YOOSOMA 35
Nin’ya Owerya Dhai Opaka Dhoothanla Dhooreera?
Ootheene nhu ninnitthuneya opaka dhoothanla. Masi dhoothanla dhikina pooti onikhumihera mixankiho ni ohonona waataana wihu ni Yehova. Mwa ntakihero, woonawene hiyo pooti othanla opuro woomaka, nteko woovara wiira niphwanye eyooca ni akhala wiira nhoolo ninoothela, otheliwa aahiidho naari. Vaavo nimpaka nhu dhoothanla dhooreera, ninnikhalana ekumi yoohakalaliha ni ninnihakalaliha Yehova.
1. Mun’ya onrumeela dhai Biibiliya wiira okhalihereni opaka dhoothanla dhooreera?
Nhinatthi opaka yoothanla, munvekele Yehova wiira ookhalihereni ni moone ele Biibiliya onlotta iye voohima dha mwaha owo. (Munsome Miruku 2:3-6.) Masi dhoothanla dhikina, Yehova onninivaha nlamulo nooluluwanya. Ndho elo yakhumelela, etthu yooreerela opaka ori wiiwelela nlamulo nno.
Masi ankhi akhala wiira mBiibiliyani khinaamo nlamulo ninlotta mooluluwanya etthu munreerela nnyu opaka? Hata eri dhiidho, Yehova onoowettihani ‘ephuro yooreerela otthara.’ (Yesaya 48:17) Mooporani? Biibiliya ookhalana malakihero annikhalihera. Malakihero ikhweeli dhootepa otthuneya dhiri mBiibiliyani, dheidho dhinnikhalihera odhuwela moopora Muluku onoonela iye mwaha mmodha. Ivaara dhikina onsoma Biibiliya onninikhalihera odhuwela moonelo wa Muluku. Ndho vaavo nindhuwela nhu moopora Yehova onoonela iye mwaha mmodha, ninniwerya opaka dhoothanla dhininhakalaliha.
2. Eseeni munreerela nnyu wuupuwelela nhinatthi opaka yoothanla?
Biibiliya onlotta wiira: “mulipa-ànkhili onniwehaweha mwettelo awe wothene.” (Miruku 14:15) Elo entaphulela wiira nihinatthi opaka yoothanla nihaana wuupuwelela itthu dhootheene dhinhela mpuwa. Ndho nhinatthi opaka yoothanla, mwiikohe wiira: ‘Malakihero seeni a mBiibiliyani anvareleya nteko mwaha ola? Niire yoothanla ela enookikhalihera okhalana nrettele mmuupuweloni? Atthu akinaku an’ya woonela dhai yoothanla aka? Nitho nikoho nootepa otthuneya: ‘Niire yoothanla ela enoonhakalaliha Yehova?’—Otumererya 32:29.
Yehova ookhalana ehaakhi yoonileela etthu yooreera ni yoonanara. Vaavo nindhuwela nhu saana ni nintthanla nhu wiiwelela malamulo ni malakihero a Yehova, ninnikhalana yawuupusera ya nrima yooreera. Yawuupusera ya nrima owerya nirinhuna wa odhuwela etthu yooreera ni yoonanara. (aRoma 2:14, 15) Yawuupusera ya nrima yoohudhihiwa saana, enoonikhalihera opaka dhoothanla dhooreera.
NHUDHE ITTHU DHIKINA
Moone moopora malakihero a mBiibiliyani ni yawuupusera ya nrima nhu ennikhalihera awa opaka dhoothanla dhooreera.
3. Munhiye Biibiliya aweettiheni
Malakihero a mBiibiliyani an’ya wookhaliherani dhai opaka dhootthanla dhooreera? Moone EVIIDIYU, nuuvinya mwaakhule makoho anttharelana.
Othanla mootaphuwa eseeni?
Seeni Yehova onivanhe iye othanla mootaphuwa?
Etthu seeni Yehova onivanhe iye wiira enikhalihere opaka dhoothanla dhooreera?
Wiira moone ntakihero nimodha na nlakihero na mBiibiliyani, munsome aEefeso 5:15, 16. Nuuvinya nlotte moopora nkhanle nnyu ‘oorumeela saana okathi nnyu’ wiira . . .
munsome Biibiliya khuta nihiku.
nkhale namathela, namatheliwa, paapa, maama aahiidho mwaana ooloka.
moone mithukumano ni muloko.
4. Nhudhihe yawuupusera ya nrima nnyu wiira nwerye opaka dhoothanla dhooreera
Vaavo Biibiliya onlotta iye mooluluwanya nlamulo na mwaha mmodha, onnikhweya odhuwela etthu yoopaka. Masi ankhi akhala wiira Biibiliya khanlotta nlamulo nooluluwanya voohima dha mwaha owo? Moone EVIIDIYU, nuuvinya mwaakhule nikoho ninttharelana.
Nkhama moonne nnyu eviidiyu, eseeni nrokora ole opanke iye wiira ahudhihe yawuupusera ya nrima aye ni apake dhoothanla dhinindhivela Yehova?
Seeni nihinreerela nhu waavekela atthu akina wiira enipakele yoothanla? Munsome aHeeberi 5:14, nuuvinya mwaakhule makoho anttharelana:
Hata noonaka okhala vookhweya waavekela atthu akina wiira enipakele yoothanla. Eseeni ninreerela nhu odhuwela ovirikaniha?
Eseeni en’ya wookhaliherani ohudhiha yawuupusera ya nrima nnyu ni opaka dhoothanla dhooreera?
Like a map, our conscience helps us decide where to go in life
5. Nttittimihe yawuupusera ya nrima ya atthu akina
Okhala wiira atthu toovirikana, tivondho, annipaka dhoothanla dhoovirikana. Ndho, nin’ya woonihera dhai wiira ninnittittimiha yawuupusera ya nrima ya atthu akina? Moone matakihero maili:
Ntakihero 1: Nrokora mmodha onindhivela wootta makhiyaaxe, onnithamela muloko mmodha arokora awaatta ohinaadhivela awa owoona athiyana yontte makhiyaaxe.
Munsome aRoma 15:1 ni 1 aKorinto 10:23, 24, nuuvinya mwaakhule makoho anttharelana:
Nkhama dhinlotta awa iversu idha, eseeni nrokora a ntakihero na odhulu onreerela iye opaka? Ndho nyuwo mun’ya ovarihela dhai nteko iversu idha, akhala wiira ntthu mmodha onnoona okhala yoohiloka opaka etthu emodha, yawuupusera ya nrima nnyu enoona awa okhala yoohitthekeya opaka?
Ntakihero 2: Munna mmodha oodhuwela wiira Biibiliya khankhootthihera owurya eviinyu vakhaani, masi owo onnithanla ohiwurya dhoowurya dhoohapala. Ndho, nihiku nimodha onnilaleiwa orowa oca ettheko ya munna mmodha. Noomala ophiya opuro owo, onniwoona anna ewuryaka.
Munsome Musuweli 7:16 ni aRoma 14:1, 10, nuuvinya mwaakhule makoho anttharelana:
Nkhama dhinlotta awa iversu idha, eseeni munna a ntakihero na odhulu onreerela iye opaka? Ndho nyuwo mun’ya ovarihela dhai nteko iversu idha, akhala wiira munnoona okhala yootthekeya opaka etthu emodha, yawuupusera ya nrima ya ntthu nkina enoona awa okhala yooloka?
Eseeni munreerela nnyu opaka wiira nwerye opaka dhoothanla dhooreera?
1. Munvekele Yehova wiira ookhalihereni odhuwela etthu yoopaka.—Yakobo 1:5.
2. Nthokodhe mBiibiliyani ni iliivuru dhihu wiira mphwanye malakihero oovareleya nteko. Munvekele miruku munna aahiidho nrokora awunnuwa mwa omunepani.
3. Muupuwelele moopora yawuupusera ya nrima nnyu ni yawuupusera ya nrima ya atthu akina en’ya awa okhala mwaha wa yoothanla nnyu.
ATTHU AKINAKU ANLOTTA WIIRA: “Kiniira ele kintthuna aka okhala wiira ekumi ti yaaka. Tivondho nkintthuna odhuwela moonelo wa atthu akina.”
Seeni eraawa etthu yootthuneya ovaha efaita moonelo wa Muluku ni moonelo wa atthu akina?
WUULUULA
Wiira niwerye opaka dhoothanla dhooreera, nihaana odhuwela moopora Yehova onoonela iye mwaha owo ni moopora atthu akina an’ya awa woonela yoothanla nhu.
Ipontu dhuulupale
Mun’ya owerya dhai opaka dhoothanla dhinindhivela Yehova?
Mun’ya owerya dhai ohudhiha yawuupusera ya nrima nnyu?
Mun’ya woonihera dhai wiira munnittittimiha yawuupusera ya nrima ya atthu akina?
NTHOKODHE ITTHU DHIKINA
Mun’ya owerya dhai opaka dhoothanla dhin’ya olipiha waataana winyu ni Muluku?
“Mpake Dhoothanla Dhininvuwiha Muluku” (A Sentinela, 15 de Abril de 2011)
Moone moopora Yehova onnivaha iye miruku.
Moone etthu enkhalihenre nlopwana mmodha opaka yoothanla yoovila.
Yehova Olaihera Onivaha Itthu Dhootheene Dhooreera 5:46 Eseeni ninreereala nhu opaka akhala wiira Yehova khannivaha mBiibiliyani nlamulo nooluluwanya?
“Niire Khuta Yoothanla Muntthuna Nlamulo Nooluluwanya na MBiibiliyani?” (A Sentinela, 1 de Dezembro de 2003)
Nkhama dhiidhale maapha aninkhalihera awa ntthu odhuwela ephuro yooreerela otthara, yawuupusera ya nrima nhu enninikhalihera othanla ephuro yooreerela otthara mweekumini mwihu