¿Kuiti kuu xa ndɨyɨ nandoto koioi?

XA KACHI TUTU II

“Nadandoto Ianyuux ndɨyɨ.” (Hechos 24:15, Tnuʼu Vaʼa Tnuʼu Jesucristu.)

NANDA CHINDEÑAʼA XA NA KINIRO

Naniʼiro tnukanuini kɨu na kuu ɨɨn ñayiu xemaniro (2 Corintios 1:3, 4).

Ditaro xa vichi yuʼuro xa kuuro (Hebreos 2:15).

Na kuneʼero tnukanuini niʼi xa ngondita ñayiu xemaniro (Juan 11:23, 24).

¿KUAʼA XA JANDIXARO XA KAʼA TUTU II?

Vatuka, kundeʼaro uni ni:

• Ianyuux nguidavaʼa ndaa xa ndito. Tutu ii kaʼa xa Taaro Jehová “kida xa xndito-ro ntdaa-ro. Taxi-ia tachi najuen tachi-ro xiʼin ntdaa ka xa io” (Hechos 17:24, 25; Apocalipsis 4:11). Nux Ianyuux nguidavaʼa ñayiu xi kɨtɨ, ¿ma kuaʼa xa kadaia xa ndakoo ñayiu ngaxiʼi a?

• Ianyuux xa nadandoto ntaka ñayiu ngaxiʼi xanaʼa. Tutu ii kakuneʼe xa nxio una ñayiu nadandotoia —seyɨɨ xi ñadɨʼɨ nudɨɨ kuias— te ngonditas nxios nuu ñuʼu. Nxio ñayiu yaʼa dɨa ngaxiʼi. Ko ñadu duʼa nguu xi ɨɨn seyɨɨ xa io koo kɨu xa yɨnduxis (Juan 11:39-44).

• Ianyuux kuini xa na ngondita ñayiu ngaxiʼi. Taaro Jehová ndeʼe xini uʼu xa xiʼi ñayiu te io yachi kadaia xa ñayiu ma kuu kai (1 Corintios 15:26). Meeia vichi tna ini xa nadandotoia ñayiu ngaxiʼi. Kuu ini ia xa ñayiu nakaʼaia ngonditai xa na kooi nuu ñuʼu (Job 14:14, 15).