Maa-yeŋ-laa Lɛ A Kɛ Ife Mɛni Taŋa Kɔlɔŋ

1. Ziova e ku kpɛtɛ a pere sii kɛɛ leŋ, nyaŋ le mɛni ma?

ZIOVA e ku kpɛtɛ a pere sii nyii kwa pɔri kukili-ŋa siai, ku mɛni nina maa-kɔri, gɛ ni ku ŋɔnɔ mɛni ŋaa-kaa a nɛlɛɛ. Le mɛni ɓe Ziova e ku kpɛtɛ la a bere sii kɛɛ ŋi? Kpɛni fei a ŋwɛlii a gɛɛ ku “tare maa mɛni su,” ku pɔri mɛni-kpɛtɛɛ lɛlɛɛ-ŋa kɛi vɛliɛ su.—Tá. 2:​1-5; Lo. 12:1.

2. (a) Le ɓe maa nɛ̃ɛi ku gɔlɔŋ e pilaŋ kukpiŋ mai? (Zoo 37:​23, 24 NWT) (Ya pɔri ŋɔnɔ votooi kaai.) (b) Mɛni lɛlɛɛ kɛɛ leŋ ɓe kwa pai zɔlɔ ɓoi kwa gɔlɔŋ a gɛɛ maa fe nɛ̃ɛ ni ku mɛni kelee kɔlɔŋ?

² Berei maŋ Ziova e ku kpɛtɛ la a gɛɛ ku mɛni tamaa maa-kɔrii, kɛlɛ mɛni kelee fei ku gɔlɔŋ. (Zoo 37:​23, 24 lono NWT.) Ikili-ŋa sia e pilaŋ Zoo ŋɔmɛni-kɔɔŋ-maai ma. Ziova e mare-kɛɛ tamaa tɛɛ Zoo pɔ nyii kpɔŋ ma e gaa a gɛɛ mɛni tamaa e kɛ naa nyii ve kɛ ni a gɔlɔŋɔɔi. Nyiŋi e ŋɔnɔ kpɔŋ Zoo ma e gaa a gɛɛ maa nɛ̃ɛi e maa-yeŋ-laa lɛ, e ŋɔkili-ŋa-siai maa faleŋ. (Zoo 42:​3-6) Kua maŋ kwa mɛni lɛlɛɛ sɔlɔ ɓo kwa gɔlɔŋ a gɛɛ kufe mɛnii kelee kɔlɔŋ. Nyiŋi a kpɔŋ kua a gɛɛ ku kukili tɔɔ Ziova ma a gɛɛ a pai mɛnii kelee maa nɛ̃ɛi ku gɔlɔŋ lɛi kua a gɛɛ ku pɔri mɛni-kpɛtɛɛ lɛlɛɛ kɛi.—Tá. 2:6.

3. Le ɓe kwa pai maa-kɔrii zɛŋ-lɛɛi ŋi su?

³ Zɛŋ-lɛɛi ŋi su, kwa pai lonoi e pilaŋ mɛni-ŋa dia nyii-ŋai kufe di kɔlɔŋ da mɛni-kpanaŋ-ŋai nyiŋi a pa la kupɔ kukɛ-ɣeniɛi sui. Kwa pai ŋɔnɔ mɛni maa-kɔrii e pilaŋ mɛnii ma gɛ a nɛlɛɛ a gɛɛ kufe mɛni taŋa kɔlɔŋ. Mɛnii kwa pai maa-kɔrii a pai kpɔnii kua a gɛɛ ku kukili tɔɔ Ziova ma nyii ‘dareɛɛi e tɛɛ kuai’ a gɛɛ e mɛnii maa nɛ̃ɛi ku gɔlɔŋ ɓo kua.—Zoo 36:4.

KUFE TÃI KƆLƆŊ ŊENIƐI KPƐƐ-ŊA A PA PAI LAI

4. Yɛɛ berei Maafiu 24:36 e mo lai, mɛni-ŋuŋ tɔnɔ kɛɛ leŋ ɓe kufe gɔlɔŋ?

⁴ Maafiu 24:36 lono. Kufe tãi kɔlɔŋ ŋeniɛi ŋi a pai kpɛɛi lai. Nyaŋ Zisɛ kɛɛ nɔii ma ɓɛi, e kpiŋ mo a gɛɛ ve “aɓai da voloi kɔlɔŋ.”a E mo zia-ɓelai dia naa polu ma a gɛɛ Ziova nɔ ɓe tãi da aɓai kɔlɔŋ a pɔri mɛni kelee ta kɛi la kpɛni fei “maa wala-walalaa kaa nyeei.” (Dikɛ-mɛni-ŋai 1:​6, 7) Ziova e tãi kɔlɔŋ ŋeniɛi ŋi a pai kpɛɛi lai, kɛlɛ kufe tãi titi kɔlɔŋ a pai kpɛɛi lai.

5. Ee kufe aɓai da tãi kɔlɔŋ ŋeniɛi a pai kpɛɛi lai, le ɓe tãi ta nyiŋi a pɔri gɛi a kua?

⁵ Yɛɛ berei Zisɛ e mo lai, kufe tãi kɔlɔŋ ŋeniɛi ŋi a pai kpɛɛi lai. Mɛni ma kufe tãi kɔlɔŋ maa nɛ̃ɛi ku maa kpɛŋ kɛ lai. Nyiŋi a pɔri pai a lii-too-polu kupɔ a kɛ kwaa tua Ziova ŋɔfoloi maa kpɛnii. A pɔri ŋɔnɔ gɛi a gɛɛ kufa pɔri tɔɔi a gbanaŋɔɔ kukaayɔɔi su-ɓela kpaa nua takpɛni-ŋa da kɛ ɣɛlɛ-maa kulai kukponoi. (2 Pi. 3:​3, 4) Tãi ta a pɔri kɛi kukili-ŋa a gɛɛ kuui kɛ a ŋeniɛi kpɛɛ-ŋa tãi kɔlɔŋɔɔ, eei pɔri kpɔnii kua a gɛɛ ku maa kpɛŋ kɛ a lii-kpele pere, ku tɔɔ a gbanaŋɔɔ a kɛ kpiŋ nua da kɛ ɣɛlɛ-maa kulai kukponoi.

6. Le ɓe gɛ a mɛni lɛlɛɛ a gɛɛ kufe tãi kɔlɔŋ ŋeniɛi a pai kpɛɛi lai?

⁶ Berei maŋ Ziova fe voloi titi lɛ ni la ŋeniɛi a pai kpɛɛi lai, kɛlɛ nyiŋi a kpɔŋ kua ku nɛ a gɛɛ kwa vɛlii kpɛni fei wɛli-kɛ-maa kaa kuyeei mɛni ma, nyaŋ ku laai a nyaa. Kufe Ziova fɛlii nɔ ŋeniɛi kpɛɛ-ŋa tãi mɛni ma, kɛlɛ kwa ŋwɛlii ku vɛli wɔlɔ-wɔlɔ da wɔlɔ-wɔlɔ. Mɛni ma, kufe ŋwɛlii ku kukili-ŋa sia a damaa e pilaŋ tãi ma ‘Ziova ŋɔɣelei’ a pa pai lai. Kɛlɛ, kwa ŋwɛlii a gɛɛ ku kukili-ŋa sia e pilaŋ mɛni lɛlɛɛ-ŋai dia Ziova ŋɔɣelei a pai pai lai. Nyiŋi a pai kpɔnii kua a gɛɛ ku kanaŋ lɛɣɛi a Ɣala, ku laa a nyaa, ku kɔ a pere sii kelee a gɛɛ ku nĩa-mɛni kɛ.—2 Pi. 3:​11, 12.

7. Le ɓe ku gɔlɔŋ?

⁷ Nɛlɛɛi a gɛɛ ku kukili-ŋa sia e pilaŋ mɛni-ŋai dia ku di kɔlɔŋ. Ku gɔlɔŋ a gɛɛ ŋele-ŋai kpɛɛ-ŋa tãi kɔɔ e pilaŋ goraŋ 1914 su. Ziova aa tuɛ-mɛni tamaa ɓo nyii nɛ a gɛɛ ŋele-ŋai kpɛɛ-ŋa tãi kɔɔ e pilaŋ goraŋ ti su. E ŋɔnɔ mɛni tamaa ɓo e pilaŋ berei ma ŋeniɛi kɛ pere e kɛ pai kɛi la e siɣe goraŋ ti ma. Berei duɛ-mɛni-ŋai ŋi ŋaa-see aa kɛi lai, a gɛ ku laa la a gɛɛ ‘Ziova ŋɔɣele kɛtɛi aa lɛɣɛ.’ (Zf. 1:14) E tee nyiti ma, ku dii kɔlɔŋ Ziova a ŋwɛlii ku gɛi. A ŋwɛlii ku “Galoŋ-laai maa-tuŋ lɛlɛɛi” ɓo nua tamaa dia. (Mf. 24:14) Kukaa naa duŋ lɛlɛɛi ŋi ɓoi lɔii-ŋuŋ ŋɔŋdɔ feerɛ polu buu naaŋ (240) su da sii-woo wala tɔnɔ (1000) da bolu su. Ve a kpa a gɛɛ ku ‘aɓai da tãi’ kɔlɔŋ ŋeniɛi ŋi a pai kpɛɛi la ku lɛɛ pai ɣala-woo ɓoi a kulii kelee.

KUFE BEREI KELEE KƆLƆŊ ZIOVA A PAI KPƆŊ MAA TƐƐI LA KUPƆI

8. “Ɣala ŋɔtii kɛ-pere” sukulai ɓa le? (Ikilisiati 11:5)

⁸ Kufa pɔri tarei “Ɣala ŋɔtii kɛ-pere su” a tãi kelee. (Ikilisiati 11:5 lono.) Nyiŋi sukulai ɓa mɛnii Ziova a gɛi kpaa mɛni-ŋai a nɛɛ naa a gɛɛ e kɛi a gɛɛ e gbɛtɛ-mɛni kelee ŋaa-see kɛ. Kufe mɛnii kelee kɔlɔŋ nyii a gɛ Ziova e nɛɛ naa a gɛɛ mɛni ta e kɛ kpaa berei a pai kpɔnii la kuai. (Ŋu. 37:5) Ŋala-kɔlɔi e berei kufa pɔri tarei la ‘Ziova ŋɔtii kɛ-pere sui,’ kɔɔŋ berei ma loloŋ a ɓɔlɔ la nee kɔɔ-ɓɔlɔŋ sui. Kɔlɔ-kɔlɔŋ-ɓela kpayakpaya dife nii mɛnii ŋi ŋaa-kaa ni ma a nɛlɛɛ. Bere sii tɔnɔi ti su, kufe berei kelee kɔlɔŋ Ziova a pai kpɔŋ maa tɛɛi la kupɔi.

9. Ee kufe berei kɔlɔŋ Ziova a pai kpɔnii la kuai, kili-ŋa-sia kɛɛ leŋ ɓe a pa la kupɔi?

⁹ Kwa wala berei kɔlɔŋ Ziova a pai kpɔnii la kua kukɛ-ɣeniɛi su, tãi ta a gɛ a gbanaŋɔɔ a gɛɛ ku mɛni-kpɛtɛɛ taŋa kɛ dɔ̃yai su. Mɛni-kpɛtɛɛ-ŋai ŋi taŋa ɓa: kumaa tɛɛ kuɣala-woo-ɓo tii su kpaa ku liɛ ɓɛi ɣala-woo-ɓo-ɓela tamaa dife naai. Kpaa maŋ tãi ta a pɔri kɛi kukili-ŋa a gɛɛ Ɣala lii fe laa ni kumɛni ma kpɛni fei kufe nii kumɛni-kpɛtɛɛ-ŋai ŋaa-see kɛ ni. Kpaa kwa pɔri kɛi ɣala-woo ɓoi a tãi kelee, kɛɛ Ɣala-kɔlɔ maa-kɔri-nuu fe kuyeei, kpaa maŋ kwa pɔri kɛi gbɔŋ-gie-mai ŋɔpɛrɛ tɔɔ tii ta kɛi, kɛɛ kukɛ tɛɛ mɛni-kpanaŋ-ŋa su. Mɛni-ŋai ŋi da pɔri gɛi ku gaa yɛɛ Ziova fe kpɔŋ maa tɛɛi kupɔ.

10. Ee kufe mɛnii kelee kɔlɔŋ Ziova a pai gɛi, tua-pere lɛlɛɛ kɛɛ leŋ ɓe nyiŋi a kpɔŋ kua a gɛɛ e kɛ kuyeei?

¹⁰ Ee kufe mɛnii kelee kɔlɔŋ Ziova a pai gɛi, nyiŋi a kpɔŋ kua a gɛɛ ku tua-pere lɛlɛ-ŋa maa-kɔri yɛɛ maa-yeŋ-laa. A ŋɔnɔ kpɔŋ kua ku gaa a gɛɛ Ziova ŋɔkili-ŋa-siai da ŋɔmɛni-ŋaa-kaai tɛɛi kuwɔi ma. (Az. 55:​8, 9) A ŋɔnɔ gɛ a gɛɛ ku kukili tɔɔ Ziova ma kpɔŋ maa mɛni ma. Kwa mɛni lɛlɛɛ kelee ta sɔlɔ ɓo ŋala-woo-ɓo tii su kpaa tii kelee ta su nyii kwa gɛ Ziova mii, kwa naa-maa-tɛi tɛɛ bɔ. (Ŋu. 127:1; 1 Kl. 3:7) Nyaŋ a kɛ kumɛni-kpɛtɛɛ ŋaa-see a wala kɛ yɛɛ berei e kɛ la kukili-ŋai, maa nɛ̃ɛi e lɛɛ kukili-ŋa a gɛɛ Ziova e mɛnii kelee kɔlɔŋ kwa tɛɛi zui. (Az. 26:12) Kwa kɔ a pere sii kelee ku kukili tɔɔ Ziova ma a gɛɛ a pai kpɔŋ maa tɛɛi kupɔ. Ku laai la a gɛɛ a pai kuteniŋ tɔɔi a kɛ kpiŋ a wala gɛ a ŋɛi-kɛ-maa pere yɛɛ berei e wɔlɔ gɛ lai.—Dikɛ-mɛni-ŋai 16:​6-10.

11. Mɛni-ŋa kɛɛ leŋ ɓe ku di kɔlɔŋ?

¹¹ Ku gɔlɔŋ a gɛɛ Ziova kaa a wɛli-kɛ-maa Ɣala, deniŋ-ɓoɔɔ, nyaŋ dareɛi. Ku gɔlɔŋ a gɛɛ mɛni-ŋai kwa gɛ Ziova da kubɔlɔ da sisɛ-ŋai mɛni mai, maa mɛni kpanaŋɔɔi ma. Nyaŋ ku gɔlɔŋ a gɛɛ Ziova a luwa laa nuai dia da vɛli a dilii kelee.—Ib. 11:6.

KUFE MƐNII KELEE KƆLƆŊ PAI KƐI TINAA-TUƐ-PEREI

12. Le ɓe kwa pɔri maa-kɔrii Zĩi 4:​13, 14 su?

¹² Zĩi 4:​13, 14 lono. Dɔ̃yai ɓa, kufe mɛnii kɔlɔŋ pai kɛi kukɛ-ɣeniɛi su tinaa-tuɛ-perei. Mɛni ta a pɔri kɛi a kua nyii kukili fe kɛ ni mai kpaa wala-walalaa fe kuyeei mɛi. (Ik. 9:​11, NWT) Mɛni ma, kufe gɔlɔŋ a kɛ kwa pai kumɛni-kpɛtɛɛ-ŋai ŋaa-see kɛi kpaa a kɛ kwa pai kɛi kpiŋ ɣeniɛ a gɛɛ ku ŋaa-see kɛ.

13. Tãi taŋa kulii a kɛ leŋ kpɛni fei kufe mɛnii kelee kɔlɔŋ pai kɛi tinaa-tuɛ-perei?

¹³ Ee kufe mɛnii kɔlɔŋ pai kɛi kukɛ-ɣeniɛi su tinaa-tua-perei, nyiŋi a gɛ a gbanaŋɔɔ a gɛɛ ku lɛɛ kutɔɔi mɛni-kpanaŋ a pa kupɔ. Le mɛni ma? Kpɛni fei tãi ta kulii a pɔri kɛi sɛlɛni e pilaŋ mɛnii ma pai kɛi tinaa-tuɛ-perei, nyaŋ nyiŋi a pɔri pai a lii-too-polu kupɔ. Kukɛ-ɣeniɛi maa a pɔri falenii a nyɔmɔɔ a tãi kelee ta, nyii a pɔri pai a lii-too-polu kupɔ. Kulii a pɔri ŋɔnɔ tooi polu a kɛ mɛni ta ŋaa-see a wala kɛ a tãi titi gaa la kukili-ŋai.—Tá. 13:12.

14. Le ɓe maa nɛ̃ɛi ku gɛ nyii a pɔri pai a lii-nɛ̃ɛ kpɔɔi kupɔi? (Ya pɔri ŋɔnɔ votoo-ŋai kaai.)

¹⁴ Kwa tɔɔ a gbanaŋɔɔ mɛni-kpanaŋ kelee ta su, a nɛ a gɛɛ ku Ziova wɛlini. Mɛni-kɔɔŋ-maa-ŋa kaa Ŋala-kɔlɔi su nyii nɛ a gɛɛ mɛni-kpanaŋ-ŋai kwa saa tɛɛi zui kelee fei Ziova a kuŋuŋ maa ɓo zu, kpaa e mɛni-kpɛtɛɛ kɛ naa-tuɛ a pa berei ma kukɛ-ɣeniɛi a pai kɛi lai. E gɔlɔŋ a gɛɛ kulii-nɛ̃ɛi fe pilaŋ ni nɔ mɛni-ŋai dia pai kɛi a kua tinaa-tuɛ-perei. Kɛɛ kwa pai lii-nɛ̃ɛ sɔlɔ ɓoi a kɛ kwa sia a ŋɔlia-woo-ŋai kukɛ-ɣeniɛi su, ku ŋoo mɛni. (Zl. 10:23) Kwa kukili tɔɔ Ziova ma kwa kɛ mɛni-kpɛtɛɛ kɛi, kwa pai kɛi yɛɛ Zĩi nyii mo nyɛɛi: “A kɛ [Ziova] a faa ma, kwa pai kɛi ɣele ma, gɛ ni kwa pai mɛnii ŋi kɛi, kpaa maŋ mɛnii ti.”—Zĩ. 4:15.

15. Le ɓe ku gɔlɔŋ e pilaŋ tinaa-tuɛ-pere mai?

¹⁵ Berei maŋ kufe mɛni-ŋai pai kɛi a ɣele kelee kɔlɔŋ lai, kɛlɛ ku gɔlɔŋ a gɛɛ Ziova aa gono tee a gɛɛ a pai wɔlɔ-wɔlɔ fulu-laa tɛɛi kupɔ. Ku gɔlɔŋ a gɛɛ va lɛɛ kɛ, nyaŋ sɛŋ ta fa pɔri gberai ŋɔkono-tee-ŋai ŋaa-see kɛi. (Taitɔ 1:2) Nyaa tɔnɔ nɔ ɓe a pɔri ‘mɛni-ŋai pai kɛi e kula gɔɔ pilani e too gbɛɛ ŋai mai maa mɛni ɓoi kua naa-tuɛ.’ Tɔ̃ya ma, mɛni-ŋai kelee Ŋala-kɔlɔi e wɔlɔ mo naa-tuɛi ŋaa-see e kɛ, nyaŋ bere nɔ ɓe a pai kɛi la tinaa-tuɛ-pere. (Az. 46:10) Ku gɔlɔŋ a gɛɛ sɛŋ kelee ta fa pɔri Ziova kperai ku wɛlii. (Lo. 8:​35-39) A pai tare, ŋaa-nɛnɛ da kponoi kpanaŋ tɛɛi kupɔ a gɛɛ ku tɔɔ a gbanaŋɔɔ mɛni-kpanaŋ kelee ta su. Kwa pɔri laai la a gɛɛ Ziova a pai kpɔnii kua, e luwa laa kua.—Zl. 17:​7, 8.

KUFA PƆRI BEREI ZIOVA E KU KƆLƆŊ LA A NƐLƐƐI ŊAA-KAAI MA

16. Le ɓe Ziova e gɔlɔŋ e pilaŋ kuai, nyaŋ nyiŋi a ilii kɛ leŋ? (Ŋule-wooi 139:​1-6)

¹⁶ Ŋule-wooi 139:​1-6 lono. Kukpɛtɛ Ɣalai e ku kpɛtɛ-pere kelee kɔlɔŋ yɛɛ kukili-ŋa-siai da kutua-pere. E mɛni-ŋai kɔlɔŋ kwa moi da mɛni-ŋai a gɛ kukɛ moi, e pɛlɛ la mɛni-ŋai dia kwa gɛi da mɛni-ŋai a gɛ kukɛ di kɛi. Galoŋ Deeɓe e mo a gɛɛ Ziova kaa wɔlɔ naa kumɛni ma, nyaŋ gbɛtɛɛ a gɛɛ e kpɔŋ maa tɛɛ kupɔ a tãi kelee. Gɔlɔŋɔɔ a gɛɛ Ŋwala-wala kelee Ɣalai nyii sɛŋ kelee kpɛtɛi kpaaŋɔɔi imɛni ma a ilii kɛ leŋ? Yɛɛ berei Deeɓe e mo lai: “Darei ti kɛtɛi mɛni ma, nyaŋ mve pɔrii kpiŋ tarei zu.”—Ŋu. 139:​6, NWT, ftn.

17. Le ɓe a pɔri gɛi a gbanaŋɔɔ a gɛɛ ku laa la a gɛɛ Ziova e ku kɔlɔŋ a nɛlɛɛ?

¹⁷ Tãi ta gaayɔɔi ku kula zui, ɓɛi ku ɓɔlɔ naai, kpaa maŋ mɛni-ŋai kukɛ a ku laa la ku lɛɛ pai dɔ̃yai kɔlɔnii, a pɔri gɛi a gbanaŋɔɔ a gɛɛ ku Ziova kaa a wɛli-kɛ-maa Naŋ nyii ku kɔlɔŋ a nɛlɛɛ. Tãi ta bɔara-mɛni-maai ku gɛ a bɔlɔi a pɔri gɛi ku gaa yɛɛ Ziova fe pai wɔlɔ ŋwɛlii e ku kɔlɔŋ kpaa maŋ e laoi-laa kɛ a kua. Galoŋ Deeɓe kpiŋ a kaa gili-ŋa sia a bere sii ŋi. (Ŋu. 38:​18, 21) Kpaa maŋ nuu nyii kɔi a gɛɛ e ŋɔkɛ-ɣeniɛi maa faleŋ a gɛɛ e Ziova nĩa-mɛni kɛi, a pɔri moi nyɛɛi, ‘A kɛ Ɣala e ŋgɔlɔŋ a nɛlɛɛ, gɛ ni le mɛni ɓe a ŋwɛlii a gɛɛ ŋa ŋakɛ-ɣeniɛi maa faleŋ la a pere sii nyii gɛi kpanaŋɔɔi mii?’

18. Mɛni lɛlɛɛ kɛɛ leŋ ɓe kwa pɔri zɔlɔ ɓoi kwa faa ma a gɛɛ Ziova e ku kɔlɔŋ e tɛɛ kukpiŋ kua? (Ya pɔri ŋɔnɔ votoo-ŋai kaai.)

¹⁸ Kwa pɔri mɛni maa-kɔrii nyii pai gɛi ku faa ma a gɛɛ Ziova e ku kɔlɔŋ e tɛɛ kukpiŋ kua, nyaŋ a tua-pere lɛlɛ-ŋa kaa kukponoi nyii kufa pɔri gaai. Berei maŋ a kupɔara-mɛni-maa-ŋai kelee kaa lai, kɛlɛ e nuu sii kɔlɔŋ kwa ŋwɛlii kukɛ lai, nyaŋ e ku wɛlini. (Lo. 7:15) Kwa gɔlɔŋ a gɛɛ Ziova e nuu sii kɔlɔŋ kwa pɔri kɛi lai, a pai kpɔnii kua a gɛɛ kulaa-lai su e kɛ a gbanaŋɔɔ, ku vɛli a lii-nɛ̃ɛ pere.

19. Le kpɔɔi ɓe ku gɔlɔŋ e pilaŋ Ziova mai?

¹⁹ Ku gɔlɔŋ a gɛɛ Ziova kaa a wɛli-kɛ-maa, nyaŋ nyiŋi kaa a tɔ̃ya. (1 Zɔŋ 4:8) Ku gɔlɔŋ a gɛɛ Ziova ŋɔtɔŋ-ŋai a ŋɔwɛli-kɛ-maai lɛ kumɛni ma, nyaŋ a ŋwɛlii a kɛ-ɣeniɛ lɛlɛɛ kumɛni ma. Ku ŋɔnɔ gɔlɔŋ a gɛɛ Ziova a ŋwɛlii ku wɔlɔ-wɔlɔ fulu-laa sɔlɔ ɓo. Nyiŋi a pai kɛi maa-tee-sɛŋ sarai. Berei maŋ kumaa fe waa ni lai, kɛɛ maa-tee-sɛŋ aa pere laa ɓo a gɛɛ ku pɔri Ziova fɛlii yɛɛ berei a ŋwɛlii lai. (Lo. 7:​24, 25) Nyaŋ ku gɔlɔŋ a gɛɛ “Ɣala kɛtɛi e tɛɛ kulii ma, nyaŋ e mɛni kelee kɔlɔŋ.” (1 Zɔŋ 3:​19, 20) Ziova e mɛni kelee kɔlɔŋ e pilaŋ kua, nyaŋ naai la a gɛɛ kwa pai pɔrii nĩa-mɛni kɛi.

20. Le ɓe pai kpɔnii kua a gɛɛ kulii fe too polu a ŋanaa a pa mɛnii ma kufe gɔlɔŋ?

²⁰ Ziova fa mɛni-ŋai maa nɛ̃ɛi ku gɔlɔŋ loo kua. Mɛni ma, maa fe nɛ̃ɛ ni ku nɛɛ naa a gɛɛ kulii e too polu a pa mɛni-ŋai dia kufe di kɔlɔŋ. Kɛlɛ, kwa ŋwɛlii a gɛɛ kuŋɛi e kɛ mɛni-ŋai dia dimaa mɛni kpanaŋɔɔi. Nyiŋi kɛɛ a pai nɛi a gɛɛ kukaa a maa-yeŋ-ɓela, nyaŋ kukili tɔɔi Ziova ma nyii gaa a ‘Nuui nyii dareɛɛi e tɛɛ kuai.’ (Zoo 36:4) Berei maŋ kufa pɔri mɛnii kelee ŋaa-kaai la ma lonii mai, kɛlɛ kuŋɛi kaa tãi perei kwa pai mɛni nina lɛlɛɛ tamaa maa-kɔrii la e pilaŋ Kuɣala Kɛtɛi Ziova ma wɔlɔ-wɔlɔ da wɔlɔ-wɔlɔ.—Ik. 3:11.