Mun’ya Owerya Dhai Okhalana Ettheko Yoohakalala?—Epaarti 1

Atthu athelanne naanano antthuna wiira ohakalala yaaraawana nihiku na ekasamento okhale wa mahiku ootheene. Elo pooti oweryaneya. Makristau athelanne khalai ni aniilipihera weettela miruku dhimphwanyaneya mBiibiliyani annidhuwela wiira elo enniweryaneya.

1. Miruku seeni Biibiliya onaavaha iye alopwana oothela?

Yehova oonthanla nlopwana oothela wiira akhale muru wa ettheko. (Munsome aEefeso 5:23.) Yehova onlipelela wiira dhoothanla dha nlopwana oothela dhaakhalihere atthu ootheene a vathekoni. Biibiliya onnaaleela alopwana oothela wiira ‘Nhihiye ompheta mwaarinyu.’ (aEefeso 5:25) Elo entaphulelani? Nlopwana oothela oopheta, onninkhapelela saana mwaariye owaani ni vamwaattiwa. Yeene onninkhapelela ni onnipaka dhootheene onwerya iye wiira anvahe mwaariye itthu dhininthowa nkhalelo wa veerutthuni ni mmuupuweloni. (1 Timootheyo 5:8) Etthu yootepa otthuneya, yeene onninkhapelela mwaariye nkhalelo woomunepani. (Matheyo 4:4) Mwa ntakihero, yeene pooti ovekela ni onsoma Biibiliya ni amwaariye. Nlopwana onaakhapelela amwaariye moopheta, onnilipiha waataana-we ni Yehova.—Munsome 1 Pedro 3:7.

2. Miruku seeni Biibiliya onaavaha iye athiyana ootheliwa?

Nuulumo na Muluku ninlotta wiira ‘Nthiyana ootheliwa ohaana waattittimiha vawaatta a mamune.’ (aEefeso 5:33) Owo on’ya owerya dhai opaka elo? Owo ohaana ovaha efaita mikhalelo dhooreera dha amamune ni wiilipihera-wa onkhapelela ni waakhapelela anaahima. Nitho owo pooti opaka elo akhaliheraka dhoothanla dha amamune ni olottana mwa enamuna yooreerela, hata amamune ehikhanle Nkiristau. Owo ohaana oxaka waalotta amamune moonanara ohoolo wa atthu akina.

3. Anamathelana an’ya olipiha dhai ekasamento-ya?

Alottaka voohima dha anamathelana Biibiliya onlotta wiira: ‘Oowaili anookhala erutthu emodharu.’ (Matheyo 19:5) Elo entaphulela wiira anamathelana ahaana wiilipihera wiira ophetana-wa ohivukuwe. Awo annipaka elo evirihaka okathi wa waatta eri vamodha, eleelanaka muupuwelo ni moonelo-ya mwa enamuna yoophetana ni moohikhuwana etthu. Voohikhala Yehova, khaavo-tho ntthu nkinaku ootepa otthuneya mweekumini-mwa onxira ole athelanna awa. Tivondho, alopwana oothela ni athiyana ootheliwa ahaana okhalana ephoole wiira ahidhiveliwe ni ntthu nkina ohikhanle ole othelanne iye.

NHUDHE ITTHU DHIKINA

4. Nlopwana oothela ohaana waapheta ni waakhapelela amwaariye

EVIIDIYU: Mwaaphete a Mwaarinyu Nkhama Dhiidhale Nniipheta Nnyu (9:53)

• Nlopwana oothela on’ya woonihera dhai wiira onnaapheta amwaariye?

Munsome aKolosi 3:12, nuuvinya mwaakhule nikoho ninttharelana:

• Nlopwana oothela on’ya woonihera dhai mikhalelo dhinlottiwa eversiikulu ela?

5. Nthiyana ootheliwa ohaana omphenta ni onttittimiha mamune

Biibiliya onnintumererya nthiyana ootheliwa waattittimiha a mamune hata ehinrumeelaka Yehova. Munsome 1 Pedru 3:1, 2, nuuvinya mwaakhule makoho anttharelana:

• Akhala wiira amamuninyu khaninrumeela Yehova moohakanyera nyuwo munnitthuna vawaatta wiira ekanrumeela. Eseeni nnoona nnyu wiira enookhalihera vawaatta, niire waalaleerya amamuninyu okathi wootheene aahiidho owoonihera oreera nrima ni waapheta? Mwaha wa seeni?

Evaraka itthu vamodha, nlopwana ni nthiyana pooti opaka dhoothanla dhooreera. Ivaara dhikina nthiyana pooti ohaakhulela moonelo wa amamune. Ekhweeli wiira ivaara dhikina owo pooti olotta moonelo-ye, masi ohaana opaka elo mwa nttittimiho, ahiliyalaka wiira Yehova onvanhe nlopwana nritti wa opaka dhoothanla dhooreera wiira akhalihere ettheko. Ndho owo ohaana opaka onwerya iye wiira akhalihere dhoothanla dha amamune. Elo enamuna emodha nthiyana ootheliwa okhanle iye opaka wiira akhalihere ettheko-ye okhala yoohakalala. Munsome 1 Pedru 3:3-5, nuuvinya mwaakhule nikoho ninttharelana:

• Yehova onoonela dhai okathi nthiyana oninttittimiha iye mamune?

6. Onniweryaneya ophuka mixankiho nkasamentoni

EVIIDIYU: Moopora Woolipiha Ekasamento (5:44)

• Nkhama moonne nnyu eviidiyu, eseeni enoonihera wiira anamathelana ale yaahipacera ottaivelana nkina ni nkhwe?

• Eseeni yaapanke awa wiira elipihe ekasamento-ya?

Munsome 1 aKorinto 10:24 ni aKolosi 3:13. Noomala osoma dhawaatikhiwa idha, mwaakhule nikoho ninttharelana:

• Miruku dhiri dhawaatikhiwa idha, dhin’ya olipiha dhai ekasamento?

Biibiliya onlotta wiira nihaana ottittimihana nkina ni nkhwe. Onttittimiha ntthu onhela mpuwa onreerela nrima ni omoonihera opheta. Munsome aRoma 12:10, nuuvinya mwaakhule makoho anttharelana:

• Niire nlopwana aahiidho nthiyana ohaana woonihera nttittimiho akhala wiira nkinaku-ya oopacera? Eseeni enwiirihani olotta dhiidho?

WUULUULA

Nlopwana ni amwaariye anoowerya okhala oohakalala akhala wiira oowaili anniphetana, ottittimihana ni weettela miruku dha mBiibiliyani.

Ipontu dhuulupale

• Eseeni nlopwana oothela onreerela iye opaka wiira akhalihere ekasamento-ye okhala yoohakalala?

• Eseeni nthiyana ootheliwa onreerela iye opaka wiira akhalihere ekasamento-ye okhala yoohakalala?

• Akhala wiira moothela aahiidho mootheliwa malakihero seeni a mBiibiliyani an’ya okhalihera ekasamento nnyu?

NTHOKODHE ITTHU DHIKINA

Moone malakihero oovareleya nteko an’ya okhalihera ekasamento nnyu okhala yoohakalala.

Ettheko Nnyu Enoowerya Okhala Yoohakalala (Ebroxuura)

Moone eviidiyu ya ncipo enttittimihera mareeliho ntthu omphwanya iye vaavo oniiwelela iye miruku dha Muluku nkasamentoni.

Um Amor Verdadeiro 4:26

Moone ele entaphulela awa ottittimiha okhulupale wa nlopwana.

“Athiyana Ootheliwa, Seeni Munreerela Nnyu Waakhulela Okhulupale wa Nlopwana?” (A Sentinela, 15 de Maio de 2010)

Eseeni yaakhalihenre anamathelana amodha ovilela mixankiho dhuulupale ohela mpuwa omwalana?

Nikhaliheriwaka ni Muluku Nootthikela Olipiha Ekasamentu Nhu 5:14