Anna Aili Apheya a Nikhuru Noolamulela

NIHIKU na 5 a Outubro a 2024, yaahilottiwa yoohimmwa yavameekhaaya okathi wa nthukumano wa vamwaakhani: Munna Jody Jedele ni munna Jacob Rumph yaahithanliwa nkhama anna apheya a Nikhuru Noolamulela. Anna ala anninrumeela Yehova moororomeleya mwa iyaakha dhawaatta.

Munna Jedele oyariwe elapo ya oMissouri, wEstados Unidos ni anaan’yari-ye yaaira eri Anamoona a Yehova. Awo yaakhala waattamela nttetthe woothowa anamalaleerya. Ndho mwaha wa elo, aahaadhuwela anna awaatta a elapo ele, yaawo yaara nttetthe ole wiira ekhalihere nteko woolaleerya. Opheta ni wiiraana wa anna ale waahinkhalihera vawaatta. Owo opatisiwe ari rapasi nkhaani nihiku na 15 a Outubro a 1983. Owo waanindhivela vawaatta olaleerya, ndho nuumaliha osoma, aahipacera orumeela nkhama piyoneeru ookilaatheya Setembro a 1989.

Okathi munna Jedele aari iye rapasi, anaan’yari-ye yaaninkusa veene vamodha ni nrokoriye wiira yaasekurye oBeteeli. Elo yaahintumererya munna Jedele vamodha ni nrokoriye okhalana yoolukama ya orumeela oBeteeli, naawo yaahaakhwanihera yoolukama elo. Munna Jedele aahilaleiwa orumeela eBeteeli ya oWallkill Setembro a 1990. Yoothanleliwa yoopacera, yaari Edepartamentu ya Limpeesa ni nuuvira okathi aahithanleliwa ovara Miteko dha Mameetiku.

Nuuvira okathi vakhaani, miloko dha elottelo ya espanyooli dhaahipacera waacerereya ni yaanitthuneya anna awaatta wiira ekhalihere. Ndho mwaha wa elo, munna Jedele aahithaamela mmodha wa miloko idho, apacera ohudhera espanyooli. Nuuvira okathi, owo aahindhuwela piyoneera mmodha aaitthaniwa Damaris a esirkwiitu yeele. Moottharelana, awo yaahithelana, Damaris apacera-tho orumeela oBeteeli.

Mwaakha wa 2005, awo yaahikhuma oBeteeli wiira yaakhapelele anaan’yari-ya. Ndho okathi owo, awo yaarumeela nkhama mapiyoneeru ookilaatheya. Munna Jedele oorumeela nkhama namahudhiha a Eskola ya Nteko wa Opiyoneeru ni orumeela Ekomisawu Enlotta ni Ispitaale ni Ekomisawu Envara Nteko Wooteka ya elapo ele.

Mwaakha wa 2013, anamathelana awo yaahilaleiwa otthikela orumeela oBeteeli ekhaliheraka nteko wooteka wa oWarwick. Ndho okhuma okathi owo, awo aarumeela eBeteeli ya oPatterson ni oWallkill. Munna Jedele oorumeela Edepartamentu ya Otesenyari ni Oteka, ni Edepartamentu Envaha Malakihero Ispitaale. Março a 2023, owo aahithanleliwa okhala namakhalihera a Ekomisawu ya Nteko. Uupuwelaka dhoothanleliwa dhoovirikana aakhenle iye ottuli, owo onlotta wiira: “Ivaara dhikina ntthu onnoova vaavo onaakhela iye yoothanleliwa epheya. Okathi elo eniiraneya awa, tivootthuneya onroromela Yehova okhala wiira owo pooti owiirihani okhala khuta etthu ontthuna iye.”

Munna Rumph oyariwe oCalifórnia, wEstados Unidos. Okathi aari iye mwaana, amaama-ye yaaira ehin’ye olaleerya ni orowela mithukumano, masi awo yaanilipihera onhudhiha owo ikhweeli dha mbiibiliyani. Ohiya-vo, owo anaasekurya apiipi-ye yaawo yaanrumeela Yehova moororomeleya. Apiipi-ye yaahinkhalihera waacerera odhiveliwa-we ni ekhweeli, ndho okathi aariiyena iyaakha 13, aahiveka osomihiwa Biibiliya. Ndho 27 a Setembro a 1992, munna Rumph aahipatisiwa ari rapasi. Moohakalaliha, amaama-ye yaahitthikela okhala namalaleerya ooluttuweliwa ni atthu ootheene a ettheko-ye yaahiya vahoolo mpakha opatisiwa.

Okathi aari iye rapasi, munna Rumph aanoona moopora mapiyoneeru yaahakalala awa. Ndho nuumala owo omaliha eskola, aahipacera orumeela nkhama piyoneeru Setembro a 1995. Mwaakha wa 2000, owo aahithaamela wEquador wiira aakhalihere opuro woothowa anamalaleerya. Ari weiwo owo aahindhuwela piyoneera aaitthaniwa Inga a oCanadá, ndho nuuvira okathi awo yaahithelana. Ndho nuumala awo othelana, yaahirowa orumeela esitati emodha yaarina ekhurupu ekhaani ya anamalaleerya. Olelo-va, esitati elo wookhalawo muloko orina anamalaleerya awaatta.

Nuuvira okathi, munna Rumph ni nrokora Inga yaahaakhela yoothanleliwa ya orumeela nkhama mapiyoneeru a vameekhaaya. Nitho nuuvira okathi vakhaani, yaahaakhela yoothanleliwa ya osekurya miloko. Ndho mwaakha 2011 yaahilaleiwa orowela eskola ya oXileyaadi eturma 132. Nuumala okhuma oXileyaadi, aarumeela mapuro oovirikana yaakhelaka dhoothanleliwa dhoovirikana nkhama orumeela oBeteeli, orumeela nkhama mamisiyonaariyu ni ovara nteko wa esirkwiitu. Nitho munna Rumph aahaakhela eparakha ya okhala namahudhiha a Eskola ya Anamalaleerya a Omwene.

Ndho mwaha wa eretta ya koronaviiru, munna Rumph ni amwaariye yaahitthikela wEstados Unidos. Awo yaahilaleiwa orowa orumeela eBeteeli ya oWallkill weiwo munna Rumph aahudhihiweiyewo moopora woorumeela Edepartamentu ya Nteko. Nuuvira okathi, awo yaahithanleliwa otthikela orumeela eBeteeli ya wEquador, weiwo munna Rumph aarumeela iye nkhama munna a Ekomisawu ya Efiliyaali. Mwaakha wa 2023, awo yaahithamiheriwa oWarwick. Nuumala-vo Janeiro a 2024, munna Rumph aahaakhela yoothanleliwa ya ovara nkhama namakhalihera a Ekomisawu ya Nteko. Uupuwelaka mapuro oovirikana orumeenle iye, owo onlotta wiira: “Etthu eniiriha yoothanleliwa okhala yavameekhaaya kahi opuro, masi atthu ninaarumeela nhu.”

Hiyo ninnivaha efaita nteko muulupale anna awo anvara awa ni ‘khaninhiya waattittimiha alopwana nkhama awo.’—aFil. 2:29.