იოანეშ პირველ წერილ
3 დეფიქრით, მუშმადიდა რე ჩქინდა გიმორჩქინელ ღორონთიშ ჸოროფა! თიქ პატი გებდვეს, თიშ სქუალეფ ბჯოხოდესკო, დო ქოთ ვორეთ თიშ სქუალეფ! თე ქიანა თიშენ ვამჩინენა, ნამდა ღორონთის ვეჩინენს. 2 საჸოროფოეფ, თიშ უმკუჯინუო, ნამდა ღორონთიშ სქუალეფ ვორეთ, დიო ვა მიჩქუნა, მუნერეფ იპჸუაფუთ, მარა თინა ქომჩქუნა, ნამდა თიშ გიმოცხადებაშ დროს ჩქი ხოლო თიცალეფ იპჸუაფუთ, მუშენდა თის თიცალს ქობძირუნთ, მუნერით რე. 3 არძა, მიდგას თიშ იმენდ უღჷ, დუდის ისუფთენს, მუშენდა თინა წმინდა რე.
4 მით კინ ცოდენს, კანონს გინმურთანს, მუშენდა ცოდა კანონიშ გინორთა რე. 5 თინა ხოლო გიჩქუნა, ნამდა თიქ ჩქინ ცოდეფიშ ჩათხინაფალო მორთჷ დო დღას ვეშუცოდებ. 6 მით ართობას სქიდუ თიწკუმა, მეტო ვა ცოდენს. მარა, მით კინ ცოდენს, ვეჩინენს დო ვა წანსჷ თიშ. 7 სქუალეფ, მითინქ ვემგოჩილითუან; თინა, მით სიმართლეშ საქმეეფს ორთჷ, მართალ რე, მუჭოთ იესო რე მართალ. 8 მით კინ ცოდენს, ეშმაკშე რე, მუშენდა ეშმაკ დაჭყაფშე მოჸუნაფილ ცოდენს. ღორონთიშ სქუაქ ზუსტას ეშმაკიშ საქმეეფიშ მასპალო მორთჷ.
9 თინა, მით ღორონთიშ სქუა რე, მეტო ვა ცოდენს, მუშენდა ღორონთიშ წმინდა შურ* უღჷ, დო მუთუნით ვა მოხვადუ, ნამდა შეცოდას, მუშენდა ღორონთიშ სქუა რე. 10 ეშმაკიშ სქუალეფ ღორონთიშ სქუალეფშე თეთ გიშეგორუნა: მით სიმართლეშ საქმეეფს ვართჷ, ღორონთშე ვა რე, მუჭოთ თინა ვა რე ღორონთშე, მიდგას მუშ ჯიმა ვა უჸორს. 11 დუდშე ხოლო ხომ თენა მიბრჩქილეთ, ნამდა ოკო მიჸორდან ართიან, 12 მარა კაენცალო ვარ, მით უბადოშე რდჷ დო მიდგაქ მუშ ჯიმა ჸვილჷ. დო მუშ გურშენ ჸვილჷ?! თიშენ, ნამდა მუშ საქმეეფ უბადო რდჷ დო მუშ ჯიმაშ – მართალ.
13 ჯიმალეფ, ნუმ გიკვენა, ნამდა თე ქიანას ჯოგუთ. 14 ჩქი მიჩქუნა, ნამდა ღურაშე სიცოცხლეშა გინიბლით, მუშენდა მიჸორა ჯიმალეფ. მიდგას ვა უჸორს, ღურელ სქიდუ. 15 მიდგას მუშ ჯიმა ჯოგჷ, კოჩიშ მაჸვილარ რე, დო თქვა გიჩქუნა, ნამდა ნამთინ მაჸვილარს ვემიაღებე ულიებ სიცოცხლე. 16 იესოქ მუშ სიცოცხლე შეწირ ჩქინო დო თეთ ენვანჭით, მუ რე ჸოროფა, ათეშენ ჩქი ხოლო ვალდებულეფ ვორეთ, ჩქინ სიცოცხლე შეპწირათ ჯიმალეფშო. 17 მიდგას დასაბაღო უღჷ დუდიშ ეიოჯუმალარ დო ორწყე, ნამდა ჯიმას მოხვარა ოსაჭირ, მარა გურშა ვემუღ თიშ გაჭირება, მუჭო არაგადე, ღორონთ მიჸორსია?! 18 სქუალეფ, ართიან სიტყვათ დო ნინათ ვარინ, საქმეთ დო ალალას ოკო მიჸორდან.
19 თეთ მარჩქვენუნა, ნამდა სიმართლეშ მხარეს ვორეთ დო ბჯერდან იჸი, ნამდა ღორონთის უჸორთ, 20 თიშ უმკუჯინუო, ნამდა შილებე ჩქინ გურ მუდგარენშენ ბრალს გებდვანდან; ფშუდან, ღორონთ ჩქინ გურეფშე დიდ რე დო თის ირფელ უჩქჷ. 21 საჸოროფოეფ, ჩქინ გურ ბრალს ვეგებდვანან-და, თამამას ბრაგადანთ ღორონთიშ წოხოლე, 22 დო მუდგა ვა ფთხუათინ, ირფელს ქომუჩანა, მუშენდა მეპჸუნთ თიშ მცნებეფს დო თის ვორთუთ, მუთ მუს მოწონს. 23 თიშ მცნება რე, პწანდან თიშ სქუა, იესო ქრისტე*, დო მიჸორდან ართიან, მუჭოთ თიქ* მუჩეს მცნებათ. 24 ხვალე თენა ვარინ, მით ღორონთიშ მცნებეფს მეჸუნს, ართობას სქიდუ თიწკუმა დო ღორონთ ხოლო ართობას რე თეცალწკუმა. წმინდა შურიშ საშვალებათ, ნამუთ ღორონთიქ მუჩეს, მიჩქუნა, ნამდა თინა ჩქინწკუმა რე ართობას.