MWAHA WA YOOSOMA 51
NCIPO 132 Hiyo na Erutthu Emosaru
Munʼya Okocihera Dhai Ekasamentu Enoonihera Onttittimiha Yehova?
“Itthu sotheene siiriweke vookhalela ni votthokiheya.”—1 AKOR. 14:40.
ETTHU NIN’YA NHU OHUDHA
Nin’ya woona moopora makiristau anoivanri an’ya awa woonihera onttittimiha Yehova nihiku na ekasamentu.
1-2. Eseeni Yehova ontthuna iye nihiku na ekasamentu nnyu?
NIIRE nyuwo moonoivari wiira nthele aahiidho otheliwa? Akhala wiira ti dhiidho, ninnoottottopelani! Woonawene mooluttuweliwa opaka marehero wiira nkocihere ekasamentu nnyu. Yehova ontthuna wiira nttottele nreerelo nihiku na ekasamentua ni nkhalena ekumi yoohakalaliha nhoolo vamodha nuule mun’ya nnyu othelanana.—Mir. 5:18; Nsip. 3:11.
2 Tivootthuneya woonihera ottittimihiwa Yehova nihiku na ekasamentu, okhala wiira owo onniphwanelela ottittimihiwa. Eseeni enniiriha olotta dhiidho? Ni mun’ya owerya dhai opaka elo? Nnaamwi malakihero ari yoosoma ela eroiheliwaka saasaasa ale anoivanri ni ankocihera ekasamentu-ya, pooti onikhalihera ootheene nhu onttittimiha Yehova akhala wiira ninoorowela ekasamentu elo aahiidho akhala wiira awo anoonivekela miruku voohima dha moopora wookocihera nihiku na ekasamentu.
SEENI ORI AWA VOOTTHUNEYA WOONIHERA ONTTITTIMIHA YEHOVA?
3. Vaavo makiristau anoivanri ankocihera awa nihiku na ekasamentu, eseeni anreerela awa wuupuwelela, ni mwaha wa eseeni?
3 Makiristau anoivanri ni ankocihera ekasamentu-ya, ahaana opaka elo ettharaka malakihero a Yehova ari mbiibiliyani. Mwaha wa eseeni? Okhala wiira Yehova tokhumihenre ekasamentu. Owo taakhumihenre ekasamentu yoopacera yaamuraninhe Adamu ni Eeva nkhama anamathelana. (Maph. 1:28; 2:24) Tivondho, vaavo ale anoivanri ankocihera nihiku na ekasamentu, ahaana opweha opuro woopacera moonelo wa Yehova wiira yoonihera onttittimiha.
4. Nthowa seeni nikina nikhanle oowiiriha ale anoivanri onttittimiha Yehova nihiku na ekasamentu-ya?
4 Nookhala nthowa nikina nootepa otthuneya nikhanle owiirihani wuupuwelela moonelo wa Yehova vaavo munkocihera nnyu nihiku na ekasamentu nnyu: Yehova Tiithi nnyu a wiirimu ni Nxirikha nnyu muulupale. (aHeb. 12:9) Moohaakanyera, nyuwo muntthuna wiira waataana winyu nuuwo okhale wa mahiku ootheene. Ndho khamuntthuna wiira nihiku nno aahiidho nhoolo ekhumelele etthu ekhanle onriipiha nrima Nxirikha nnyu muulupale, Yehova. (Esal. 25:14) Vaavo nyuwo nnuupuwela nnyu itthu dhootheene Yehova oopankenleiyeni ni onlaihera iye woopakelani, niire khamunkhupali wiira owo onniphwanelela ottittimihiwa nihiku na ekasamentu nnyu?—Esal. 116:12.
MUN’YA WOONIHERA DHAI ONTTITTIMIHA YEHOVA?
5. Biibiliya on’ya waakhalihera dhai ale anoivanri onttittimiha Yehova vaavo ankocihera awa ekasamentu?
5 Biibiliya khanvaha eliista dha itthu makiristau anreerela awa opaka aahiidho oxaka nihiku na ekasamentu. Ndho ale anoivanri pooti okocihera ekasamentu-ya moovarihana ni makhalelo-ya, yoolema ya elapo-ya aahiidho itthu inaadhivela. Nitho makiristau ahaana wiiwelela malamulo a kuveernu voohima dha ekasamentu. (Math. 22:21) Voohixikha dhoothanla-dha akhala wiira anoothara malakihero a mbibiliyani anoowerya okocihera ekasamentu eninttittimiha ni onhakalaliha Yehova. Ndho malakihero seeni a mbiibiliyani anreerela awa wuupuwelela?
6. Seeni ori awa vootthuneya ale anoivanri wiiwelela malamulo a kuveernu voohima dha ekasamentu?
6 Mwiiwelele malamulo a kuveernu. (aRoma 13:1, 2) Ilapo dhawaatta, ale anoivanri ahaana otthara malamulo a kuveernu ehinatthi othelana. Ndho wiira epake elo ahaana odhuwela malamulo a elapo-ya. Mwatthuna okhaliheriwa wiira ndhuwele, mwaavekele nikhalihero asitokweene.b
7. Opuro ompakiwa ekasamentu ohaana okhala dhai?
7 Mwiirihe opuro owo okhala woottittimiheya. (1 aKor. 10:31, 32) Mwiilipihere wiira opuro en’ya awa opakiwa efeesta ya ekasamentu nnyu dhooniheriwe mikhalelo dha munepa wawaarya wa Muluku, ohiya dha olumwinku ola. (aGal. 5:19-26) Moovarihana ni malakihero a mbiibiliyani voohima dha nhooleli a ettheko, nlopwana ohaana wiilipihera wiira opuro wa ekasamentu okhale woohakalaliha ni woottittimiheya. Ndho eseeni en’ya okhalihera wiiraneya elo? Vaavo munna onlotta mwaha opaka iye elo mooreera nrima, mwa nttittimiho ni moopheta, elo ennaakhalihera atthu ootheene ari opuro owo odhuwela wiira ekasamentu yoovaha ya Yehova. Nitho mwaha owo onnaakhalihera atthu ari opuro owo ethokorerya ekasamentu okhala yoothanla yuulupale. Ndho mwaha wa elo, makiristau awaatta annithanla wiira mwaha owo walottiwe Empa ya Omwene. Akhala wiira nyuwo muntthuna wiira mwaha wa ekasamentu nnyu walottiwe Empa ya Omwene, nhaana owaatikhela ewarakha asitokweene mwaavekelaka orumeela Empa ya Omwene nihinaakuve ophiya nihiku nno.
8. Akhala wiira nnoothanla opaka efesta nihiku na ekasamentu, eseeni munreerela nnyu opaka wiira efeesta elo yoonihere onttittimiha Yehova? (aRoma 13:13)
8 Munsome aRoma 13:13. Akhala wiira nnoothanla opaka efeesta nihiku na ekasamentu, eseeni munreerela nnyu opaka wiira exake woonihera mweettelo wa olumwinku? Nuulumo na ekereku nitaphuleliwe nawi ‘ifeesta dhoohiloka’ nintaphulela mithukumano atthu yawurya awa eviinyu yawaatta ni owiriyana miyuusika mpakha ohiyu eriyari. Ndho akhala wiira nnoothanla nihiku na ekasamentu nnyu okhala eviinyu, nhaana wuupuwela toko etthu munreerela nnyu opaka wiira opuro owo ahikhale ntthu on’ya owurya eviinyu yawaatta.c Nitho akhala wiira inoorumihiwa miyuusika, mpwehere evoluume en’ya waakhalihera atthu ari opuro owo woopa mwaha. Masi nthanlele ni ephoole miyuusika idho ni nvarerye moolumo wiira ihaakattulihe atthu akina.
9. Eseeni anreerela awa wuupuwelela ale anoivanri voohima dha moolumo an’ya olottiwa aahiidho maraarelo makina a nihiku na ekasamentu?
9 Ilapo dhikina, nihiku na efeesta ya ekasamentu dhinnooniheriwa iviidiyu, ifootu aahiidho maraarelo makina. Nitho amudhi ni axirikha a anamathelana awo pooti ovinya wiira elotte etthu voohima dha awo. Ivaara dhawaatta itthu idho dhinniiriha nihiku nno okhala navameekhaaya. Masi nhaana ovarerya ni ephoole wiira moone akhala wiira itthu idho dhinookhala dhoolipiha. (aFil. 4:8) Mwiikohe wiira: ‘Niire itthu idho inawoonihera waattittimiha atthu akina? Niire inawiiriha ekasamentu nhu okhala yoottittimiheya?’ Nitho nhaana wiipakela nikoho nna nootepa otthuneya, mwiiraka: ‘Niire inawoonihera onttittimiha Yehova?’ Nnaamwi ehikhanle etthu yootthekeya olotta etthu yootheiha, nxake olotta moolumo ohikhalela akhanle owiiriha atthu wuupuwelela orupihana. (aEefe. 5:3) Nitho akhala wiira amudhi ni axirikha nnyu anoolotta etthu nihiku nno na ekasamentu, mwaakhalihere odhuwela moolumo muntthuna nnyu wiira elotte ni ahinreerela awa olotta.
10. Seeni ale anoivanri antthuneya awa okhala awiiyeviha okathi ankocihera awa ekasamentu-ya? (1 Yohani 2:15-17)
10 Nkhale awiiyeviha. (Munsome 1 Yohani 2:15-17.) Yehova onnihakalala vaavo arumeyi-ye aniilipihera awa onttittimiha owo ohiya opaka itthu etthunaka wiivuwiha akaneene. Makiristau awiiyeviha annixaka orumeela nsurukhu wawaatta etthunaka ‘woonihera itthu araawana.’ Ndho mireerelo seeni dhinkhumelela mwaha wa opaka efeesta ya ekasamentu yoohaattiheriwa itthu? Woonawene elo pooti wookhaliherani ohihiya opaka itthu dhootepa otthuneya nuuvira nihiku nno. Moone ntakihero na munna Mike, onkhala oNourega. Owo onlotta wiira: “Hiyo naahixaka opaaca nsurukhu, ndho elo yaahinikhalihera ovikaniha orumeela nkhama mapiyoneeru. Ekasamentu nhu yaari yoohaattiheriwa itthu, masi yooreera ni yoohiliyaleya.” Nrokora Tabitha yoowo onkhala wÍndia, onlotta wiira: “Hiyo naahixaka opaka itthu dhaaya oniriipiha nrima. Ndho wiira nikhalena ekasamentu yoohaattiheriwa itthu, naahilakela ovukula itthu dhikina ni okocihera itthu vakhaani.”
Moohixikha opuro ninkhala nhu, ekasamentu ya makiristau ehaana okhala yoohaattiheriwa itthu, yooreera ni yoohiliyaleya (Moone ettima 10-11)
11. Ale anoivanri an’ya woonihera dhai wiiyeviha oreela wa ikuwo dhoowara ni wiikociha nihiku na ekasamentu? (Moone-tho ifootu.)
11 Niire nyuwo moothanla ikuwo mun’ya nnyu owara nihiku na ekasamentu nnyu? Moohaakanyera, nyuwo muntthuna okhala oophwaneliwa. Nitho okathi aatikhiwa iye Biibiliya, nlopwana ni nthiyana yaarowa othelana yaanithanla ni ephoole ikuwo yaaya awa owara nihiku na ekasamentu. (Yes. 61:10) Ekhweeli wiira ikuwo mun’ya nnyu owara nihiku na ekasamentu pooti okhala dhoovirikana ni idhe munwara nnyu mahiku makina, masi ikhale dhoophwanela ni dhookhalela. (1 Tim. 2:9) Tivondho nhihiye ikuwo dhinyu aahiidho mireerelo dha veerutthuni ikhalaka dhootepa otthuneya nihiku nno.—1 Ped. 3:3, 4.
12. Seeni ale anoivanri antthuneya awa okhootta dhoolema ihinvarihana ni Biibilya dheidho ilamaleliwe nttetthe-ya?
12 Nkhootte dhoolema ihinvarihana ni Biibiliya. (Wiis. 18:4) Olelo-va, ikasamentu dhawaatta dhimpakiwa ittharihiwaka dhoolema dha itiini dhawootha, onammunepani ni dhoolema dha opuro owo. Masi Yehova onninilopola wiira nihaattamele itthu idho dhamwiikho. (2 aKor. 6:14-17) Akhala wiira nttetthe munkhala nnyu dhookhala dhoolema nhindhuwela nnyu saana akhala wiira dhinnindhivela Yehova, mwaadhye odhuwela moopora ipacenre awa ni nthokodhe malakihero a mbiibiliyani an’ya wookhaliherani opaka yoothanla yooreera voohima dha nihiku ni ekasamentu.
13. Ale anoivanri an’ya okhalana dhai moonelo mmodharu wa Yehova voohima dha ipresenti anvahiwa awa nihiku na ekasamentu?
13 Niire nttetthe munkhala nnyu yookhala yoolema ya atthu anlaleiwa, waavaha ipresenti ale anthelana nihiku na ekasamentu? Akhala wiira ti dhiidho, ipresenti pooti okhala dhoovirikana moovarihana ni makhalelo a khuta ntthu onvaha. Ekhweeli wiira makiristau annitumereriwa okhala oovaha, naawo annihakalala opaka elo. (Mir. 11:25; Mit. 20:35) Masi nihaana oxaka owiiriha atthu naalalen’ye nhu wiidhoona wiira anookhanyereriwa ovaha ipresenti, aahiidho ohixukhurela itthu ikhaani annivaha awa. Ohiya-vo, nihaana wiilipihera ontakiha Yehova nixukhurelaka itthu annivaha awa moovarihana ni makhalelo-ya.—2 aKor. 9:7.
MOOPORA WOOXAKA NI OVILELA MIXANKIHO
14. Mixankiho seeni inaaphwanya ale ankocihera ekasamentu-ya?
14 Vaavo munkocihera nnyu ekasamentu ekhanle onvuwiha Yehova, pooti woophwanyani mixankiho. Mwa ntakihero, nyuwo pooti wooxankihani ookocihera efeesta ya ekasamentu yoohaattiheriwa itthu. Charlie, yoowo onkhala elapo ya Ilhas Salomão, onlotta wiira: “Yaari etthu yooxankiha waathanla atthu naareerela nhu waalaleya. Hiyo nookhalano axirikha awaatta, ndho moovarihana ni yoolema ya opuro ninkhala nhu, atthu ootheene anlipelela wiira anoolaleiwa nihiku na ekasamentu!” Tabitha, yoowo ninlontte nhu ottuli, onlotta wiira: “Opuro kinkhala aka atthu aalimalela waalaleya atthu awaatta ni opaka efeesta yuulupale nihiku na ekasamentu. Ndho yaari etthu yooxankiha anaan’yari nhu waakhulela nuumala waaleela wiira naaya waalaleya atthu 100 pahi.” Sarah, yoowo onkhala wÍndia, olontte wiira: “Atthu awaatta etthu anvaha awa efaita, ori woonihera nsurukhu araawana. Arokoraka ni ahimaaka a mweemudhini yaahikastari nsurukhu wawaatta ekasamentu-ya epakaka efeesta yuulupale. Ndho elo yaahikiiriha ni miyo otthuna opaka efeesta ya nsurukhu wawaatta.” Eseeni en’ya wookhalihera ni ovilela mixankiho idho ni mixankiho dhikina?
15. Seeni ori awa vootepa otthuneya onvekela Yehova voohima dha mareheryo a ekasamentu?
15 Atthu envekele Yehova enleelaka palanu-ya a ekasamentu. Atthu pooti ontthukulela nrima Yehova enleelaka khuta etthu enaaxankiha okathi ankocihera awa ekasamentu. (aFil. 4:6, 7) Nitho atthu pooti onvekela nikhalihero Yehova wiira ewerye opaka dhoothanla dhooreera, ophwanya oomaaleleya ni oolipa nrima vaareereleka. (1 Ped. 5:7) Ndho vaavo atthu an’ya awa woona Yehova aakhulaka mavekelo-ya, onroromela-wa okaantepa wunnuwa. Tabitha yoowo ninlontte nhu ottuli, onlotta wiira: “Miyo vamodha ni munna kaanoivanraakana, naanoova okhumelela ohiiwanana hiyeenaru aahiidho ni amudhi nhu. Ndho okathi wootheene naaninvekela Yehova nihinaakuve opacera ovaanela voohima dha itthu naaya nhu okocihera dha ekasamentu nhu. Mweekhweeli naanoona nikhalihero na Yehova ni naaniphwanya nrettele.”
16-17. Seeni ori awa vootthuneya ovaanela saana vaavo atthu animpaka awa palanu a ekasamentu?
16 Nvaanele saana ni mwa nttittimiho. (Mir. 15:22) Nkhama atthu anoivanri, atthu annitthuneya opaka dhoothanla dhawaatta voohima dha ekasamentu. Elo enhela mpuwa othanla nihiku na ekasamentu, nsurukhu atthu an’ya awa okastari, atthu an’ya olaleiwa ni itthu dhikina. Masi atthu ehinathi opaka yoothanla, ahaana ovaanela voohima dha miyoonelo atthu araawana, malakihero a mbiibiliyani anvarihana ni mwaha owo ni wuupuwelela miruku atthu akhanle awa ovahiwa ni anna ni arokora oolipa mwa omunepani. Vaavo atthu anlotta awa miyoonelo-dha ahaana opaka elo mooreera nrima, mwa wiiyeviha ni ovaha efaita moonelo wa atthu akina. Mwa ntakihero, akhala wiira atthu anaan’yari-ya anawaavekela opaka etthu, mpake elo vaweryaneyaka. Akhala wiira khonweryaneya, atthu ahaana waatthokihera mooreera nrima ni mwa nttittimiho. (aKol. 4:6) Mwaakhalihere amudhi nnyu odhuwela wiira yoolakela nnyu yuulupale, wiiriha okathi owo okhala woohakalaliha ni oninttittimiha Yehova.
17 Akhala wiira anaan’yari nnyu kahi Anamoona a Yehova, pooti okhala vooxankiha waaleela dhoothanla dhinyu. Masi nnoowerya waaleela miyoonelo dhinyu mooreera nrima. Munna mmodha oniitthaniwa Santhosh, yoowo onkhala wÍndia, onlotta wiira: “Amudhi nhu yaatthuna wiira nihele mpuwa dhoolema dha eHindu nihiku na ekasamentu nhu. Ndho mwaha wa elo, waahivira okathi wawaatta wiira naatthokihere moonelo nhu ni dhoothanla dhihu. Ni naahipaka marukunuso vakhaani wiira nipake itthu dhaadhivela, masi dhihininnanara Yehova. Mwa ntakihero, naahipaka marukunuso nitthumaka eyooca yaadhivela ni naahilakela ohiipa macipo aahiidho wiina, okhala wiira awo khiyaalamalenle itthu idho.”
18. Eseeni munreerela nnyu opaka wiira ndhuwele akhala wiira itthu inookhumela saana nihiku na ekasamentu? (1 aKorinto 14:40) (Moone-tho efootu.)
18 Atthu empake saana palanu-ya. Akhala wiira atthu anaawikocihera saana, woonawene atthu anooxaka oriipiwa nrima nihiku na ekasamentu. (Munsome 1 aKorinto 14:40.) Wayne, yoowo onkhala oTaiwan, onlotta wiira: “Ehalaka mahiku vakhaani wiira niphiye nihiku na ekasamentu nhu, naahipaka nthukumano nkhaani vamodha ni ale yaaivaherenrye onikhalihera nihiku na ekasamentu. Hiyo naahivaanela voohima dha apalanu naapanke nhu, ni naahinsayari iphantte vakhaani dhaaya opakiwa nihiku nno, wiira noone akhala wiira itthu dhaankhumela saana nihiku na ekasamentu.” Ohiya-vo wiira moonihere waattittimiha atthu mwaalalen’ye nnyu, mwiilipihere opaka itthu dhootheene mpuwa wa okathi mwaaleenle nnyu mwaalaleyaka.
Ompaka palanu ooreera nihinathi ophiya nihiku na ekasamentu, onookhalihera itthu okhumela saana nihiku nno naphiya (Moone ettima 18)
19. Eseeni ekhanle waakhalihera ale anoivanri wiira itthu ikhumele saana nihiku na ekasamentu?
19 Wiikocihera khalai-ru onawookhaliherani oxaka mixankiho. (Mir. 22:3) Mwa ntakihero, akhala wiira munkhala nttetthe atthu alamalenle awa orowa okasamentuni hata ehilaleiwe, nhaana wuupuwelela etthu munreerela nnyu opaka wiira elo ehiiraneye naphiya nihiku nno. Mwaatthokihere amudhi nnyu ahikhanle Anamoona a Yehova itthu dhin’ya wiireya nihiku nno ni mwaaleele moonelo nnyu voohima dha dhoolema dha ekasamentu. Ohiya-vo, nyuwo pooti owoonihera mwaha oni: “Como é que são os casamentos das Testemunhas de Jeova?” ori va jw.org. Nitho etthu ekina en’ya okhalihera wiira itthu ikhumele saana nihiku nno, ori onvekela munna mmodha oolipa mwa omunepani wiira akhale ‘nhooleli a efeesta.’ (Yohani 2:8) Ndho akhala wiira atthu anoonleela munna owo apalanu ootheene yaapanke awa, elo enookhalihera opaka itthu moovarihana ni ele atthu alakenle awa wiira ekasamentu elo ekhale yoottittimiheya.
20. Eseeni ale anoivanri ahinreerela awa oliyala voohima dha nihiku na ekasamentu?
20 Nuumala woona itthu dhootheene dhinhela mpuwa okocihera ekasamentu, atthu pooti woona okhala nritti muulupale. Masi atthu ehiliyale wiira efeesta ya ekasamentu ti ya nihiku nimodha. Nno nihiku pahi atthu ampacera awa ekumi epheya nkhama anamathelana ni onrumeela Yehova vamodha. Tivondho atthu epake itthu dhootheene anwerya awa wiira efeesta ya ekasamentu-ya ekhale yoohaattiheriwa itthu ni yoottittimiheya. Atthu enroromele Yehova. Ndho atthu ekhaliheriwaka nuuwo, anoowerya okocihera ekasamentu yoohiliyaleya, yoohakalaliha ni ohimwiira kaairihiweni.—Esal. 37:3, 4.
NCIPO 107 Yehova Ti Ntakiheryo Nuulupale na Ophenta
a OLEELIHERIWA WA NUULUMO: Dhoolema dha ilapo dhawaatta, ekasamentu enhela mpuwa efeesta vaavo anamathelana awo ammanelana awa natiri elaiheranaka ohoolo wa Muluku wiira anookhala vamodha mahiku ootheene. Anamathelana akina annithanla opaka efeesta wiira ece ni ohakalala vamodha ni amudhi ni axirikha-ya. Ohiya-vo, ilapo atthu ahilamalenle awa opaka efeesta nihiku na ekasamentu, tivootthuneya ale anoivanri otthara malakihero a mbiibiliyani nihiku na ekasamentu.
b Wiira ndhuwele ele makiristau ampaka awa wiira etthare malakihero a elapo ankhala awa voohima dha ekasamentu, moone mwaha oni: “Casamentos Honrosos à Vista de Deus e dos Homens” ori A Sentinela a 15 a Outubro a 2006.
c Moone eviidiyu eni: Niire Kihaana Owurya Eviinyu? eri va jw.org