Opatisiwa Yoolukama Munreerela Nnyu Okhalana!

Yesu aalontte wiira Makiristau ahaana opatisiwa. (Munsome Matheyo 28:19, 20.) Masi opatisiwa eseeni? Etthu seeni ntthu onreerela iye opaka wiira apatisiwe?

1. Opatisiwa eseeni?

Nuulumo naawi “opatisiwa” ninkhuma ni elottelo ya Ekereku nenno nintaphulela “osuweiwa” mmaadhini. Ndho elo etthu yairanen’ye ni Yesu okathi owo apatisiwe iye omuro oYordani, erutthu-ye yootheene yaahipwina mmaadhini. Ninnidhuwela elo okhala wiira noomala opatisiwa owo ‘aahikhuma mmaadhini’. (Marko 1:9, 10) Nkhama Yesu, vaavo Makiristau eekhweeli ampatisiwa awa, erutthu-ya yootheene ennipwina mmaadhini.

2. Eseeni onoonihera iye vaavo ntthu ompatisiwa iye?

Vaavo ntthu ompatisiwa iye, onnoonihera wiira woovaherera ekumi-yo wa Yehova Muluku. Ndho ntthu oniivaherera dhai wa Yehova? Ntthu ohinatthi opatisiwa, onninvekela Yehova wiiraka ontthuna onrumeela mahiku ootheene. Nitho onnilaihera wiira on’ya onkokhorela pahi yoowo ni opaka yootthuna ya Yehova enookhala etthu yootthuneya mweekumini-mo. Ndho owo onnilakela ‘wiikhootta mwaniini ni otthara mohihiyerera’ dhoohudhiha ni ntakihero na Yesu. (Matheyo 16:24) Mwaha wa wiivaherera ni opatisiwa ntthu owo onnikhalana waataana woolipa ni Yehova vamodha ni atthu ale aninkokhorela.

3. Eseeni ntthu onreerela iye opaka wiira opatisiwe?

Nhinatthi opatisiwa tivootthuneya ohudha voohima dha Yehova ni omwaamini yeene. (Munsome aHeeberi 11:6.) Vaavo ondhuwela winyu ni omwaamini winyu Yehova onacerereya awa, ompheta winyu onootepa waacerereya. Noomala, elo enoowiirihani ontthuna opacera olaleerya voohima dha yeene ni okhala moovarihana ni malamulo-ye, niire dho, ele Muluku onlotta iye okhala yooreera ni yoonanara. (2 Timootheyo 4:2; 1 Yohani 5:3) Vaavo ntthu onnonihera iye wiira ontthuna ‘weetta nkhama aniphwanela awa atthu a Yehova, ondhivelihaka mwa itthu dhootheene,’ owo onnivaherera ekumi-ye wa Yehova ni onnipatisiwa. (aKolosi 1:9, 10)a—Moone enoota.

NHUDHE ITTHU DHIKINA

4. Opatisiwa wa Yesu onninihudhiha itthu dhawaatta

Munsome Matheyo 3:13-17 wiira nhudhe itthu dhawaatta voohima dha opatisiwa wa Yesu. Nuuvinya mwaakhule makoho anttharela:

• Niire Yesu aari mwaana okathi aapatisiwe iye?

• Ndho owo aapatisiwe dhai? Niire owo aaittheleliwe maadhi vamuru?

Noomala Yesu opatisiwa, aahipacera ovara nteko wootthuneya Muluku aanvanhe iye. Munsome Luka 3:21-23 ni Yohani 6:38, nuuvinya mwaakhule nikoho ninttharelana:

• Noomala Yesu opatisiwa, nteko seeni aahenle iye nipuro noopacera mweekumini-mwe?

5. Mwiilipihere wiira mpatisiwe

Wuupuwelela wiivaherera wa Yehova ni opatisiwa pooti okhala nritti muulupale. Masi okathi nyuwo munhudha nnyu voohima dha Yehova ni ovarihela nteko itthu onlotta iye, elo enawookhaliherani opaka yoothanla elo yootepa otthuneya, niire dho, opatisiwa. Moone ntakihero na atthu yaapanke elo, moone EVIIDIYU.

EVIIDIYU: Nlipihe Waatana Wihu ni Yehova (1:11)

Munsome Yohani 17:3 ni Yakobo 1:5, nuuvinya mwaakhule nikoho ninttharelana:

• Eseeni en’ya onkhalihera ntthu wikocihera wiira apatisiwe?

1. Hiyo ninnivaherera wa Yehova okathi nininleela nhu wiira nintthuna onrumeela owo mahiku ootheene

2. Okathi nimpatisiwa nhu, ninniwoonihera atthu wiira noovaherera ekumi nhu wa Yehova Muluku

6. Okathi nimpatisiwa nhu ninnipacera wiirela mphantta emudhi ya Yehova

Okathi nimpatisiwa nhu ninniirela mphantta emudhi yawiiraana ya olumwinku wootheene. Moohixikha elapo nhu aahiidho dhoolema dhihu, ootheene nhu ninkhupali itthu dhimodharu ni niniweelela malamulo mamodharu a Muluku. Nsome Esalimo 25:14 ni 1 Pedru 2:17, nuuvinya mwaakhule nikoho ninttharelana:

• Noomala ntthu opatisiwa, waataana seeni onkhalaiyona ni Yehova vamodha ni atthu ale aninkokhorela?

WUULUULA

Yesu ohudhinhe wiira Makiristau ahaana opatisiwa. Tivondho, tivootthuneya ntthu olipiha omwaamini Yehova, okhala moovarihana ni malamulo-ye ni ovaherera ekumi-yo wa Yehova.

Ipontu dhuulupale

• Opatisiwa eseeni? Ndho seeni eraawa etthu yootthuneya?

• Wiivaherera onvarihana dhai ni opatisiwa?

• Itthu seeni ntthu onreerela iye opaka ohinaakuve wiivaherera wa Yehova ni opatisiwa?

NTHOKODHE ITTHU DHIKINA

Ndhuwele ele opatisiwa ontaphulela awa ni ele ohintaphulela awa.

“Opatisiwa Eseeni?” (Mwaha ori nsaaitini jw.org)

Nsome ele ntthu onreerela iye opaka wiira opatisiwe.

“Ompheta ni Onxukhurela Yehova Onoowiirihani Opatisiwa” (A Sentinela, Março de 2020)

Moone etthu yaamwiirinhe nlopwana mmodha opatisiwa.

“Awo Yaatthuna Wiira Koone Ekhweeli Meekhaka” (A Sentinela, 1 de Fevereiro de 2013)

Moone moopora eraawa etthu yooreera wiilipihera wiira mpatisiwe.

“Kiire Kihaana Opatisiwa?” (Os Jovens Perguntam – Respostas Práticas, Volume 2, capítulo 37)