Laoi-laa Kɛɛ A Kuɓaraŋ Korai-ɓela Lɛlɛɛi Kumɛni Ma!

1-2. Le ɓa mɛnii dɔnɔ nyii maa mɛni kpanaŋɔɔi Ziova mai, nyaŋ le ɓe a ŋwɛlii ku gɛ?

BEREI kwa tua la a nua takpɛni-ŋai kaa a mɛni-kpanaŋ Ziova ŋɛi. Zisɛ e mo kua a gɛɛ maa nɛ̃ɛi ku kukɔlɛ-ma-ɓelai wɛli yɛɛ kua kpiŋ. (Mf. 22:​37-39) Nuai ŋi da pɔri kpiŋ kɛi a diai nyii-ŋai dife Ziova fɛlii. Kwa nyiŋi kɛ, gɛ ni kukaa Ziova Ɣala ŋɔmɛni-kɔɔŋ-maai pɔɔkɔɔni nyii a “voloi kɛ e too sɔnyɔŋ-ɓela da tɔ̃ya-ɓela dia, e dunai tɛɛ dɔ̃ya-ɓelai da ŋoya-ɓelai diɛ.”—Mf. 5:45.

² Berei maŋ Ziova e nuu kelee wɛlini lai, kɛlɛ e diai da ŋoo mɛnii wɛlini a ŋanaa. (Zɔŋ 14:21) A ŋwɛlii a gɛɛ ku bɔɔkɔɔŋ. A ku fɔrɔi a gɛɛ ‘kuwɛli-kɛ-maai su e kpanaŋ’ kubɔlɔ da sisɛ-ŋai mɛni ma, ku “nuu-laa wɛli-kɛ-maa” lɛ dia. (1 Pi. 4:8; Lo. 12:10) Ŋwɛli-kɛ-maai ŋi kaa yɛɛ ŋwɛli-kɛ-maai a kɛ kuyeei kukaayɔɔi su-ɓela kpaa kulaoi lɛlɛɛ-ŋa mɛni mai.

3. Le ɓe maa nɛ̃ɛi e lɛɛ kukili-ŋa e pilaŋ wɛli-kɛ-maa ma?

³ Yɛɛ berei nɔ maa nɛ̃ɛi ku si-sɛŋ ta mɛi kaa la a nɛlɛɛ e lɛɛ pai ɓɔlɔi, bere nɔ ɓe maa nɛ̃ɛi ku kɔ la a gbanaŋɔɔ a gɛɛ kuwɛli-kɛ-maai e ɓɔlɔ a tãi kelee kuɓaraŋ Korai-ɓela mɛni ma. Zia-nuui Pɔɔ e mo Korai-ɓela dia nyɛɛi: “Tɔɔ ŋwɛli-kɛ-maai kayeei kakie ni mɛni mai e li nɔ tuɛ-pere.” (Ib. 13:1) Ziova a ŋwɛlii a gɛɛ ku kanaŋ tii kɛi a gɛɛ kuwɛli-kɛ-maai e ɓɔlɔ kukie-ni mɛni ma. Zɛŋ-lɛɛi ŋi a pai kpɔnii kua a gɛɛ ku berei kaa maa nɛ̃ɛi ku laoi-laa lɛlɛɛ kɛ la a kuɓaraŋ korai-ɓela da berei kwa pɔri gɛi la a tãi kelee.

MƐNII GE NƐLƐƐI KU LAOI-LAA KƐ LA A KUƁARAŊ KORAI-ƁELA

4. Yɛɛ berei gaa la Ŋule-wooi 133:1 sui, le ɓe kwa pɔri gɛi a gɛɛ ku kanaŋ yee-see-mu lɛi gɛ-zu-tɔnɔi mɛni ma kusamai? (Ya pɔri ŋɔnɔ votoo-ŋai kaai.)

⁴ Ŋule-wooi 133:1 lono. Ku faai mɛnii ma Ŋule-woo pɔ̃yɛ-nuui e mo a gɛɛ laoi-laa kɛɛ a diai nyii-ŋai Ziova wɛlinii kaa a “mɛni lɛlɛɛ.” Yɛɛ berei nɔ kwa pɔri kuŋɛi naɣiŋ ni la wuru kɛtɛ lɛlɛɛ ta mɛi nyii kwa gaa a tãi kelee, bere nɔ ɓe kwa wala tãi siɣe, kwa pɔri kuŋɛi naɣiŋ ni la gɛ-zu-tɔnɔ lɛlɛɛi mɛi nyii gaa ku samai. Ee kwa kubɔlɔ da sisɛ-ŋai kaa a tãi tamaa a lɔɔ-kuu kelee, le ɓe kwa pɔri gɛi a gɛɛ ku kanaŋ yee-see-mu lɛi dimɛni ma? Kuwɛli-kɛ-maai kubɔlɔ da sisɛ-ŋai mɛni ma a pai ɓɔlɔi a kɛ kwa tãi siɣe a gɛɛ ku kukili-ŋa sia e pilaŋ berei ma dimaa mɛni kpanaŋɔɔi la kua da korai-toli-kpɔŋ.

5. Le ɓe kuwɛli-kɛ-maai kubɔlɔ da sisɛ-ŋai mɛni ma a gɛ a nua takpɛni-ŋa?

⁵ Ŋwɛli-kɛ-maai kuyeei kukie-ni mɛni mai, a nua taŋa lii kula da pa goyaŋ su a tãi maa-ŋuŋ. Nyiŋi a kpiŋ gɛ di taŋa di laa la a gɛɛ daa dɔ̃yai kaa. Zisɛ e mo nyɛɛi: “Nyiŋi mɛni ma nuu kelee a pai gɔlɔŋ ni a gɛɛ kakaa a ŋapolu-ɓela, a kɛ wɛli-kɛ-maa kaa kayeei kakie-ni mɛni ma.” (Zɔŋ 13:35) Kwaa Chaithra ŋɔmɛni-kɔɔŋ-maai kaa nyii kɛ lii kɔlɔ-pɛrɛ kɛtɛ mu, gɛ ŋɔnɔ Ŋala-kɔlɔi maa-kɔri a Ziova Ŋɔsere-faa Kɛ-ɓelai. E faa ma a gɛɛ e li kukɔ̃ŋvensɔŋ-ŋai tɔnɔ ma. Gɛɛ aa li kɔ̃ŋvensɔŋ ma a voloi maa-ŋuŋ, e mo Ŋɔɣala-kɔlɔ ŋaa-lɛ-nuui ma nyɛɛi: “Ŋgaa-ɓela dife ta wɔlɔ kpulɔŋ ni ma. Kɛlɛ kɔ̃ŋvensɔŋ ŋi ma, bɔlɔ da sisɛ-ŋai daa kpulɔŋ ma giei buu lɔɔlu kao feerɛ (52) volo tɔnɔi ŋi yee mu! Ŋaa gaa a gɛɛ Ziova a tii kɛi a ŋɔnuai a gɛɛ e ŋɔwɛli-kɛ-maai lɛ ma. Ŋa ŋwɛlii ŋa kɛ a gaayɔɔi ŋi su-nuu ta.” Chaithra e kanaŋ Ŋala-kɔlɔi maa-kɔrii gɛ mɛni maa faleŋɔɔ-ŋa kɛ ŋɔkɛ-ɣeniɛi su, nyaŋ e batai kɛ goraŋ 2024 su. Tɔ̃ya ma, tãi tamaa nua da kutii lɛlɛɛi kaa da ŋwɛli-kɛ-maai kwa nɛ kukie-ni mɛni mai, a dilii kula a gɛɛ di pɛlɛ Ziova fɛlii.—Mf. 5:16.

6. Pere sii kɛɛ leŋ ɓe laoi-laa kɛɛ a kubɔlɔ da sisɛ-ŋai a kumaa kɔ̃ɔ lai?

⁶ Laoi-laa kɛɛ a kubɔlɔ da sisɛ-ŋai a kumaa kɔ̃ɔ. Zia-nuui Pɔɔ e mo maraŋ Kora-ɓela dia nyɛɛi: “Ka kakie-ni lia-woo ɓo a ɣele kelee a gɛɛ ka tɔnɔ kpiŋ kafe kalii kpanaŋ a sɔnyɔŋ ŋɔnuu pɛlɛɛ.” (Ib. 3:13) A kɛ lii-too-polu a gɛ a gbanaŋɔɔ a gɛɛ ku Ziova nĩa-mɛni kɛ, Ziova a pɔri kuɓaraŋ Kora-nuu ta lii kulai a gɛɛ e ku lia-woo ɓo. (Ŋu. 73:​2, 17, 23) Nyaŋ lia-woo kɛɛ ŋi lɛlɛɛi kumɛni ma kpɛni fei a kumaa kɔ̃ɔ.

7. Wɛli-kɛ-maa pilaŋɔɔi leŋ kɛ-zu-tɔnɔ ma? (Kolasiɛŋ 3:​13, 14)

⁷ Kukaa kpɔŋ-gie-ma su nyii zu-ɓela da kɔ a gbanaŋɔɔ a gɛɛ di wɛli-kɛ-maa lɛ dikie-ni dia. Mɛni ma kwa luwa tamaa ŋaa-nɛ̃ɛ kula. (1 Zɔŋ 4:11) Gɔɔŋ-maa ɓa, wɛli-kɛ-maa a kulii kula a gɛɛ ku ‘kulii kpele kukie-ni yeei,’ nyaŋ nyiŋi a pa a kɛ-zu-tɔnɔ kusama. (Kolasiɛŋ 3:​13, 14 lono; If. 4:​2-6) Mɛni ma kwa lii-nɛ̃ɛ kpɔɔi ŋaa-nɛ̃ɛ kula kukpɔŋ-gie-mai su nyii ifa gaa kwaa kelee ta mai.

KWA ƁAA-KƐ-MAA LƐ KUKIE-NI DIA

8. Pere sii kɛɛ leŋ ɓe Ziova a kpɔŋ maa tɛɛ la kupɔ a gɛɛ kɛ-zu-tɔnɔ e kɛ kusama?

⁸ Berei maŋ ku maa fe waa ni lai, kɛlɛ kwa kɛ-zu-tɔnɔ ŋaa-nɛ̃ɛ kulai ŋeniɛi gwaa kelee. Nyiŋi kaa a ŋɛi-kɛ-maa nyii kula Ziova yeei. (1 Kl. 12:25) Ŋala-kɔlɔi e mo a gɛɛ ‘Ɣala a kukie-ni wɛli pere lɛ kua kpiŋ kua.’ (1 Tɛ. 4:9) Nyiŋi sukulai ɓa Ziova a tii kɛ a Ŋala-kɔlɔi a gɛɛ e mɛnii lɛ maa nɛ̃ɛi ku gɛ a gɛɛ ku laoi-laa kɛ a kuɓaraŋ Korai-ɓela. Kwa Ŋala-kɔlɔi maa-kɔri a nɛlɛɛ ku sia a mɛni-ŋai kwa maa-kɔrii, a nɛ a gɛɛ ‘Ɣala a kukie-ni wɛli pere lɛi kua.’ (Ib. 4:12; Zĩ. 1:25) Nyaŋ nyiti ɓe Ziova Ŋɔsere-faa Kɛ-ɓelai da kɔ a gɛɛ di gɛ.

9. Le ɓe ku maa-kɔri Lomaŋ 12:​9-13 su a pa ɓaa-kɛ-maa lɛɛ ma kukie-ni dia?

⁹ Le ɓe kwa pɔri maa-kɔrii Ŋala-kɔlɔi su a pa berei ma kwa pɔri laoi-laa kɛi la a kukie-ni? Kwaa mɛnii kaa Pɔɔ e mo Lomaŋ 12:​9-13 su. (Nono, NWT.) E lɛɛ kukili-ŋa a gɛɛ e mo nyɛɛi: “A pa ɓaa-kɛ-maa lɛɛ ma kukie-ni mɛni ma, kɛ a nuui maa-ŋuŋ.” Nyiŋi sukulai ɓa le? Zukulai ɓa a gɛɛ ku pere sii takpɛni-ŋa kɔri a gɛɛ ku “nuu-laa wɛli-kɛ-maa” lɛ kuɓaraŋ Korai-ɓelai dia, a di su mɛni lɛɛ da ɓɛlɛ-see kɛɛ diɛ. (If. 4:32) Maa fe nɛ̃ɛ ni ku maa kpɛŋ kɛ a gɛɛ kuɓaraŋ Korai-nuu e laoi-laa kɛ a kua fulɔi, kɛlɛ maa nɛ̃ɛi ‘kukɛ a nuui maa-ŋuŋ.’ Ya nyiti kɛ, ya pai mɛnii kaai Zisɛ e moi. E mo nyɛɛi: ‘Lii-nɛ̃ɛ tamaa kaa ɓɛlɛ-see kɛɛ su, e tɛɛ la ɓɛlɛ-see sɔlɔ ɓoɔɔ ma.’—Dikɛ-mɛni-ŋai 20:35.

10. Kwa pɔri nɛi leŋ a gɛɛ kufe a nyɛ̃ŋ-nyɛ̃ŋ-ɓela a pa ɓaa-kɛ-maa lɛɛ ma kukie-ni dia? (Ya pɔri ŋɔnɔ votooi kaai.)

¹⁰ Zia-nuui Pɔɔ kɛɛ aa mo a gɛɛ kukɛ a nuui maa-ŋuŋ a pa ɓaa-kɛ-maa lɛɛ ma kukie-ni dia, e ŋɔnɔ mo nyɛɛi: ‘Kufe kɛ a ku nyɛ̃ŋ-nyɛ̃ŋɔɔ.’ Nuu nyii ve nyɛ̃ŋ-nyɛŋ nii kaa a tii kpanaŋ kɛ-nuu. Ya tii tɛɛ bɔ gɛ mɛni ma, a gɛ a nii kelee. Tare-woo-ŋa 3:​27, 28 e mo nyɛɛi: “Ife kpera kpɔŋ-ma tɛɛi diai pɔ maa nɛɛi I dɛɛ dipɔi.” Mɛni ma kwa gaa a gɛɛ nuu ta a ŋwɛlii a kpɔŋ maa, kwa kɔ a gɛɛ ku kpɔŋ maa tɛɛ bɔ a maa felaa. Va kɛ kukili-ŋa a gɛɛ nuu takpɛni a pai gaai e kpɔŋ maa tɛɛ bɔ.—1 Zɔŋ 3:​17, 18.

11. Le ɓe pai kpɔnii kua a gɛɛ ku laoi-laa lɛlɛɛ kɛ a kuɓaraŋ Korai-ɓela?

¹¹ Bere sii dɔnɔ kwa ɓaa-kɛ-maa lɛ la kuɓaraŋ Korai-ɓela diai ɓa, ku di su mɛni lɛɛ a maa felaa. Ifisiɛŋ 4:26 e mo nyɛɛi: “Kalii-ŋwanai fe lɛɛ zu folo e li.” Le mɛni ma? Ŋoo-kpua 27 e mo a gɛɛ nyiŋi kɛɛ a ‘tãi tɛɛ Dɛɓelei pɔ.’ Ziova a ku fɔrɔ a tãi tamaa Ŋala-kɔlɔi su a gɛɛ ku kukie-ni su mɛni lɛɛ. Kolasiɛŋ 3:13 e mo nyɛɛi: “Ka kakie-ni su-mɛni lɛɛ.” Bere sii lɛlɛɛi kwa pɔri laoi-laa kɛi la a kuɓaraŋ Korai-ɓelai tɔnɔ ɓa ku di su mɛni lɛɛ. Kwa nyiŋi kɛ, gɛ ni kukaa ‘mɔleŋ ŋɔkɛ-zu-tɔnɔi kɛi nii-seei su nyii a nua kɛ zu tɔnɔi.’ (If. 4:3) Zu ponoɔɔi a gɛɛ nua su mɛni lɛɛ a pa a lii-see da kɛ-zu-tɔnɔ kusama.

12. Ziova a kpɔŋ leŋ kua a gɛɛ ku nua su mɛni lɛɛ?

¹² Tɔ̃ya ma, a kɛ a gbanaŋɔɔ a gɛɛ ku nua su mɛni lɛɛ. Kɛlɛ Ɣala a pɔri kpɔŋ maa tɛɛi kupɔ mɔleŋ maa waai sarai a gɛɛ ku di su mɛni lɛɛ. Ŋala-kɔlɔi kɛɛ a mo a gɛɛ ku “nuu-laa wɛli-kɛ-maa lɛ kukie-ni dia, kufe kɛ a nyɛ̃ŋ-nyɛ̃ŋ-ɓela,” e ŋɔnɔ mo nyɛɛi: “Ka kpanaŋ ka mɔleŋ su.” Nyiŋi su kulai ɓa Ɣala ŋɔmɔleŋ maa waai a kukponoi kpanaŋ. Mɛni ma mɔleŋ maa waai a kpɔŋ kua a gɛɛ ku nuu-laa wɛli-kɛ-maa lɛ, ku nua su mɛni lɛɛ a kulii kelee. Nyiŋi ɓe gɛ kwa Ziova fɛli a gɛɛ e ŋɔmɔleŋ maa waai tɛɛ kupɔ.—Luu 11:13.

‘ŊAA-KƆLƐ FE KƐ KASAMA’

13. Le ɓe a pɔri pai a ŋaa-kɔlɛ kusamai?

¹³ Korai-toli-kpɔŋ laa fɛɛi a ‘nuu sii kelee’ nyii-ŋai kula kwaa takpɛni-ŋa ma, dimɛni kɛ pere kɛ ɓo a dakpɛnii. (1 Te. 2:​3, 4) Kwa wala tãi siɣe, mɛni-kpɛtɛɛ-ŋai kwa gɛi a pɔri pai a ŋaa-kɔlɛ kusama yɛɛ kumaa-ɣiri pere, zale sii kwa pai kuyee see mui, da nĩa-kɛ-mɛni-ŋai kwa pai kuyee pui zui. (Lo. 14:4; 1 Kl. 1:10) Ee ‘Ɣala aa kukie-ni wɛli pere lɛ kuai,’ maa nɛ̃ɛi ku tãi siɣe a gɛɛ kufe mɛni-ŋai ŋwɛli kaa kuai kpala kuɓaraŋ-ŋa la.—Fe. 2:3.

14. Le ɓe maa nɛ̃ɛi ku kɔ a gɛɛ ku gɛ a tãi kelee, nyaŋ le mɛni ma?

¹⁴ Kwa ŋɔnɔ kɔ a gɛɛ ŋaa-kɔlɛ fe pa Korai-toli-kpɔŋ su a nua fɔrɔɔ a tãi kelee. (1 Tɛ. 5:11) Kuui ŋi su, kuɓaraŋ Korai-ɓela tamaa nyii-ŋai ditɔɔi fe ŋɔnɔ kɛ ni a gbanaŋɔɔ dɔ̃yai sui kpaa nyii-ŋai di di kula korai-toli-kpɔŋ sui, daa pa polu dɔ̃yai su. Kwa kuyee see dimu a nɛlɛɛ! (2 Kl. 2:8) Mɛnii kaa sisɛ tɔnɔ nyii fii-kpɛɛ e gɛ e kpera ɣala-woo ɓoi a koraŋ puui e mo gɛɛ aa pa polu Galoŋ-laa pɛrɛi la. E mo nyɛɛi: “Nuai kelee lii e kɛ a nɛ̃ɛ, dikɛ nyee soŋ.” (Dikɛ-mɛni-ŋai 3:19) Le ɓe nyiŋi e gɛ a sisɛi ŋi? E mo nyɛɛi: “Ŋa gaa a gɛɛ Ziova e kɛ kpɔnii ma a gɛɛ nii e kɛ ŋɔnɔ a nɛ̃ɛ.” Kwa kɔ a gɛɛ ku nua fɔrɔ, kwa pai nɛɛi naa a gɛɛ Korai e tii kɛ a kua a gɛɛ ku diai fɔrɔ nyii-ŋai ‘mɔ̃lɛi, tĩa wuyɛ kɛ ɓo diyeei.’—Mf. 11:​28, 29.

15. Le ɓe ŋɔnɔ kwa pɔri gɛi a gɛɛ kɛ-zu-tɔnɔ e kɛ ŋɔnɔ korai-toli-kpɔŋ su? (Ya pɔri ŋɔnɔ votooi kaai.)

¹⁵ Bere sii dɔnɔ kwa pɔri ŋɔnɔ gɛi la a gɛɛ kɛ-zu-tɔnɔ e kɛ korai-toli-kpɔŋ sui ɓa, kulono pere. Zoo 12:11 e mo nyɛɛi: “A kɛ nuu a mɛni mɛni, va maa kpɛɛ e gaa a kɛ gaa a tɔ̃ya? . . . Bere sii tɔnɔi ŋi nɔ ɓe a mii-sɛŋ kɔɔŋ la e gaa a kɛ nɛlɛɛi.” Yɛɛ berei nɔ leɣi-ɣili-nuu lɛlɛɛ a mii-sɛŋ kɔɔŋ la e lɛɛ pai dɛɛi nua pɔi, bere nɔ ɓe maa nɛ̃ɛi ku kukili-ŋa sia la a nɛlɛɛ e pilaŋ mɛnii ma kwa pai moi ku lɛɛ pai moi. (Ŋu. 141:3) Kwa ŋwɛlii ku kɔ a tãi kelee a gɛɛ kulono pere e nua kponoi kpanaŋ, e di fɔrɔ, e ‘luwa laa diai dia da kuwoo mɛnii.’—If. 4:29.

16. Gbɛɛ-ni titi ɓe maa nɛ̃ɛi di nua fɔrɔ dilono pere su?

¹⁶ Maa nɛ̃ɛi nɛni-kula-sinaa da loŋ-kaa-ɓela titi di kɔ a gɛɛ di nua fɔrɔ a dilono pere. (Ko. 3:​19, 21; Taitɔ 2:4) Maa nɛ̃ɛi korai-toli-kpɔŋ laa-tuɛ-ɓelai di Ziova ŋɔnuai fɔrɔ di diŋaa nɛnɛ. (Az. 32:​1, 2; Ga. 6:1) Ŋala-kɔlɔi e mo nyɛɛi: “Mare-kɛɛ sukula nuu lɛlɛɛ a mare-kɛɛ sukula a zukula tãi, a pa a lii-nɛ̃ɛ!”—Tá. 15:23.

KWA WƐLI-KƐ-MAA LƐ “KUTUA-PERE SU DA TƆ̃YA-LAA”

17. Kwa pɔri nɛi leŋ a gɛɛ tɔ̃ya wɛli-kɛ-maa kaa kuyeei kubɔlɔ da sisɛ-ŋai mɛni ma?

¹⁷ Zia-nuui Zɔŋ e ku fɔrɔ a gɛɛ ‘kuwɛli-kɛ-maai fe kɛ nɔ a woo-folo da kulono pere, kɛlɛ fɛɛ ku gɛ kutua pere su da tɔ̃ya-laa.’ (1 Zɔŋ 3:18) Kwa ŋwɛlii kuwɛli-kɛ-maai kubɔlɔ da sisɛ-ŋai mɛni ma e kɛ a tɔ̃ya wɛli-kɛ-maa. Kwa pɔri nyiŋi kɛi leŋ? Kwa tãi tamaa siɣe gie ma a kubɔlɔ da sisɛ-ŋai, nyiŋi a pai kulaoi-laai su kpanani, e kuwɛli-kɛ-maai su kpanaŋ dimɛni ma. Mɛni ma pere kɔri a gɛɛ I tãi siɣe gie ma a iɓaraŋ korai-ɓela goyaŋ-ŋai da ŋala-woo-ɓo tii su. Tãi siɣe a gɛɛ I bɔlɔ da sisɛ-ŋai naa kaa. Kwa nyiŋi kɛ, kwa nɛi a gɛɛ ‘Ɣala a kukie-ni wɛli pere lɛi kua.’ (1 Tɛ. 4:9) Nyaŋ kwa pai gaai a gɛɛ tɔ̃ya ma, nɛlɛɛi a gɛɛ “Ɣala ŋɔnuai dikɛ dikie ma woo laa-maa su!”—Ŋu. 133:1.