Taratasy Faharoe Handeha Amindrô Korintianin̈y aby Io
8 Ziôty ndraiky, rahalahy aby, tianay ho hainarô raha momba hatsaram-pan̈ahy miavaka naboakan’ny Zan̈ahary tamindrô fiangonan̈a aby a Makedonia atỳ. 2 Irô rahalahy aby io niaritry fitsapan̈a farany mare tan̈atin’ny fotoan̈a sarotro. Ndray irô masikiny mare, irô ten̈a ravoravo nan̈amia, ke hita fa irô ten̈a matariky. 3 Arakarakan’ny raha nanan̈andrô ny raha namiandrô, ndray izy aby mandilatra zen̈y. Ia, zaho vavolombelon̈on’ny raha zen̈y. 4 Irô tômpin’ain̈y foeky tsy vôly niangavy zahay mare baka irô hahazo tombontsoa han̈ano fan̈amezan̈a baka amy fô han̈ampian̈a* irô olo masin̈y aby io. 5 Tsy raha nantin̈ainay hamiandrô fo ny namiandrô fa, nohon’ny sitrapôn’ny Zan̈ahary, irô tômpin’ain̈y foeky nahafoe ten̈a amy Tômpo ndreky aminay. 6 Ke zen̈y nahavy zahay nampirisiky Titosy hankefa famorian̈a fan̈amezan̈a nataonarô tam-pitiavan̈a, fôtony izy nanomboko raha zen̈y taminarô tan̈y. 7 Kanefa, karaha ataonarô manan̈a maro amy raha jiaby, na amy finoan̈a zen̈y, na amy volan̈a, na amy fahaizan̈a, na amy zotom-pô, na amy fitiavanay anarô, irarian̈a koa anarô han̈amia raha marobe am-pitiavan̈a.
8 Zaho mivolan̈a zen̈y tsy raha mibekobeko anarô fa, baka ho hitanarô fa olo hafa koa mba mazoto aviô misy hahitan̈a izikoa baka amy fô ankitin̈y fitiavan̈anarô. 9 Anarô baka mahay hatsaram-pan̈ahy miavaka naboakan’i Jesosy Kristy Tômpontsika, fôtony ndray izy mpan̈arivo, izy nanjary masikiny baka hahatsara anarô, amy zen̈y anarô hanjary mpan̈arivo baka amy tsy fanan̈any raha.
10 Ke ty hevitrinaka momba raha zen̈y: Tsara izikoa anarô man̈ano raha zen̈y, fôtony efa taon̈o araiky zay anarô nanomboko namory fan̈amezan̈a io, salakady anarô lastiô nan̈iry mare han̈ano raha zen̈y. 11 Ke ankifà raha nikômansenarô, amy zen̈y ho karaha fahavon̈aosanarô han̈ano izio koa fahavon̈aosanarô hankefa izio tsarabe, erakan’ny raha anan̈anarô. 12 Fa izikoa olo araiky vôn̈ono han̈amia, ankasitrahan̈a mare zen̈y izikoa izio arakaraka raha anan̈any, fa tsy arakaraka raha tsy anan̈any. 13 Tsy tiako baka izikoa olo hafa mahivankivan̈a, kanefa anarô ndraiky manjary milanja entan̈a mavesatra; 14 fa tiako ndraiky izikoa misy fitovisan̈a aminarô, amy zen̈y lambiny baka aminarô hameno ny tsy ampy amindrô, baka iô koa ny mandamby baka amindrô hameno ny tsy ampy aminarô, ke hisy fitovisan̈a; 15 eraka raha voasoratra ty: “Lan̈iany olo nanan̈a be, tsy nanan̈a be loatra; aviô lan̈iany olo nanan̈a hely, tsy nanan̈a hely loatra.”
16 Isaoran̈a Zan̈ahary fôtony izy nahavy Titosy hazoto* hikarakara anarô, karaha ataonay fo. 17 Titosy baka nan̈eky han̈ano raha nangatahanay, aviô izy lastiô nazoto mare, ke izy tômpin’ain̈y foeky nan̈eky handeha aminarô an̈y. 18 Irahanay handeha aminarô an̈y koa rahalahy araiky derain̈a eraka fiangonan̈a jiaby, baka amy raha ataony nohon’ny vaovao tsara. 19 Tsy zen̈y fo fa, izy koa nirahandrô fiangonan̈a aby io hiaraka aminay handrasa fan̈amezan̈a nataonarô tam-pitiavan̈a, misy han̈amezan̈a voninahitry Tômpo ndreky han̈aboahan̈a fa anarô vôn̈ono han̈ampy zahay ankitin̈y. 20 Amy zen̈y tsisy olo han̈amia tsin̈y zahay amy raha momba fandrasan̈a fan̈amezan̈a marobe io. 21 Fôtony baka, ‘zahay man̈ano ny marin̈y amy raha jiaby, tsy amason’i Jehovah fo fa amason’olo koa.’
22 Misy araiky amindrô rahalahinay aby io koa irahanay aminarô an̈y miaraka amindrô. Izy efa nitsapainay jery matetiky, ke hita fa izy atokisan̈a* amy raha maro, baka iô izy ziôty mahaimazoto fo fôtony izy matoky anarô mare. 23 Izikoa misy olo misalasala momba Titosy, tsara hainarô fa izy namako ndreky mpiara-miasa aminaka, sady mitady raha mahatsara anarô. Baka iô izikoa misy raha mampisalasala anarô momba irô rahalahinay aby io, tsara hainarô fa irô io apôstôlin’ny fiangonan̈a salakady man̈amia voninahitry Kristy. 24 Ke aboaha fa anarô tia irô, aviô aboaha irô fiangonan̈a aby io ino antony mampirehareha zahay momba anarô.