YOOSOMA 26
Seeni Otakhala ni Ohaawa Onkhumelela Awa?
Vaavo enkhumelela awa ehasara, atthu annikoha wiira: “Seeni dhinkhumelela awa itthu idha?” Tivoohakalaliha odhuwela wiira Biibiliya onnaakhula nikoho nna!
1. Otakhala okhumelenle dhai valaponi?
Satana Diyaabu, ahinrukunuwela Yehova. Ndho, owo aatthuna waalamulela atthu akina. Tivondho, aahiwiiriha apinaatamu oopacera, Adamu ni Eva, onrukunuwela Muluku. Satana aapanke dhai elo? Owo aahimototha Eva. (Maphattuwelo 3:1-5) Satana aahimwiiriha Eva wuupuwelela wiira Yehova anwateriha etthu yooreera. Nitho aahoonihera wiira apinaatamu anoowerya okhala oohakalala ehimwiiwelelaka Muluku. Satana aahilotta wootha woopacera vaavo anlenle iye Eva wiira kharowa okhwa. Tivondho, Biibiliya ommwiitthana iye Satana wiira “owo nawoothe ni topacenrye wootha.”—Yohani 8:44.
2. Eseeni Adamu ni Eva yaathanlala awa opaka?
Yehova ahaavaha itthu dhawaatta Adamu ni Eva. Owo aahaaleela wiira ece mihokorokho dha mittaikho dhoothedhene dha oxardi ya Weedeni masi awaterinhe nttaikho mmodha. (Maphattuwelo 2:15-17) Masi, hata eri dhiidho, awo yaahithanla oca nttaikho yoole yaawaterihiwa awa. Eva ‘aahirukula nhokorokho wa ntthaikho ole aca.’ Moottharelana, Adamu ‘aahooca-tho.’ (Maphattuwelo 3:6) Oowaaili khiyaamwiiwelenle Muluku. Okhala wiira Adamu ni Eva yaari oomalela, tivondho khiwaaliperya opaka itthu dhooreera. Masi awo yaathanlale ohiya omwiiwelela Yehova. Noomala opaka elo, awo yaahittheka ni yaahikhotta olamuleliwa ni Muluku. Yoothanla ela yahaakhumihera mixankiho dhawaatta.—Maphattuwelo 3:16-19.
3. Yoothanla ya Adamu ni Eva ekhumihenreni mweekumini mwihu?
Noomala Adamu ni Eva ottheka, awo yaahihiya okhala oomalela, ndho mwaha wa elo, awo aaraviha etampi odhuulu-ya wootheene. Voohima dha Adamu, Biibiliya onlotta wiira: “Etampi yookela moolumwenkuni mwaha wa mulopwana mmosa, nto etampi eyo yooruuha okhwa. Siiso, okhwa ohaaphwanya atthu otheene, okhala wira atthu otheene aattheka.”—aRoma 5:12.
Ndho, seeni ninhaawa nhu? Ivaara dhikina hiyo ninnihaawa mwaha wa dhoothanla dhihu dhootakhala. Nitho ivaara dhikina ninnihaawa mwaha wa dhoothanla dhootakhala dha atthu akina. Ohiya-vo, ivaara dhikina ninnihaawa mwaha okhala opuro wootakhala ni ewoora yootakhala.—Munsome Musuweli 9:11.
NHUDHE ITTHU DHIKINA
Moone moopora Muluku ohikhaleiyene nthowa mwaha wa otakhala ni ohaawa ninoona nhu moolumwinkuni olelo-va. Nitho moone moopora Muluku onoonela iye vaavo ninhaawa nhu.
4. Taani onikhumihera ohaawa wihu?
Atthu awaatta anikhupali wiira olumwinku oneettihiwa ni Muluku. Niire elo ekhweeli? Moone EVIIDIYU.
Munsome Yakobo 1:13 ni 1 Yohani 5:19, nuuvinya, mwaakhule nikoho ninttharelana:
Niire Muluku tonkhumihera otakhala ni ohaawa?
5. Moone itthu dhinikhumiheriwa ni olamulelo wa Satana
Munsome Maphattuwelo 3:1-6, nuuvinya, mwaakhule makoho anttharelana:
Wootha seeni Satana aalontta iye?—Moone eversu 4 ni 5.
Satana onihenre dhai wiira Yehova anaawateriha apinaatamu etthu yooreera?
Moovarihana ni Satana, niire apinaatamu annitthuneya olamuleliwa ni Muluku wiira ekhale oohakalala?
Munsome Musuweli 8:9, nuuvinya mwaakhule nikoho ninttharelana:
Nihoona wiira Yehova khaneettiha olumwinku. Ndho mwaha wa elo, eseeni enkhumelela?
Adamu ni Eva yaari oomalela ni yaakhala Mparayiisu. Masi awo yaahimwiiwelela Satana ni enrukunuwela Yehova
Noomala Adamu ni Eva onrukunuwela Muluku, moolumwinkuni yoodhalamo etampi, ohaawa ni okhwa
Yehova onoomaliha etampi, ohaawa ni okhwa. Noomala, apinaatamu onootthikela okhala oomalela ni okhala Mparayiisu
6. Yehova onnoona ohaawa wihu
Niire Muluku onnona ohaawa wihu? Nirowe noone etthu Mwene Davidi ni nrummwa Pedru yaatinkha awa. Nsome Esalimo 31:7 ni 1 Pedru 5:7, nuuvinya mwaakhula nikoho ninttharelana:
Nnoonela dhai odhuwela wiira Yehova onnidhuwela ni onnoona ohaawa wihu?
7. Muluku onoomaliha ohaawa wootheene wa apinaatamu
Munsome Yesaya 65:17 ni Wiisuupulula 21:3, 4, nuuvinya mwaakhule nikoho ninttharelana:
Seeni oraawa vooreera odhuwela wiira Yehova onoomaliha itthu dhootheene dhootakhala dhinaaphwanya apinaatamu?
Niire mwanidhuwela?
Noomala Satana olotta wootha woopacera, aahihoonona ndhina na Yehova. Owo aahipaka elo wiira awiirihe apinaatamu wuupuwela wiira Yehova kahiyo Namalamulela axariya ni oopheta. Moohilekela, Yehova onoomaliha ohaawa ni onawoonihera wiira olamulelo-ye ti wootepa oreera. Noomala opaka elo, owo onoomaliha itthu dhootheene ndhina-ne nnootheriwa awa. Ndho elo, etthu yootepa otthuneya moolumwinkuni.—Matheyo 6:9, 10.
ATTHU AKINAKU ANLOTTA WIIRA: “Ohaawa yootthuna ya Muluku wa apinaatamu.”
Nyuwo mwaaya waakhula dhai?
WUULUULA
Satana, Adamu ni Eva tariina nthowa nuulupale mwaha wa wootakhala onkhumelela moolumwinkuni. Yehova onnoona ohaawa wihu ni moohilekela onnoomaliha ohaawa wootheene.
Ipontu dhuulupale
Wootha seeni Satana Diyaabu anlenle iye Eva?
Yoothanla ya Adamu ni Eva ekhumihenreni mweekumini mwihu?
Nindhuwela dhai wiira Yehova onnoona ohaawa wihu?
NTHOKODHE ITTHU DHIKINA
Etampi eseeni? Moone ele Biibiliya onlotta iye.
“Etampi Eseeni?” (Mwaha ori nsaaitini jw.org)
Nsome mwaha Satana Diyaabu okhumihenre iye, exardi ya Weedeni.
“Seeni Muluku Onaahiya iye Atthu Ehaawaka?” (A Sentinela, 1 de Janeiro de 2014)
Moone waakhuliwa woomaaliha wa nikoho neeno munreerela nnyu wuupuwela.
“Seeni Muluku Onhiya iye Yiiphiwaka Atthu Awaatta?” (Mwaha ori nsaaitini jw.org)
Moone etthu nlopwana mmodha ohudhenre iye voohima dha mixankiho dhamphwannye.