.
“Yesu Onnoopola Dhai?” (Mwaha ori nsaaitini jw.org)
Niire Yehova onnilevelela itampi dhuulupale?
“Makoho Biibiliya Onaakhula iye” (A Sentinela, 1 de Maio de 2013)
Moone moopora nlopwana mmodha okhaliheriwe iye orukunusa ontthu-ye noomala ohudha voohima dha nkuttho wa Yesu.
“Miyo Kahi Keepottha a Itthu Dhootakhala” ( Mwaha ori nsaaitini jw.org)
a Enoota: Etampi khentaphulela pahi etthu yoohiloka empakiwa ni ntthu. Masi enhela-tho mpuwa yootthuna ootheene nhu nirinhuna ya opaka etthu yoohiloka mwaha wookhuma wa Adamu ni Eva.