ებრაელეფშა მეჭარილ წერილ
6 თაშ ნამდა, რახანს ვა ვორეთ გესქილადირ თის, მუთ დუდშე ქრისტეშ გურშენ დიბგურეთ, იმნჭუათ ძინათებულობაშა დო კინ დუდშე ვედიპჭყათ ოსხირიშ ინორღვაფა. შხვანერო ქოფთქუათინ, დუდშე ოკო ვა მაფუდან ოგურაფალ თინა, ნამდა საჭირო რე მუთუნიშ მოღე ვა რენ ფერ საქმეეფიშ ნარღება* დო ღორონთიშ რწმენა; 2 დუდშე ოკო ვა მოსაჭირუდან შხვადოშხვანერ ნათუაშ, ხელეფიშ გედვალაშ, ღურელეფიშ გათელებაშ დო სადღამუშო გასამართლებაშ გურშენ გურაფა. 3 ღორონთიშ ნებაქ ქიჸუ-და, ქოთ ქიმვოჭირინუანთ ძინათებულობას.
4 თინეფშე ნამთინექ, მიდგაქ ართ დროს მიღჷ სიმართლეშ სინთე, ზეციურ ძღვინ დო წმინდა შურ*, 5 მიდგაქ გამორსჷ ღორონთიშ დიდებულ სიტყვა დო ხვამა*, ნამუთ მომავალს* იჸუაფ, 6 უკულ გინურთუ რწმენაშე. თინეფშა მითინს ვა მახვარებე, ნამდა მიკირთან დო ინარღან დაშებულ, მუშენდა თეცალეფ ღორონთიშ სქუას ძელს დუდშე მიკაჭკადანა დო სახალხოთ ონჯღორეს ოძირანა თის. 7 ხშირ ჭვემეფ ხვამა რე ღორონთშე, მუშენდა დოწუმილ ჭვეთეფს დიხა შუნსჷ დო დიხაშდუმამუშებელშო ეიოფალაფუანს ოჭკუმალო ირგუნ ფერ მცენარეს, 8 მარა, დიხა ძიგირ დო კაკლარს გეიოფალაფუანს-და, მუთუნშო ვერგებე, ათეშენ ღორონთ მალას დოჭყანს თე დიხას დო საბოლათ დიჭუ თინა.
9 მართალ რე, თეს ქიფჩიებუთ, საჸოროფოეფ, მარა ბჯერა, ნამდა თქვა უჯგუშო გიღუნა საქმე დო გეჸუნთ რსხებაშ შარას. 10 ღორონთ უსამართლო ვა რე დო ვეგიჭყოლიდუანს თქვან ხანდას დო ჸოროფას, ნამუთ თიშ სახელიშ გურშენ გიმირჩქინით თით, ნამდა ომსახურუდით დო ასე ხოლო ომსახურუთ წმინდეფს. 11 მოკონა, თითოეულს ირიათო თიცალ მონდომა გიღუდან, მუნერით დაჭყაფშე ათორჸუნა, მუშენდა ბოლოშა მტკიცას რჯერდან, ნამდა თქვან იმენდ მუთუნით ვეგემტყუნებ, 12 დო ვეგნირთათ ზარმაცეფო, თეშ გინაწონს, მიაჸუნათ თინეფიშ მაგალითის, მით რწმენათ დო მოთვინებათ ღებულენა დუნაპირებუს.
13 ღორონთშე უმოს დიდ მითინ ვა რე, ათეშენ, მუჟამსით თიქ აბრაამს პირობა მეჩჷ, ნამდა დოხვამანდ, მუშ დუდ დიფუჩუ 14 დო უწუ: „დორხვამანქ დო გუგამრავლენქ“. 15 აბრაამ მოთვინებათ იჯინედ, ათეშენ ქოთ მიღჷ თე დუნაპირებ. 16 კოჩ მუშე უმოს დიდის იფუჩუანს დო თეთ ნირზ ითებ, მუშენდა დოფუჩაფა რე გარანტია, ნამდა მუდგას იჩიებ, სიმართლე რე. 17 თეშნერო, მუჟამსით ღორონთიქ გინოჭყვიდ, დუნაპირებუშ მემკვიდრეეფს არგამათ ქაძირუკო, ნამდა მუშ სიტყვა ვეთირუ, დიფუჩუ, მუდგათ გარანტია ქიმეჩ თინეფს. 18 თენა თიშენ აკეთ, ნამდა ჩქი, მით თის გითუფორუანთ დუდის, გურელაკინელ ვორდათ დო ვა ვოდინუათ მტკიცე იმენდ, მუშენდა გამორიცხულ რე, ღორონთიქ ტყურა თქუას; თინა დღას ვა თირანს თის, მუთ თქუ დო მუდგაშეთ დიფუჩუ. 19 ჩქი თე იმენდის უმარგუთ, მუჭოთ გემ უმარგ ღუზას. თე იმენდ სანდო დო მტკიცე რე დო ფარდაშ იშო მინოპჸუნთ, 20 სოდეთ ჩქინშახ იესოქ მინორთჷ, ნამდა შარა გამხაზირესკო; თიქ მელქისედეკცალ მღვდელმთავარო გინირთჷ სადღამუშოთ.