YOOSOMA 40
Nin’ya Owerya Dhai Okhala Eepewe Vamaithoni va Muluku?
Nkuupuwelani maama oninrapiha ni oninwariha ikuwo mwane nkhaani wiira arowe oskola. Ahinatthi mwaana orowa oskola owo onnimoona akhala wiira ikuwo owanre iye dhoofuliwa ni akhala wiira ophwaneliwa. Elo ennikhalihera mwaana okhalana ekumi yooreera ni enniwoonihara atthu wiira mwaana owo ookhalana anan’yari-ye aninsuka saana. Nkhama dhiidhale anan’yari antthuna awa wiira mwana akhale eepewe, emodha-modharu ni Tiithi nhu Yehova, ontthuna wiira nikhalena eepewe veerutthuni vihu ni mweettelo nhu. Epewe enniniphwanyiha mireerelo ni enninvuwiha Yehova.
1. Nin’ya owerya dhai okhalana epewe nkhalelo wa veerutthuni?
Yehova onnileela wiira: ‘Nikhale awaarya.’ (1 Pedru 1:16) Wiira nikhale awaarya nihaana okhala eepewe mwa enamuna ya veerutthuni ni mweettelo nhu. Hiyo ninoowerya okhala atthu eepewe nkhalelo wa veerutthuni nirapaka khuta nihiku, nifulaka ikuwo dhihu, nikhalelaka epewe empa nhu ni ekaaro nhu. Nitho nihaana okhalihera oreeriha Empa ya Omwene. Ndho vaavo nikhala nhu eepewe mwa enamuna ya veerutthuni, ninninvuwiha Yehova.—2 aKorinto 6:3, 4.
2. Dhoolema seeni dhikhanle ohonona erutthu nhu?
Biibiliya onnileela wiira ‘nikhumihe itthu dhootheene dhinnanariha erutthu ni nrima.’ (2 aKorinto 7:1) Elo entaphulela wiira nihaana oxaka khuta etthu ekhanle ohonona erutthu aahiidho muupuwelo nhu. Hiyo nintthuna wiira miyuupuwelo dhihu dhinhakalalihe Yehova. Tivondho, ninnipaka itthu dhootheene ninwerya nhu wiira nikhootte miyuupuwelo dhoonanara. (Esalimo 104:34) Nitho vaavo ninlotta nhu nintthuna wiira muulumo nhu ekhale ooreera.—Munsome aKolosi 3:8.
Etthu seeni ekina ekhanle ohonona erutthu nhu ni mweettelo nhu? Mirette dhoohapala pooti onikhumihera mixankiho mweerutthuni mwihu. Tivondho, nihininvura nhu aahiidho omunkha soone, sikaro ni nihinrumeela nhu mirette dhikina dhoohapala. Mwaha woopaka elo, ninnikhalana ekumi yooreera ni ninnoonihera wiira ninnittittimiha ekumi. Ndho nin’ya owerya dhai okhalana mweettelo wooreera? Ninoowerya okhalana akhala wiira ninawiilipihera oxaka dhoolema dhoonanara, nkhama wiikeha ni omoona parawiimwarya. (Esalimo 119:37; aEefeso 5:5) Ekhweeli wiira khahi etthu yookhweya ottharuwa dhoolema idho, masi Yehova onoonikhalihera opaka elo.—Munsome Yesaya 41:13.
NHUDHE ITTHU DHIKINA
Moone moopora nininvuwiha nhu Yehova vaavo nikhala nhu eepewe. Nitho moone moopora woottharuwa dhoolema dhoonanara.
3. Okhalela epewe erutthu nhu onninvuwiha Yehova
Vaavo ninsoma nhu malamulo Yehova aavanhe iye anaisarayeeli, ninniwerya odhuwela moopora Yehova onoonela iye epewe. Munsome Okhuma 19:10 ni 30:17-19, nuuvinya mwaakhula makoho anttharelana:
Dhawaatikhiwa idha dhinnoonihera dhai moonelo wa Yehova voohima dha epewe?
Itthu seeni dhooreera dhin’ya wookhaliherani okhalana epewe nkhalelo wa veerutthuni?
Tivootthuneya wiivaha okathi ni wiilipihera wiira nikhale eepewe nkhalelo wa veerutthuni. Masi hiyo ninoowerya opaka elo, voohixikha opuro ninkhala nhu aahiidho akhala wiira na atthu oothaciri aahiidho oothoiwa. Moone EVIIDIYU, nuuvinya mwaakhule nikoho ninttharelana.
Seeni okhalela epewe itthu dhihu oninvuwiha awa Yehova vaavo ninlaleerya nhu?
4. Nttharuwe dhoolema dhoonanara
Yehova onoonikhalihera ottharuwa dhoolema dhootheene dhoonanara
Akhala wiira munninvura aahiidho amunkha soone, sikaro ni oca mirette dhoohapala, munnidhuwela wiira etthu yoolipa ottharuwa dhoolema dhoonanara. Masi eseeni en’ya wookhaliherani? Muupuwele mixankiho dhinoophwanyihawani yoolema elo. Munsome Matheyo 22:37-39, nuuvinya mwaakhule makoho anttharelana: Onvura aahiidho omunkha soone, sikaro ni oca mirette dhoohapala onhonona dhai . . .
waataana wa ntthu ni Yehova?
waataana wa ntthu ni amudhi vamodha ni atthu akina?
Mumpake palanu oovareleya nteko on’ya wookhaliherani ottharuwa yoolema yoonanara. (Moone enoota.) Moone EVIIDIYU.
Munsome aFilipi 4:13, nuuvinya mwaakhule nikoho ninttharelana:
Okhalana yoolema ya ovekela, onsoma Biibiliya ni woona mithukumano on’ya onkhalihera dhai ntthu okhalana ikuru wiira awerye ottharuwa yoolema yoonanara?
5. Nttharuwe miyuupuwelo ni dhoolema dhoonanara
Munsome aKolosi 3:5, nuuvinya mwaakhule makoho anttharelana:
Nindhuwela dhai wiira omoona parawiimwarya, sexting ni wiikeha yoolema eninnanara Yehova? —Moone enoota.
Nnoona wiira onniweryaneya okhalana mweettelo wooreera, nkhama Yehova ontthuna iye? Mwaha wa seeni?
Moone moopora woottharuwa miyuupuwelo dhoonanara. Moone EVIIDIYU.
Yesu aahipaka nlikanyiho atthunaka woonihera wiira nihaana opaka etthu wiira nikhalena mweettelo wooreera. Munsome Matheyo 5:29, 30, nuuvinya mwaakhule nikoho ninttharelana:
Yesu khaatthuna olotta wiira nihaana wiivulaliha, masi aatthuna olotta wiira nihaana opaka etthu. Itthu seeni ntthu onreerela iye opaka wiira axake miyuupuwelo dhoonanara?—Moone enoota.
Akhala wiira munniilipihera ottharuwa miyuupuwelo dhoonanara, Yehova onnivaha efaita wiilipihera winyu. Nsome Esalimo 103:13, 14, nuuvinya mwaakhule nikoho ninttharelana:
Akhala wiira onnoovilani ottharuwa yoolema yoonanara, yawaatikhiwa ela enootumereryani dhai ohihiya wiilipihera?
Nhiviliwe!
Vaavo ntthu ommora iye, pooti wuupuwelela wiira: ‘Miyo nkireere okhweya. Kinoona wiira etthu yooreerela opaka oviliwa.’ Masi muupuwele ela: Vaavo nlipa-oothimaka onkakattuwa iye amora, elo khentaphulela wiira khanna awerye okanyari aahiidho ohaana opacera othimaka vapheya. Emodha-modharu, omora khontaphulela wiira nyuwo khamunne nwerye ottharuwa yoolema elo yoonanara aahiidho khontaphulela wiira khampake etthu. Elo enniiraneya okhala wiira khonkhweya ottharuwa yoolema yoonanara. Tivondho, nhiviliwe! Okhala wiira nkhaliheriwaka ni Yehova nnoowerya ottharuwa yoolema yoonanara.
ATTHU AKINAKU ANLOTTA WIIRA: “Miyo khoolamalela. Nkinwerya ottharuwa.”
Yawaatikhiwa seeni ya mBiibiliyani mun’ya nnyu orumeela wiira moonihere wiira ntthu akhaliheriwaka ni Yehova onoowerye ottharuwa yoolema yoonanara?
WUULUULA
Vaavo ninkhalela nhu epewe erutthu nhu, muupuwelo nhu ni mweettelo nhu, ninninhakalaliha Yehova.
Ipontu dhuulupale
Seeni eraawa etthu yootthuneya okhala eepewe mwa inamuna dhootheene?
Mun’ya owerya dhai okhala eepewe nkhalelo wa veerutthuni?
Mun’ya owerya dhai okhalana muupuwelo ni mweettelo wooreera?
NTHOKODHE ITTHU DHIKINA
Itthu seeni dhookhweya munreerela nnyu opaka wiira nkhale eepewe, hata nrina nsurukhu vakhaani?
Moone malakihero oovareleya nteko an’ya wookhaliherani ottharuwa ovura.
“Moopora Woottharuwa Ovura” (Despertai!, Maio de 2010)
Moone mixankiho onkhumihera iye omoona parawiimwarya.
“Parawiimwarya—Niire Onnikhumihera Maxakha Aahiidho Naari?” (A Sentinela, 1 de Agosto de 2013)
Moone moopora ottharunwe iye nlopwana mmodha aarina yoolema yoohiloka ya omoona parawiimwarya.
“Noomala Wiilipihera Ivaara Dhawaatta Koowerya” (A Sentinela, N.º 4 de 2016)
Enoota: Wiira moone malakihero oovareleya nteko an’ya wookhaliherani ottharuwa yoolema yoonanara, n’ye opuro oni: “Nthokodhe Itthu Dhikina” wiira nsome mwaha oni: “Moopora Woottharuwa Ovura”.
Enoota: Wiira nttharuwe yoolema ya wiikeha, moone muru oni: “Kin’ya Owerya Dhai Ottharuwa Yoolema Yoonanara ya Wiikeha?” eliivuru Os Jovens Perguntam – Respostas Práticas, evelume 1, muru 25.