Taratasy Voanalohany Handeha Amindrô Korintianin̈y aby Io
12 Rahalahy aby, tiako hainarô raha momba kadô baka amy fan̈ahy. 2 Hainarô fa tamin’ny anarô mbala olon’ny donia ty,* anarô voataon̈o hanompo irô sampy moa aby io, ke anarô nandeha tamy zay tany nitondrasandrô anarô. 3 Tiako hainarô fa tsisy olo taritin’ny fan̈ahin’ny Zan̈ahary ke hivolan̈a: “Jesosy io voaozon̈o!”, aviô tsisy olo afaka mivolan̈a: “Jesosy io Tômpo” izikoa izy tsy taritin’ny fan̈ahy masin̈y.
4 Samby isany kadô, fa araiky fo fan̈ahy; 5 baka iô samby isany fanompoan̈a, fa araiky fo Tômpo; 6 aviô samby isany asa, fa araiky fo Zan̈ahary man̈ampy olo jiaby hahavita asa jiaby zen̈y. 7 Fa aboaka amin’olo tsiaraikiaraiky fomba fiasan’ny fan̈ahy masin̈y io baka hahatsara olo jiaby. 8 Baka tamy fan̈ahy, misy namezan̈a volan̈a* misy fahendrena, baka iô baka tamy fan̈ahy io fo koa, misy namezan̈a volan̈a misy fahaizan̈a. 9 Baka tamy fan̈ahy io, misy nahazo finoan̈a, aviô misy ndraiky nampian’ny fan̈ahy io ke mahavita mampajanga olo, 10 misy man̈ano fahagagan̈a, misy maminan̈y, misy mahay mandiniky izikoa hafatra araiky baka amy Zan̈ahary na tsy baka aminany, misy mivolan̈a amy volan̈a* isan-karazany, baka iô misy mandika teny. 11 Kanefa fan̈ahy araiky fo man̈ano asa jiaby zen̈y ke mandrasa raha zen̈y amin’olo tsiaraikiaraiky, erakan’ny itiavany izy.
12 Araiky fo baka vatan̈a kanefa misy rantsambatan̈a maro, aviô ndray maro rantsambatan̈a jiaby zen̈y, araiky fo vatan̈a, karaha zen̈y koa Kristy. 13 Fan̈ahy araiky fo baka nan̈anaovan̈a batisa atsika jiaby, amy zen̈y atsika hanjary vatan̈a araiky fo, na Jiosy zen̈y na Griky, na mpanompo na olo afaka, baka iô atsika jiaby io nampigiahan̈a fan̈ahy araiky fo.
14 Ia, tsy rantsambatan̈a araiky mahafôron̈o vatan̈a fa rantsambatan̈a maro. 15 Izikoa vity mivolan̈a: “Zaho tsy an̈isan’ny vatan̈a, fôtony zaho tsy tan̈ana”, zen̈y tsy mivolan̈a fa izy tsy an̈isan’ny vatan̈a. 16 Aviô izikoa sofin̈y mivolan̈a: “Zaho tsy an̈isan’ny vatan̈a, fôtony zaho tsy maso”, zen̈y tsy mivolan̈a fa izy tsy an̈isan’ny vatan̈a. 17 Izikoa vatan̈a jiaby io maso, akôry harin̈esany raha? Izikoa vatan̈a jiaby io sofin̈y, akôry hahaizany fôfokon-draha? 18 Fa rantsambatan̈a tsiaraikiaraiky amy vatan̈a nataon’ny Zan̈ahary amy plasiny aby, erakan’ny itiavany izy.
19 Izikoa rantsambatan̈a araiky fo irô jiaby, aia fo vatan̈a? 20 Kanefa irô io rantsambatan̈a maro fa vatan̈a araiky fo. 21 Maso tsy afaka mivolan̈a amy tan̈ana: “Zaho tsy mila anao”, baka iô loha tsy afaka mivolan̈a amy vity: “Zaho tsy mila anarô.” 22 Ny marin̈y aminany, rantsambatan̈a sasany zahan̈a karaha malemy kanefa irô io ilain̈a. 23 Aviô zay faritry amy vatan̈a iritriretintsika fa tsy dia misy hajany, irô in̈y edy amezantsika voninahitry maventy, baka iô hajaintsika mare faritry tsy dia manaitry amy vatan̈antsika. 24 Fa faritry misy hajany amy vatan̈antsika ndraiky tsisy raha ilainy; ke Zan̈ahary koa fa nampitambatra vatan̈a, namezany voninahitry be faritry tsy dia misy voninahitry, 25 amy zen̈y vatan̈a tsy hisaratsaraka, aviô irô rantsambatan̈a aby io hifan̈ahoa. 26 Izikoa rantsambatan̈a araiky mijaly, mijaly miaraka aminany koa rantsambatan̈a jiaby. Izikoa rantsambatan̈a araiky mahazo voninahitry, ravoravo miaraka aminany koa rantsambatan̈a jiaby.
27 Anarô vatan̈an’i Kristy, baka iô anarô tsiaraikiaraiky io rantsambatan̈a. 28 Karaha ty aby nanendren’ny Zan̈ahary olo tsiaraikiaraiky an̈ivon’ny fiangonan̈a: Voanalohany, apôstôly; faharoe, mpaminan̈y; fahatelo, mpampianatra; baka iô irô man̈ano fahagagan̈a aby io, irô mahay mampahivan̈a olo, irô man̈ampy olo, irô mahay mitariky, aviô irô mivolan̈a amy volan̈a* isan-karazany. 29 Tsy irô jiaby apôstôly, tsy zen̈y? Tsy irô jiaby mpaminan̈y, tsy zen̈y? Tsy irô jiaby mpampianatra, tsy zen̈y? Tsy irô jiaby man̈ano fahagagan̈a, tsy zen̈y? 30 Tsy irô jiaby mahay mampajanga, tsy zen̈y? Tsy irô jiaby mivolan̈a amy volan̈a* isan-karazany, tsy zen̈y? Tsy irô jiaby mpandika teny, tsy zen̈y? 31 Kanefa mifen̈a mare fo baka anarô hahazo* kadô maro maventy. Anarô handeha han̈aboahako lalan̈a tsara mare mandilatra irô raha aby io.