YOOSOMA 52
Seeni Oraawa Vootthuneya Othanla Saana Ikuwo Dhihu ni Wiikociha?
Ootheene nhu hiyo, nookhalana ikuwo dhinnidhivela owara ni wiikociha. Masi hata eri dhiidho, Biibiliya ookhalana malakihero an’ya onnikhalihera owara ikuwo mwa enamuna enindhivela ni eninhakalaliha Yehova. Nirowe noone malakihero awo.
1. Malakihero seeni an’ya onikhalihera othanla saana ikuwo ninreerela nhu owara ni moopora wa wiikociha?
Hiyo na arumeyi a Yehova. Tivondho, nihaana wiikociha saana ni owara mwa enamuna yooreerela ‘nkhama vaniphwanelela awa, vookhalela ni voohuuliha muru.’ Vaavo nimpaka nhu elo, ninoonihera wiira na atthu “animoova [aahiidho aninkokhorela] Muluku.” (1 Timootheyo 2:9, 10) Nirowe nithokorerye malakihero masese: (1) Nihaana ‘owara ikuwo dhoophwanelela’. Woonawene nyuwo nhoona wiira vaavo atthu a Yehova anrowela awa mithukumano mmulokoni anwara ikuwo dhoovirikana. Masi ikuwo dhihu ni moopora ninkocihera nhu maihi ninnoonihera wiira ninninttittimiha Muluku nhu, Yehova. (2) Nihaana owara ‘ikuwo dhookhalela’, elo entaphulela wiira nihaana oxaka owara ikuwo dhawooneela, dhoopata aahiidho dhootirya ni dhinoonihera wiikuserera. (3) Hiyo ninniwara ikuwo ‘dhoohuuliha muru’ nixakaka owara ikuwo dha muuta aahiidho dha naanano dhintumererya mweettelo woohiloka wa olumwinku ola wootakhala. (4) Nkhalelo nhu wootheene ohaana woonihera wiira na atthu “animoova Muluku” aahiidho aninkokhore Muluku eekhweeli.—1 aKorinto 10:31.
2. Annihu Makiristau an’ya woonela dhai ikuwo dhihu?
Ekhweeli wiira nihaana othanla ikuwo ninreerela nnhu owara, masi nihaana wuupuwelela moopora atthu akinaku an’ya awa woonela ikuwo dhihu. Nihaana wiilipihera wiira ikuwo dhihu ihaakhumulihe atthu. Ohiya-vo, nintthuna ‘waadhiveliha atthu akina, nivaraka itthu dhooreera wiira naalipihe.’—Munsome aRoma 15:1, 2.
3. Moopora ninwara nhu on’ya waakhalihera dhai atthu akina ondhuwela Yehova?
Nihaana owara saana okathi wootheene, saasaasa okathi nin’ya nhu onthukumanoni ni nteko woolaleerya. Hiyo khanintthuna wiira ikuwo dhihu ivahe onamoona woohiloka aahiidho iwiirihe atthu akina okhootta wiiwa nhupi ninlaleya nhu. Ohiya-vo, nintthuna owara mwa enamuna en’ya ‘oreeriha ohudhiha wa Moopoli nhu, Muluku,’—Tito 2:10.
NHUDHE ITTHU DHIKINA
Moone moopora owara wihu ni wiikociha wihu on’ya awa waakhalihera atthu akina okhupali wiira hiyo na Makiristau eekhweeli.
Mawarelo nhu ni moopora niniikociha nhu onnoonihera akhala wiira ninnaattittimiha makhulupale a kuveernu aahiidho naari. Emodha -modharu, mawarelo nhu ni moopora niniikociha nhu onnoonihera akhala wiira ninninttittimiha Yehova, hata owo adhuwelaka ele eri vanrimani vihu
4. Mawarelo nhu annoonihera wiira ninnittittimiha Yehova
Nthowa seeni nuulupale ninniiriha ovaha ephoole ikuwo ninwara nhu? Nsome Esalimo 47:3, nuuvinya mwaakhule makoho anttharelana:
Hiyo na arumeyi a Yehova. Ndho elo ennikhalihera dhai okocihera ikuwo ninwara nhu?
Nnoona wiira tivooreera okociha ikuwo ninwara nhu narowaka nteko woolaleerya ni mithukumano? Mwaha wa seeni?
5. Moopora woopaka dhoothanla dhooreera voohima dha ikuwo dhoowara ni wiikociha
Ikuwo dhihu khadhintthuneya okhala dha nsurukhu wawaatta, masi dhintthuneya okhala dhooreerela, dhoofuliwa dhooratteleya moovarihana ni opuro niri nhu. Munsome 1 aKorinto 10:24 ni 1 Timootheyo 2:9, 10. nuuvinya moone seeni nihinreerela nhu owara itiipu dha ikuwo dhinttharelana . . .
Dhoohireera aahiidho dhoohiphwanelela.
Dhootirya, dhooperaperiwa ni dhawoonela aahiindho dhookhuveya.
Khalai, Yehova aahava aisarayeeli malamulo awaatta anrumeelaka Moise. Makiristau khankhanyereriwa weettela malamulo awo. Masi malamulo awo anninihudhiha itthu dhawaatta voohima dha Yehova. Munsome Otumererya 22:5, nuuvinya mwaakhule nikoho ninttharelana:
Seeni ninreerela nhu oxaka etiipu ya ikuwo aahiidho okocihera maihi ammwiiriha nlopwana okhala nkhama nthiyana ni nthiyana okhala nkhama nlopwana?
Munsome 1 aKorinto 10:32, 33 ni 1 Yohani 2:15, 16, nuuvinya mwaakhule makoho anttharelana:
Seeni oraawa wooreera wiikoha wiira: ‘Niire mawarelo aka pooti waanyoonyiha atthu akina mmulokoni ni nttetthe kinkhala aka?’
Nttetthe munkhala nnyu, atthu anwara ni aniikociha dhai?
Nnoona wiira vanreerela Nkiristau owara ni wiikociha moopora owo? Mwaha wa seeni?
Hiyo ninoowerya owara ni wiikociha mwa inamuna dhoovirikana, inindhivela Yehova
ATTHU AKINAKU ANLOTTA WIIRA: “Kahi etthu yootthuneya wuupuwelela moopora atthu akinaku anoonela awa. Miyo kookhalana idireitu ya owara khuta etthu kintthuna aka.”
Niire nyuwo munnikhupali elo? Mwaha wa seeni?
WUULUULA
Vaavo nimpaka nhu dhoothanla dhooreera niwaraka ikuwo dhooloka ni wiikociha saana ninnoonihera wiira ninninttittimiha Yehova.
Ipontu dhuulupale
Seeni moopora ninwara nhu ni niniikociha nhu oraawa wootepa otthuneya wa Yehova?
Malakihero seeni an’ya onikhalihera othanla saana ikuwo dhooreerela owara ni okocihera maihi?
Seeni mawarelo nhu akhanla awa owiiriha atthu akina otthuna aahiidho okhootta ondhuwela Yehova?
NTHOKODHE ITTHU DHIKINA
Moone itthu ikuwo dhinyu dhinoonihera awa ontthu nnyu.
“Ikuwo Dhinyu Dhinooniherani Voohima dha Ontthu Nnyu?” (Mwaha ori nsaaitini jw.org)
Moone akhala wiira tivooreera aahiidho naari ompaka Tatuwaaxe veerutthuni vinyu.
“Eseeni Biibiliya onlotta iye Voohima dha Ompaka Tatuwaaxe?” (Mwaha ori nsaaitini jw.org)
Moone malakihero makina an’ya wookhaliherani othanla ikuwo munreerela nnyu owara.
“Niire Mawarelo Nnyu Anninvuwiha Muluku?” (A Sentinela, Setembro de 2016)
Moone moopora nthiyana mmodha aatthuna ondhiveliha Muluku, ohundhe iye waakhulela dhoothanla dha atthu akina voohima dha owara.
“Moopora Kaawaraka ni Wiikociha Naari Nluku Naakikakattula” (Despertai!, 22 de Dezembro de 2003)