YOOSOMA 41
Eseeni Biibiliya Onlotta iye Voohima dha Orupihana?
Atthu awaatta owuuliha muru olotta miyaha dhinvarihana ni orupihana. Biibiliya khanvitha mwaha owo, masi vaavo onlotta iye mwaha owo, onlotta mwa enamuna yoottittimiheya. Ele Biibiliya onlotta iye enniniphwanyiha mireerelo. Okhala wiira Yehova Mpattusa nhu onnidhuwela ele eri yooreera wa hiyo. Tivondho, owo onnilotta etthu ninreerela nhu opaka wiira ninhakalalihe ni etthu en’ya onikhalihera okhala oohakalala ni nhoolo ophwanya ekumi yoohimala.
1. Yehova onoonela dhai orupihana?
Orupihana yoovaha enkhuma wa Yehova. Ndho owo ontthuna wiira atthu pahi athelanne epake elo. Yoovaha ela khenaakhalihera pahi anamathelana waayara anamwane, masi ennaavaha eparakha anamathelana wooniherana omphetana ni otthunana nkina ni nkhwe nkhama apattuseriwa awa. Nuulumo na Muluku ninlotta wiira: “Mutteliweke murima ni mwara òmiravo anyu!” (Miruku 5:18, 19) Yehova ontthuna wiira anamathelana eroromelane nkina ni nkhwe. Ndho elo, ennimwiiriha Nkiristau ohikhala-khala araruwaka.—Munsome aHeeberi 13:4.
2. Orupihana woohiloka eseeni?
Biibiliya onlotta wiira: “ale anrupihana voohiloka . . . khanaakhela Omwene wa Muluku.” (1 aKorinto 6:9, 10) Biibiliya onnirumeela nuulumo na ekereku porneia ahimaka orupihana woohiloka. Nuulumo nna ninhela mpuwa (1) orupihana atthu ehithelannea (moone enoota), (2) orupihana alopwanaru aahiidho athiyanaru, ni (3) orupiha inama. Vaavo ninkhootta nhu inamuna dhootheene dha “orupihana woohiloka”, ninnihakalaliha Yehova ni ninniphwanya mareeliho awaatta.”—1 aTesaloonika 4:3.
NHUDHE ITTHU DHIKINA
Moone moopora wootthawa orupihana woohiloka. Nitho moone mireerelo mun’ya nnyu ophwanya mwaha wookhalana mweettelo wooreera.
3. Ntthawe orupihana woohiloka
Ookhala mmiravo mmodha onromoliwa mBiibiliyani oniitthaniwa Yoosefe yoowo oonihenre ororomeleya wa Muluku akhoottaka orupa ni mwaara aaneene. Munsome Maphattuwelo 39:1-12, nuuvinya mwaakhule makoho anttharelana:
Eseeni yaamwiirinhe Yoosefe otthawa? —Moone evesiikulu 9.
Nyuwo nnoona wiira owo aahipaka yoothanla yooreera? Mwaha wa seeni?
Amiravo an’ya ontakiha dhai Yoosefe ni otthawa orupihana woohiloka? Moone EVIIDIYU.
Yehova ontthuna wiira nitthawe orupihana woohiloka. Munsome 1 aKorinto 6:18, nuuvinya mwaakhule makoho anttharelana:
Itthu seeni dhaaya omwiiriha ntthu opaka orupihana woohiloka?
Mun’ya owerya dhai otthawa orupihana woohiloka?
4. Nyuwo nnoowerya okhootta dhaweeha
Eseeni yaaya onooceeliha waakhwanihera yoolakela nhu ya otthawa orupihana woohiloka? Moone EVIIDIYU, nuuvinya mwaakhule nikoho ninttharelana.
Nkhama moonne nnyu eviidiyu, munna ole aahidhuwela wiira miyuupuwelo ni miteko-dhe dhammwiiriha ohikhala oororomeleya wa mwaariye. Eseeni opanke iye noomala odhuwela elo?
Ivaara dhikina, hata Makiristau oororomeleya ahaana wiilipihera wiira ehiye miyuupuwelo dhoohiloka. Eseeni en’ya onikhalihera oxaka miyuupuwelo dhoohiloka? Munsome aFilipi 4:8, nuuvinya mwaakhule makoho anttharelana:
Itthu seeni ninreerela nhu wuupuwela?
Onsoma Biibiliya ni oluttuweliwa ovara nteko wa Yehova on’ya onikhalihera dhai okhootta dhaweeha?
5. Malamulo a Yehova anninikhalihera
Yehova odhuwela itthu dhinnipwanyiha mireerelo. Tivondho, owo onninileela moopora wookhapelela mweettelo nhu ni mireerelo nin’ya nhu ophwanya mwaha wa opaka elo. Munsome Miruku 7:7-27 aahiidho moone EVIIDIYU, nuuvinya mwaakhule makoho anttharelana.
Mmiravo onromoliwa yawaatikhiwa ela aiphwanyinhe dhai yaweeha yuulupale?—Moone Miruku 7:8, 9.
Moovarihana ni Miruku 7:23, 26, orupihana woohiloka onnikhumihera mixankiho dhuulupale. Nakhapelela mweettelo nhu mixankiho seeni nin’ya nhu oxaka?
Okhapelela mweettelo nhu on’ya onikhalihera dhai ophwanya ekumi yoohimala?
Atthu akinaku anuupuwela wiira ele Biibiliya onlotta iye voohima dha orupihana athiyanaru aahiidho alopwanaru kahi etthu yootakhala. Masi Yehova, Muluku oopheta, owo ontthuna wiira atthu ootheene ephwanye ekumi yoohimala. Ndho wiira niphwanye ekumi yoohimala, nihaana wiiwelela ele onniruma iye. Munsome 1 aKorinto 6:9-11, nuuvinya mwaakhule nikoho ninttharelana:
Niire etthu eninnanara Muluku ni ninreerela nhu oxaka orupihana alopwanaru aahiidho athiyanaru pahi?
Wiira ninhakalalihe Muluku, ootheene nhu nihaana opaka marukunuso muulupale mweekumini mwihu. Niire onnireerela wiilipihera opaka elo? Nsome Esalimo 19:9, 12, nuuvinya mwaakhule makoho anttharelana:
Nyuwo nnoona wiira malamulo a Yehova tooreera? Mwaha wa seeni?
Yehova ohaakhalihera atthu awaatta wiiwelela malamulo-ye voohima dha mweettelo wooreerera. Nitho owo onawookhaliherani opaka elo
ATTHU AKINAKU ANLOTTA WIIRA: “Akhala wiira atthu aili annitthunana pooti orupihana okhala wiira elo kahi etthu yootthekeya.”
Nyuwo nnoonela dhai?
WUULUULA
Orupihana yoovaha ya Muluku avanhe iye anamathelana.
Ipontu dhuulupale
Itthu seeni dhinvarihana ni orupihana woohiloka?
Etthu seeni en’ya onikhalihera otthawa orupihana woohiloka?
Vaavo niniiwelela nhu malakihero a Yehova mireerelo seeni nimphwanya nhu?
NTHOKODHE ITTHU DHIKINA
Moone seeni Muluku ontthuna iye wiira nlopwana ni nthiyana ankhala vamodha elepihe othelana-wa.
“Eseeni Biibiliya Onlotta iye Voohima dha Okhala Atthu Aili Nhithelanne?” (Mwaha ori nsaaitini jw.org)
Hata Biibiliya alottaka wiira orupihana athiyanaru aahiidho alopwanaru etthu yootthekeya, moone seeni nihinreerela nhu wanyoka atthu anrupihana athiyanaru aahiidho alopwanaru.
“Niire Etthu Yootthekeya Orupihana Athiyanaru Aahiidho Alopwanaru?” (Mwaha ori nsaaitini jw.org)
Moone moopora malamulo a Muluku voohima dha orupihana annikhapelela awa.
“Niire Orupihana Mwaano Onoolikana ni Orupihana?” (Mwaha ori nsaaitini jw.org)
Wiira moone etthu yaamwiirinhe nlopwana mmodha orukunusa mweettelo-ye wiira andhivelihe Muluku, nsome yawiiraneya eni: “Awo Yaanikittittimiha.”
“Biibiliya Onnirukusa Ikumi dha Atthu” (A Sentinela, 1 de Abril de 2011)
a Enoota: Ohiya pahi inamuna dha orupihana dhilottiwe, nuulumo nawi porneia ninhela mpuwa orupihana mwaano, orupihana waamakhuttu, waapaapela aahiidho opharaphara elopwana aahiidho ethiyana ya ntthu nkina.