Niire Munnuupuwela?

Niire nyuwo moowerya osoma miyaha dhootheene dhikhumiheriwe ireviista Wiikocela dha ntano? Vano, muupuwelele itthu vakhaani wiira mwaakhulaka makoho anttharelana:

Mathowa seeni anniiriha onvaha ovuwa Yehova?

Hiyo ninninvuwiha Yehova okhala wiira ninninttittimiha vawaatta, ompheta ni nintthuna wiira atthu akina endhuwele.—Wiikocela 01/2025 epaax. 3.

Vaavo ntthu nkina onninyoonyiha iye nin’ya owerya dhai okhala atthu oolevelela?

Hiyo khanniipithiha miyuupuwelo dhihu. Ndho wiira niwerye opaka elo, nihaana wiilipihera olotta miyuupuwelo dhihu ni oxaka onanariwa.—Wiikocela 02/2025 epaax. 15-16.

Seeni Maarku ori iye ntakihero nooreera wa anna ari marapasi?

Maarku aahaakhulela ni nrima wootheene yoothanleliwa ya waarumeela atthu akina. Hata okathi nkina Maarku aanyoonyihen’ye ni mwaha mmodha waakhumelenle, owo khaahin’ye waarumeela atthu akina. Owo aaniviriha okathi ari vamodha ni Paaulu ni makiristau makina oolipa mwa omunepani.—Wiikocela 04/2025 epaax. 27.

Eseeni Yeesu aatthuna iye olotta ni moolumo a wiira: ‘Miyo kihaadhuweliha ndhina ninyu’? (Yohani 17:26)

Ahudheri a Yeesu yaanidhuwela wiira ndhina na Muluku ti Yehova. Masi Yeesu aahaakhalihera ondhuwela saana Yehova, ohela mpuwa yoolakela-ye voohima dha elapo, apinaatamu, ele opanke iye, on’ya iye opaka nhoolo ni mikhalelo-dhe.—Wiikocela 05/2025 epaax. 20-21.

Okhala awiiyeviha onnikhalihera odhuwela eseeni?

Onoonikhalihera odhuwela wiira dhookhala itthu nihindhuwela nhu. Mwa ntakihero, hiyo khanindhuwela nihiku an’ya awa omala makhalelo a olumwinku ola wootakhala ni etthu Yehova on’ya iye opaka okathi owo. Nitho khanindhuwela etthu en’ya wiireya meelo ni khaninwerya wiiwasasa moopora Yehova onnidhuwela iye.—Wiikocela 06/2025 epaax. 15-18.

Eseeni en’ya onikhalihera wiira nittottele nreerelo mwaha mmodha aahiidho mwaha anroiheliwa atthu ootheene?

Niikohe wiira: ‘Itthu seeni dhirumeeliwe-va wiira itepe waaphara nrima atthu anwiriyana? Niire noorumeeliwa nlikanyiho kikhanle aka orumeela vaavo kininhudhiha aka ntthu? Taani okhanle ondhivela mwaha ola?’—Wiikocela 07/2025 epaax. 19.

Eseeni ninhudha nhu ni moopora Yehova aanlevelenle iye Davidi?

Hata Davidi aapanke itampi dhuulupale, nuumala woonihera ottharuwa ni nrima wootheene, Yehova aahinlevelela. (1 Mam. 9:4, 5) Nitho vaavo Yehova onnilevelela iye, owo onniliyala moomalela ni khankhala-khala anihukhumaka nhoolo mwaha wa etampi onilevelenle iye.—Wiikocela 08/2025 epaax. 17.

Eseeni munreerela nnyu opaka akhala wiira naskola nnyu a Biibiliya onninliperya waakhulela yoohudhiha emodha?

Akhala wiira naskola nnyu onninliperya waakhulela aahiidho wiiwasasa etthu emodha, ntuphe epontu elo ni ntthikele olotta voohima dha mwaha owo okathi nkina.—Wiikocela 09/2025 epaax. 24.

Biibiliya onnilotta voohima dha ‘wootothiwa ni owerya wa etampi.’ (aHeb. 3:13) Elo entaphulelani?

Etampi pooti oniiriha opaka itthu dhoohiloka. Nitho pooti onoototha ni oniiriha opacera waakanyera itthu dhawaatta, nkhama waakanyera akhala wiira mweekhweeli Muluku onninipheta.—Wiikocela 10/2025 epaax. 16.

Itthu seeni tthaaru dhin’ya onikhalihera wiira niwerye ontthukulela nrima nhu Yehova vaavo nininvekela nhu?

Woonawene itthu dhin’ya onikhalihera onleela Yehova miyuupuwelo dhihu ni miyoonelo dhihu dha vanrimani ori: (1) Wuupuwelela mikhalelo dha Yehova. (2) Wuupuwela moopora woonleela Yehova voohima dha mixankiho ninviriha nhu. Mwa ntakihero, okathi nintthuneya nhu onlevelela ntthu. Ni (3) ovekela nihaakuvaka.—Wiikocela 10/2025 epaax. 19-20.

Eseeni ninreerela nhu opaka wiira naakhalihere atthu awuuluvala?

Hiyo pooti orowa waasekurya aahiidho waalikarela. Ohiya-vo, hiyo pooti waaveleela ospitaali. Nitho hiyo pooti olaleerya vamodha naawo nirumeelaka inamuna dhoovirikana.—Wiikocela 11/2025 epaax. 6-7.

Itthu seeni dhin’ya waakhalihera makiristau anoivanri onttittimiha Yehova nihiku na ekasamentu?

Wiiwelela malamulo a kuveernu voohima dha ekasamentu. Odhuwela akhala wiira opuro en’ya awa opakiwa efeesta ya ekasamentu onawoonihera mikhalelo dha munepa wa Muluku. Moonihere wiiyeviha oreela wa ikuwo mun’ya nnyu owara nihiku nno, nkhoote dhoolema dhihinvarihana ni Biibiliya ni nvaanela saana vaavo munkocihera nnyu ekasamentu.—Wiikocela 12/2025 epaax. 21-24.