Nhihiye Olipiha Waataana Winyu ni Yehova

Orwela wa yoosoma ela ya Biibiliya, nyuwo moohudha itthu dhawaatta voohima dha Yehova. Ndho, itthu dhootheene nhudhe nnyu dhihaacerera ompheta winyu Yehova. Woonawene, moovahererya ekumi nnyu wa Yehova mpatisiwa. Masi akhala wiira nleelo khampanke elo, woonawene munnuupuwela opaka mavalo awo moohilekela. Ndho noomala opatisiwa khontaphulela wiira moomaliha opaka itthu dhootheene. Tivondho, tivootthuneya ohihiya olipiha waataana winyu ni Yehova mahiku ootheene. Mooporani?

1. Seeni munreerela nnyu ohihiya olipiha waataana winyu ni Yehova?

Nihaana wiilipihera ohihiya olipiha waataana wihu ni Yehova. Mwaha wa seeni? “Wira nihikhala-khale nihiyaka waamini” niire dho, wiira nihinttaivele Yehova. (aHeeberi 2:1) Eseeni en’ya onikhalihera ohihiya onrumeela Yehova moororomeleya? Nihaana okhala oluttuweliwa nteko woolaleerya ni waadhya inamuna wiira naacerere nteko nnivarela nhu Yehova. (Munsome aFilipi 3:16.) Onrumeela Yehova etthu yooreera ninreerela nhu opaka!—Esalimo 84:11.

2. Eseeni munreerela nnyu ohihiya opaka?

Hata yoosoma nnyu ela ya Biibiliya eyaaka omala, ekumi nnyu nkhama nrumeyi a Yehova enoopaceraru. Biibiliya onlotta wiira nihaana ‘owara ontthu opheya’, niire dho, nihaana otakiha ontthu wa Yehova nipakaka itthu dhootheene ninwerya nhu. (aEefeso 4:23, 24) Wiira nipake elo, nihaana ohihiya onsoma Biibiliya ni orowela mithukumano dha mmulokoni. Akhala wiira khaninhiya ohudha itthu ipheya voohima dha Yehova, mikhalelo-dhe ni opaka marukunuso ootepa otthuneya mweekumini mwihu, ninoohakalaliha nrima wa Tiithi nhu, Yehova.

3. Yehova on’ya wookhaliherani dhai ohihiya okhala nxirikha-ye?

Biibiliya onlotta wiira: ‘Muluku onoomalihera ohudha winyu. Owo onawoolipihani, onawoovani ikuru ni onooweemesani.’ (1 Pedru 5:10) Ootheene nhu ninneehereriwa. Masi Yehova onninivaha itthu ninramela nhu wiira nihihiye onroromela. (Esalimo 139:23, 24) Yehova onnilaihera woovahani otthuna ni owerya wiira nwerye onrumeele moororomeleya.—Munsome aFilipi 2:13.

NHUDHE ITTHU DHIKINA

4. Nhihiye olotta ni Nxirikha nnyu muulupale

Ovekela ni onsoma Biibiliya ohookhaliherani okhala nxirikha a Yehova. Masi itthu idha dhin’ya wookhaliherani dhai otepa omwaattamela yeene?

Nsome Esalimo 62:9, nuuvinya mwaakhule nikoho ninttharelana:

• Oreheererya saana mavekelo nnyu on’ya olipiha dhai waataana winyu ni Yehova?

Nsome Esalimo 1:2, nuuvinya mwaakhule nikoho ninttharelana:

• Mun’ya olokihera dhai yoosoma nnyu ya Biibiliya wiira nlipihe waataana winyu ni Yehova?

Mun’ya wiiriha dhai yoosoma nnyu ya omwaneene okhala yoohakalaliha? Wiira moone itthu dhikina, moone EVIIDIYU, nuuvinya mwaakhule makoho anttharelana.

EVIIDIYU: Mwiirihe Yoosoma Nnyu ya Omwaneene Okhala Yoohakalaliha (5:22)

• Malakihero seeni moonne nnyu nviidiyuni, mwaatthuna nnyu ovarihela nteko?

• Miyaha seeni mwaatthuna nnyu osoma?

5.Nkhalena dhoolukama dhomunepani

Okhalana dhoolukama mmutekoni mwa Yehova onawookhaliherani olipiha waataana winyu ni yeene. Moone EVIIDIYU, nuuvinya mwaakhule nikoho ninttharelana.

EVIIDIYU: Ekumi Yoohakalaliha (3:31)

• Nkhama moonne nnyu eviidiyu, okhalana dhoolukama dhomunepani onkhalihenre dhai Cameron?

Kahiyo wiira atthu ootheene anniwerya othamela elapo ekina wiira ekhalihere nteko woolaleerya. Masi hata eri dhiidho, ninoowerya okhalana dhoolukama. Munsome Miruku 21:5, nuuvinya nlotte dhoolukama muntthuna nnyu okhalana . . .

• mmulokoni.

• nteko woolaleerya.

Yawaatikhiwa ela en’ya wookhaliherani dhai waakhwanihera dhoolukama dhinyu?

Dhoolukama munreerela nnyu okhalana

• Okocihera saana mavekelo nnyu.

• Onsoma Biibiliya ootheene.

• Waadhuwela atthu ootheene mmulokoni.

• Opacera wiiriha yoosoma ya Biibiliya.

• Orumeela nkhama piyoneeru aahiidho piyoneira okhalihera aahiidho orumeela nkhama piyoneeru okilatheya.

• Akhala wiira mwa munna, wiilipihera wiira nkhale nrumeyi ookhalihera.

WUULUULA

Nhihiye olipiha waataana winyu ni Yehova ni okhalana dhoolukama dhomunepani. Ndho mwapaka elo, nnookhala ohaakalala nenna-va ni nhoolo nnoophwanya ekumi yoohimala!

Ipontu dhuulupale

• Seeni munreerela nnyu okhupali wiira Yehova onawookhaliherani owerya onrumeela moororomeleya?

• Mun’ya owerya dhai olipiha waataana winyu ni Yehova?

• Okhalana dhoolukama dhomunepani on’ya olipiha dhai waataana winyu ni Yehova?

NTHOKODHE ITTHU DHIKINA

Etthu seeni Yehova onvaha iye efaita, niire opaka etthu emodha yuulupale enoonihera waamini aahiidho okhala oororomeleya mahiku ootheene?

Nkhale Oororomeleya Nkhama Abrahaamu 9:20

Hata nrumeyi oororomeleya a Yehova onnihiya okhala oohakalala. Moone moopora okhanle iye otthikela okhala oohakalala.

Ntthikele Okhala Oohakalala Orwela wa Yoosoma ya Biibiliya ni Wuupuwelela 5:25

Mun’ya owerya dhai okhalana dhoolukama dhomunepani ni waakhwanihera?

“Nkhalena Dhoolukama Dhininvuwiha Mpattusa Nnyu” (A Sentinela, 15 de Julho de 2004)

Seeni oraawa vootthuneya Nkiristau okhalana waamini woolipa? Ndho mun’ya owerya dhai opaka elo?

“Nikhalena Waamini Woolipa—‘Nihiku na Yehova Ninnaattamela’” (A Sentinela, 15 de Maio de 2009)