Eseeni Biibiliya Onlotta iye Voohima dha Owurya Eviinyu?

Olumwenku wootheene, atthu aakhalana miyoonelo dhoovirikana voohima dha owurya eviinyu. Atthu akinaku waadhivela owurya eviinyu ni axirikha-ya. Masi akina anthanla ohiwurya eviinyu. Ohiya-vo, aakhala akina aniwurya eviinyu mpakha ohapaliwa. Tuuvi ori moonelo wa Biibiliya voohima dha owurya eviinyu?

1. Niire etthu yootthekeya owurya eviinyu?

Biibiliya khanlotta wiira etthu yootthekeya owurya eviinyu. Masi onlotta wiira “evinyu enatteliha mirima saya” atthu, elo enhela mpuwa itthu Muluku onivanhe iye. (Esalimo 104:14, 15) Alopwana ni athiyana akina oororomeleya anromoliwa mBiibiliyani yaaniwurya eviinyu.—1 Timootheyo 5:23.

2. Miruku seeni Biibiliya onaavaha iye atthu ale anthanla owurya eviinyu?

Yehova onlotta wiira etthu yootakhala owurya eviinyu yawaatta mpakha ohapaliwa. (aGalasia 5:21) Biibiliya onlotta wiira: “Muhitthuké muloko n’namuhapaliwa.” (Miruku 23:20) Tivondho, akhala wiira ninnithanla owurya eviinyu nihaana opaka elo mwa miruku, hata niwuryaka niri meekhinhu. Owurya eviinyu yawaatta ennimwiiriha ntthu ohuupuwela saana ni ohiwerya othanlela saana moolumo ni itthu ompaka iye. Ohiya-vo, pooti onkhumihera mixankiho dha ekumi. Ndho, akhala wiira vaavo ninwurya nhu khaninwerya wiiphimela, nihaana ohiya owurya eviinyu moomalela.

3. Nin’ya ottittimiha dhai yoothanla ya atthu akina ya ohiwurya eviinyu?

Owurya eviinyu yoothanla ya khuta ntthu. Tivondho khaninreerela omphukela ntthu onthanla owurya eviinyu mwa miruku. Nitho khaninreerela waakhanyerera atthu akina owurya eviinyu. (aRoma 14:10) Hiyo ninnithanla ohiwurya eviinyu wiira nihaakattulihe atthu akina aahiidho waakhumihera mixankiho. (Munsome aRoma 14:21.) Tivondho ninniimananiha ‘waadhya ohiya nreerelo nhu, masi nreerelo wa ntthu nkina.’—Munsome 1 aKorinto 10:23, 24.

NHUDHE ITTHU DHIKINA

4. Nthanle akhala wiira nkaanwurya eviinyu aahiidho naari

Yesu oonela dhai owurya eviinyu? Mwiirirya woopacera Yesu aapanke iye onoonikhalihera odhuwela waakhuliwa-wa. Munsome Yohani 2:1-11, nuuvinya mwaakhule makoho anttharelana:

• Mwiirirya waapakiwe ni Yesu onnikhalihera dhai odhuwela moopora Yesu oonela iye owurya eviinyu ni atthu ale anthanla owurya eviinyu?

• Hata Yesu ahilontte wiira etthu yootthekeya owurya eviinyu, Makiristau ewoonele dhai atthu ale anthanla owurya eviinyu?

Hata Nkiristau athanlaka owurya eviinyu, elo khentaphulela wiira etthu yooreera owurya mahiku ootheene. Munsome Miruku 22:3, nuuvinya nthokorerye ipontu dhinttharelana wiira moone akhala wiira onnireerela owurya eviinyu:

• Mwaayaka weettiha ekaaro aahiidho maakina muulupale.

• Akhala wiira moorupala.

• Meetiku ooleelani wiira nttharuwe owurya eviinyu.

• Akhala wiira onnoovilani wiiphimela mwaawuryaka eviinyu.

• Akhala wiira malamulo annookhoottihani owurya eviinyu.

• Akhala wiira nri ni ntthu othandhe owurya eviinyu mwaha wonkhumihera mixankiho khalai.

Niire onnireerela okhalavo eviinyu okathi wa efeesta ya ekasamento aahiidho okathi wootthekula? Eseeni en’ya wookhaliherani opaka yoothanla? Moone EVIIDYU.

EVIIDIYU: Niire Kihaana Owurya Eviinyu? (2:41)

Munsome aRoma 13:13 ni 1 aKorinto 10:31, 32. Noomala osoma dhawaatikhiwa idha, mwaakhule nikoho ninttharelana:

• Ovarihela nteko malakihero ala an’ya wookhaliherani dhai opaka yoothanla eninhakalaliha Yehova?

5. Nthanle mwaattelo wa eviinyu mun’ya nnyu owurya

Akhala wiira nnoothanla owurya eviinyu nhiliyale ela: Yehova khankhoottiha owurya eviinyu, masi owo onkhoottiha ohapaliwa. Mwaha wa seeni? Munsome Hoseya 4:11, 18, nuuvinya mwaakhule nikoho ninttharelana:

• Eseeni eniiraneya akhala wiira ntthu onniwurya eviinyu yawaatta?

Eseeni en’ya onikhalihera ohiwurya eviinyu yawaatta? Nihaana okhala awiihiiha, niire dho, odhuwela mphimo nhu. Munsome Miruku 11:2, nuuvinya mwaakhule nikoho ninttharelana:

• Seeni eraawa etthu yoorera odhuwela mphimo nhu naayaka owurya eviinyu?

6. Itthu dhinaakhalihera atthu anhapaliwa ottharuwa

EVIIDIYU: ‘Mwettelo aka Waahikipweela’ (6:32)

• Nkhama moonne nnyu eviidiyu, eseeni aapaka iye Dmitry noomala ohapaliwa?

• Niire ekwaha yoopacera Dmitry ahittharuwa ohapaliwa?

• Ndho owo owenrye dhai ottharuwa yoolema ya ohapaliwa?

Munsome 1 aKorinto 6:10, 11, nuuvinya mwaakhule makoho anttharelana:

• Niire oohapaliwa etampi yuulupale?

• Etthu seeni enoonihera wiira ntthu onhapaliwa onoowerya ottharuwa?

Munsome Matheyo 5:30, nuuvinya mwaakhule nikoho ninttharelana:

• Othikila ntata onlikana ni ottharuwa dhoolema dhihu dhoonanara wiira ninhakalihe Yehova. Akhala wiira onnooliperyani ottharuwa ohapaliwa eseeni munreerela nnyu opaka?a (Moone enoota.)

Munsome 1 aKorinto 15:33, nuuvinya mwaakhule nikoho ninttharelana:

• Niire waataana ni atthu anhapaliwa pooti owiirihani ohudha ohapaliwa?

WUULUULA

Eviinyu enhela mpuwa itthu Yehova onivanhe iye masi owo onninikhoottiha owurya eviinyu mpakha ohapaliwa.

Ipontu dhuulupale

• Eseeni Biibiliya onlotta iye voohima dha owurya eviinyu?

• Mixankiho seeni dhinaaphwanya atthu ale anhapaliwa?

• Nin’ya ottittimiha dhai yoothanla ya atthu akina ya owurya aahiidho ohiwurya eviinyu?

NTHOKODHE ITTHU DHIKINA

Marapasi an’ya opaka dhai yoothanla yooreera voohima dha owurya eviinyu?

Muupuwelele Nhinatthi Othanla Owurya (2:31)

Moone etthu munreerela nnyu opaka wiira nwerye ottharuwa ohapaliwa.

“Mpwehe Eviinyu Opuro Wooreerela” (A Sentinela, 1 de Janeiro de 2010)

Niire Makiristau annireerela omaniha ikoopho vaavo anwurya awa eviinyu?

“Makoho Ankohiwa ni Atthu Ansoma Iliivuru Dhihu” (A Sentinela, 15 de Fevereiro de 2007)

Moone yawiiraneya eni: “Miyo Kaari Esuupha Yoottuuwa,” wiira moone etthu yankhalihenre nlopwana mmodha ottharuwa ohapaliwa.

“Biibiliya Onnirukunusa Ikumi dha Atthu” (A Sentinela, 1 de Maio de 2012)