იაკობიშ წერილ
4 მუ წუმოტახუნს ჩხუპის დო ნირზის თქვან შქას? კინ თინა ვარიო, მუთ თქვან ცოდამ სხეულს ოკო, მუთ თქვან გურს იბურჯანს დო ოცად, გიგორჯგინან?! 2 ბრელ მუდგარენ გოკონა, მარა მუთუნ ვაიღუნა. ართიან რჯოგუნა, შურ გოლუნა თიშა, მუთ შხვას უღჷ დო ჰარამობა ვა გოსვანჯუანა, მარა იშენით ხეცარიელ სქიდუთ. ოჩხუპუთ დო ონტერუთ ართიანს. თიშენ ვაიღუნა მუთუნ, ნამდა ვა თხულენთ, 3 დო, ითხინთინ თიმწკუმა ხოლო მუთუნ ვამგაჩამუნა, მუშენდა გლახა გურით ითხინთ, თიშ ოკეთებელო, მუთ თქვან ცოდამ სხეულს ოკო.
4 მრუშეფ*, მეტო ვაიჩქუნანო, ნამდა თე ქიანაწკუმა მეგობრობა ღორონთიშ ნტერალა რე?! მიდგას თე ქიანაწკუმა მეგობრობა ოკო, ღორონთიშ ნტერო გინმირთუ. 5 თის ხომ ვა ფიქრენთ, წმინდა წერილეფს ტყურათ ჭარჷ, მენჯარიშ გურს ირიათო მუდგარენ ოკონია?! 6 მარა ღორონთიშ გიმორჩქინელ ჭყოლოფა მოხვარუნა, გივორჯგინათ მენჯარიშობას. წმინდა წერილეფ იჩიებ: „ღორონთ დუდძირგალეფს ოწინააღმდეგ, მარა თანდაბალეფს იჭყოლოფუანს“.
7 ათეშენ დემორჩილით ღორონთის, ქეწინააღმდეგით ეშმაკის დო ინტებუ თქვანდე. 8 დეახლოვით ღორონთის დო თინა ხოლო დეგეახლოებუნა. გესუფთით ხელეფ, ცოდამეფ, დო გესუფთით გურეფ თქვა, მიდგას ეჭვეფ გიღუნა. 9 ინგარით დო თვალით; ძიცაშ მანგიორო ინგარით დო ხიოლიშ მანგიორო იწუხით. 10 იეჰოვაშ* თოლს რდათჷ თანდაბალეფ დო დიდებას მიღენთ თიშე.
11 ჯიმალეფ, მიოტეთ ართიანიშ გურშენ გლახაშ რაგად. მით მუშ ჯიმაშ გურშენ გლახას იჩიებ ვარდა ასამართლენს, კანონიშ გურშენ იჩიებ გლახას დო კანონს ასამართლენს; კანონს ქასამართლენქ-და, იმწკუმა მოსამართლე ჸოფექ დო ვართ ხოლო კანონიშ მიმაჸუნალ. 12 ხვალე ღორონთ რე კანონიშ მუმაჩამალ დო მოსამართლე. ხვალე თის შეულებ რსხება დო მოსპუალა. სი მი რექჷ, შხვას* ასამართლენქინ?!
13 ასე თქვა ქომრჩქილით, მით იჩიებუთ, ამდღა ვარდა ჭუმან ათე დო ათე ქალაქშა მიდურთ, თექ ართ წანას ქუდოფსქიდუთ, საქმეს გევონწყუნთ დო მოგებას ქობძირუნთია, 14 ვარინ, თინა ხოლო ვაიჩქუნა, მუს მოიღანა ჭუმანერ დღა, მუშენდა თქვან რინა მოგენს ნირსის, ნამუთ ჭიჭე ხანს მიკორჩქინდუ დო უკულ დინუ. 15 წესით თის ოკო იჩიებუდათ, იეჰოვაშ* ნებაქ ქიჸუ დო ცოცხალ ქიპჸუაფუთ-და, ათე დო ათეს გუვაკეთენთია. 16 მარა თქვა დუდ გიძირგანა დო იცქვანთ. თეცალ დუდიშ ცქვაფა უბადობა რე. 17 თაშ ნამდა, მიდგას უჩქჷ, მუ რე სწორ, მარა ვართჷ თის, ცოდათ ათვალუ.