YOOSOMA 54
Nteko Seeni ‘Nrumeyi Oororomeleya ni Aakhili’ Onvara iye?
Yesu Muru wa muloko wa Ekiristau. (aEefeso 5:23) Nenna-va owo ori wiirimu ni onnaavaha malakihero atthareli-ye ari valaponi anrumeelaka ‘nrumeyi oororomeleya ni aakhili.’ (Munsome Matheyo 24:45) Yesu onthanla nrumeyi ni anvaha okhulupale. Masi hata avahiwe okhulupale, ‘nrumeyi’ owo onninrumeela Kiristu vamodha ni anne. Taani ori ‘nrumeyi oororomeleya ni aakhili’? Ndho owo onnikhapelela dhai?
1. Taani ori ‘nrumeyi oororomeleya ni aakhili’?
Okhuma khalai Yehova aninrumeela nlopwana mmodha aahiidho ekhurupu ya alopwana wiira yaavahe malakihero atthu-ye. (Malakhiya 2:7; aHeeberi 1:1) Noomala Yesu okhwa, arummwa vamodha ni asitokweene a oYerusaleemu yaanipaka elo. (Miteko 15:2) Emodha-modharu enniireya olelo-va, Yehova onnirumeela ekhurupu ekhaani ya asitokweene wiira evahe eyooca ya omunepani ni ekhapelele nteko woolaleerya. Ekhurupu elo eniitthaniwa Nikhuru Noolamulela na Anamoona a Yehova. Ekhurupu elo eniirela mphantta ‘nrumeyi oororomeleya ni aakhili, yoowo othanliwe ni pwiya iye Yesu’ wiira akhapelele miritti idha. (Matheyo 24:45a) Atthu ootheene aniirela mphantta Nikhuru Noolamulela, Makiristau athanliwe ni munepa wa waarya wa Muluku. Noomala awo omala ekumi-ya valaponi an’ya olamulela vamodha ni Kiristu wiirimu.
2. Nrumeyi oororomeleya onaakawela dhai eyooca ya omunepani atthu a Yehova?
Yesu olontte wiira nrumeyi oororomeleya ‘aamwakawela eyooca [atthareli a Yesu] okathi wooreerela.’ (Matheyo 24:45b) Nkhama dhiidhale eyooca ya veerutthuni ennikhalihera awa okhalana ikuru ni ekumi, emodha-modharu ni eyooca ya omunepani [ele enhudhiha awa Nuulumo na Muluku] enninivaha ikuru ninramela nhu wiira nivikanihe okhala oororomeleya wa Yehova ni nihihiye ovara nteko Yesu onirumme iye ovara. (1 Timootheyo 4:6) Hiyo ninnaakhela eyooca elo ya omunepani, orwela wa mithukumano, asembeleiya, akonkereesu, iliivuru ni iviidiyu dhininleelihera Biibiliya. Nitho eyooca elo enninikhalihera odhuwela yootthuna ya Muluku ni olipiha waataana wihu ni owo.
NHUDHE ITTHU DHIKINA
Moone, seeni ninreerela nhu okhalana ‘Nrumeyi Oororomeleya ni Aakhili’ aahiidho Nikhuru Noolamulela.
Nikhuru Noolamulela ninnaakhapelela Anamoona a Yehova a olumwinku wootheene navahaka eyooca ya omunepani, malakihero ni waakhalihera atthu aphwanyiwe ihasara dha ephattu
3. Atthu a Yehova ahaana okhala ookociheya
Nittharaka malakihero a Yesu, Nikhuru Noolamulela ninnikociha nteko wa Anamoona a Yehova. Nitho etthu emodharu yaaniiraneya ni Makiristau akhalai. Moone EVIIDIYU.
Munsome 1 aKorinto 14:33, 40, nuuvinya mwaakhule nikoho ninttharelana:
Dhawaatikhiwa idha dhinoonihera dhai wiira Yehova ontthuna wiira atthu-ye ekhale ookociheya?
4. Nrumeyi oororomeleya onnikociha nteko nhu woolaleerya
Olaleerya waari nteko wootepa otthuneya Makiristau akhalai yaavara awa. Nsome Miteko 8:14, 25, nuuvinya mwaakhule makoho anttharelana:
Taani yaahoolela nteko woolaleerya eseekulu yoopacera?
Niire Pedru ni Yohani yaahaakhulela malakihero yaavahiwa ni arunmwa akina?
Nteko wootepa otthuneya wa Nikhuru Noolamulela nteko woolalerya. Moone EVIIDIYU.
Yesu oottittimihera wiira etthu yootepa otthuneya olaleerya. Munsome Marko 13:10, nuuvinya mwaakhule makoho anttharelana:
Seeni Nikhuru Noolamulela ninvaha awa efaita nteko woolaleerya?
Seeni nintthuna nhu wiira ‘nrumeyi oororomeleya ni aakhili’ akocihe nteko woolalerya olumwinku ola wootheene?
5. Nrumeyi oororomeleya oninnivaha malakihero
Nikhuru Noolamulela ninnaavaha malakihero Makiristau a olumwinku wootheene. Ndho nno ninthanla dhai malakihero ninvaha awa? Moone mopoora Nikhuru Noolamulela na khalai naapaka awa elo. Nsome Miteko 15:1, 2, nuuvinya mwaakhule makoho anttharelana:
Eseeni yaakhumihera ohiiwanana eriyari ya Makiristau a eseekulu yoopacera?
Taani Paulo ni Baarnaba yaaroihenla awa wiira ephuke mwaha ole?
Nsome Miteko 15:12-18, 23-29, nuuvinya mwaakhule nikoho ninttharelana:
Nihinatthi opaka yoothanla Nikhuru Noolamulela na okathi wa arummwa nanaadhya malakihero a Muluku voohima dha mwaha owo. Ndho nno naapaka dhai elo?—Moone eversu 12, 15, ni 28.
Nsome Miteko 15:30, 31 ni 16:4, 5, nuuvinya mwaakhule makoho anttharelana:
Niire Makiristau akhalai yanaakhulela malakihero yaavahiwa awa ni Nikhuru Noolamulela na okathi ole?
Yehova aarelinhe dhai wiiwelela-wa?
Munsome 2 Timootheyo 3:16 ni Yakobo 1:5, nuuvinya mwaakhule nikoho ninttharelana:
Nikhuru Noolamulela na olelo nimpaka dhai dhoothanla?
ATTHU AKINAKU ANLOTTA WIIRA: “Akhala wiira nyuwo munniiwelela Nikhuru Noolamulela, nandho munaatthara apinaatamu.”
Eseeni enookhupalihani wiira Yesu onnikhalihera Nikhuru Noolamulela?
WUULUULA
Nikhuru Noolamulela ‘nrumeyi oororomeleya ni aakhili’ othanliwe ni Yesu Kiristu. Anna awo annaavaha malakihero ni eyooca ya omunepani Makiristau a olumwinku wootheene.
Ipontu dhuulupale
Taani onthanlale ‘nrumeyi oororomeleya ni aakhili’?
Nikhuru Noolamulela ninnikhapelela dhai olelo?
Niire nyuwo munnikhupali wiira Nikhuru Noolamulela ‘nrumeyi oororomeleya ni aakhili’?
NTHOKODHE ITTHU DHIKINA
Moone moopora Nikhuru Noolamulela ninvara awa nteko olelo.
“Nikhuru Noolamulela na Anamoona a Yehova Eseeni?” (Mwaha ori nsaaitini jw.org)
Moone etthu Nikhuru Noolamulela nimpaka awa wiira yaavahe eyooca ya omunepani yooreerela atthu a Yehova.
Anna a Nikhuru Noolamulela anoonela dhai nteko avahiwa awa ni Yesu?
Mithukumano ni akonkereesu, anoonihera dhai wiira Yehova onnivaha malakihero Nikhuru Noolamulela?